جاقىندا جامبىلدىق پوليتسەيلەر ەسىرتكىنىڭ ەڭ اۋىر تۇرلەرىنىڭ ءبىرى سانالاتىن گەروين ساتۋمەن اينالىسقان كۇدىكتىنى قولعا ءتۇسىردى. مامانداردىڭ ايتۋىنشا, گەرويننىڭ بۇل ءتۇرى ادامداردى العاش تۇتىنعاننان-اق وزىنە تاۋەلدى ەتىپ تاستايدى ەكەن. دەرەكتەرگە سەنسەك, قولعا تۇسكەن كۇدىكتى وبلىس ورتالىعىندا ۇزاق ۋاقىت بويى گەروين ساتۋمەن اينالىسىپ كەلگەن. پوليتسەيلەردىڭ كۇدىكتىنى ۇستاۋ وپەراتسياسىنىڭ بەينەجازباسى الەۋمەتتىك جەلىدە تاراپ كەتتى.
قۇزىرلى ورگان قىزمەتكەرلەرى كەلتىرگەن مالىمەتتەرىنە قاراعاندا كۇدىكتىنىڭ تۇرعىلىقتى جەرىنە ءتىنتۋ جۇمىستارىن جۇرگىزۋ بارىسىندا 10 گرامم گەروين زاتى تاركىلەنىپتى.
«جەدەل-ىزدەستىرۋ شارالارى جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسى قىزمەتكەرلەرىنىڭ بەلسەندىلىگىمەن جۇزەگە اسقانىن ايتا كەتكەن ءلازىم. بۇل وپەراتسيا ۇلتتىق ۇلانىنىڭ 5513 اسكەري ءبولىمىنىڭ «بۇركىت» ارنايى ماقساتتاعى بولىنىسىمەن بىرلەسە ۇيىمداستىرىلعان «قاراسورا-2022» رەسپۋبليكالىق ءىس-شاراسى اياسىندا وتكىزىلدى. ۇستالعان ازامات قازىرگى كەزدە ءوز كىناسىن تولىق مويىنداپ, ۋاقىتشا ۇستاۋ يزولياتورىنا قاماققا الىندى.
قازىرگى ۋاقىتتا اتالعان دەرەككە قاتىستى قىلمىستىق كودەكستىڭ 297-بابى 3-بولىگى بويىنشا (ەسىرتكى زاتتارىن وتكىزۋ ماقساتىندا اسا ءىرى مولشەردە زاڭسىز ساقتاۋ) سوتقا دەيىنگى تەرگەۋ امالدارى باستالدى. بۇگىنگى كۇنى وسى قىلمىسقا قاتىسى بار باسقا دا ادامداردى انىقتاۋعا باعىتتالعان بىرقاتار تەرگەۋ جۇمىسى جۇرگىزىلۋدە. اتالعان باپقا سايكەس كۇدىكتى 15 جىلعا دەيىنگى مەرزىمگە باس بوستاندىعىنان ايىرىلۋى مۇمكىن», دەيدى جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باسشىسى, پوليتسيا پولكوۆنيگى اسقار جۇمابەكوۆ.
جامبىل وبلىسى
