تارازداعى ورتالىق مەشىت سانالاتىن «ھيباتۋللا تارازيگە» كەلگەندەردىڭ ىشىنەن دە ۇرىلار تابىلىپ جاتىر. جاقىندا مەشىتكە كەلگەن ازاماتتاردىڭ ءبىرى كيىمدەر ءىلىنىپ تۇراتىن بولمەلەردىڭ بىرىنەن 50 مىڭ تەڭگە جانە «iPhone 11» ماركالى تەلەفوندى ۇرلاپ كەتكەنى تۋرالى اڭگىمە جەلدەي ەستى. جابىرلەنۋشىلەردىڭ ءتيىستى ورىندارعا دەر كەزىندە حابارلاسۋىنىڭ ارقاسىندا پوليتسيانىڭ جەدەل ىزدەستىرۋ توبىنىڭ كومەگىمەن كوپ ۇزاماي كۇدىكتى ازامات ۇستالدى.
33 جاستاعى ازامات تۇرار رىسقۇلوۆ اۋدانىنىڭ تۇرعىنى بولىپ شىققان. ول ءوزىنىڭ قاراقشىلىق ارەكەتىن ۇلكەن مەشىتتە ەشكىم بايقاماي قالادى دەگەن ويمەن جاساعانىن مويىنداعان. قازىرگى تاڭدا بۇل دەرەك بويىنشا قىلمىستىق كودەكستىڭ 188-بابىنىڭ 3-بولىگىمەن (ۇرلىق) سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. بيىل الگىندەي سيپاتتاعى 3 دەرەك تىركەلسە, بىلتىر مەشىتتە ۇرلىق جاساپ قولعا تۇسكەندەردىڭ سانى بەسەۋگە جەتىپتى.
جامبىل وبلىسىندا 326 مەشىت بار بولسا, ونىڭ 35-ءى تاراز قالاسىندا ورنالاسقان. ال جۇما كۇنى جۇرتشىلىق مەشىتتەرگە اعىلادى. ءتىپتى ورتالىق مەشىتتەردىڭ ماڭىندا ينە شانشار ورىن قالمايدى. اللا ۇيىنە كەلگەندەر بۇرىندارى الاڭسىز قۇلشىلىق جاساۋدى ويلاسا, ەندى دۇنيەسىن تۇگەندەپ الاڭداپ وتىراتىن جاعدايعا جەتتى. ويتكەنى قالتا ۇرىلارى ءدال وسى جۇما نامازدا جۇرتتىڭ قۇندى زاتتارىن قولدى قىلۋعا بەيىل تۇرادى.
وبلىستىق پوليتسيا دەپارتامەنتى كريمينالدىق پوليتسيا باسقارماسىنىڭ ءبولىم باسشىسى, پوليتسيا پودپولكوۆنيگى قانات قوجامقۇلوۆتىڭ ايتۋىنشا, قىلمىستىڭ بۇل ساناتى وبلىس ورتالىعىندا عانا ەمەس, اۋدانداردا دا قىلاڭ بەرە باستاعان.
«قازىرگى كۇنگە دەيىن مەشىتتەردەگى ۇرلىق بويىنشا 3 دەرەك تىركەلدى. بايزاق, جامبىل جانە جۋالى اۋداندارىندا قاراقشىلاردىڭ مەشىتكە باراتىنىن بايقادىق. بۇگىندە كۇدىكتىلەردى انىقتاۋ ماقساتىندا تەرگەۋ امالدارى جۇرگىزىلىپ جاتىر», دەيدى ول.
قۇزىرلى ورگان قىزمەتكەرىنىڭ ايتۋىنشا, قولىنىڭ سۇعاناعى بار ۇرىلاردى ءتيىستى دەڭگەيدە جاۋاپكەرشىلىككە تارتپاي, مەشىتتەردە ۇرلىق-قارلىقتىڭ تىيىلۋى ەكىتالاي. الايدا ءىشىنارا مەشىت قىزمەتكەرلەرى الگىندەي قىلمىستى جاسىرىپ جاتادى ەكەن.
«بۇگىنگى كۇنگە دەيىن مەشىت يمامدارى ۇرىلاردىڭ الىسقا كەتۋىنە مۇمكىندىك بەرمەي, پوليتسيا قىزمەتكەرلەرىنە ۇستاپ بەرىپ ءجۇر. سوعان قاراماستان قىلمىسقا باراتىنداردىڭ سانى ازايماي تۇر. ولار كامەراعا ءتۇسىپ قالماۋ ءۇشىن بەتىن بۇركەمەلەپ الادى. ءسويتىپ, كەرەگىن الىپ, تابانىن جالتىراتادى. ايتكەنمەن, ۇرىلار ءبىر كامەرادان قۇتىلعانىمەن, ەكىنشى كامەراعا ءتۇسىپ, تۇتىلىپ جاتادى. وسىلايشا, ۇرلىق دەرەگى دەر كەزىندە اشىلىپ جاتىر. دەسە دە كەيبىر مەشىت يمامدارى مۇنداي قىلمىستار جونىندە ءتىس جارىپ ايتا بەرمەيدى. ماسەلەمەن ۋاقىت وتە كەلە تانىسىپ جاتامىز», دەيدى وبلىستىق «ھيباتۋللا تارازي» مەشىتىنىڭ نايب يمامى عالىمبەك تولەگەن ۇلى.
بۇرىندارى پاتەر توناۋشىلار قولعا تۇسكەنىن, قىلمىستىڭ ءىزى سۋىماي اشىلىپ جاتقانىن ەستۋشى ەدىك. مال ۇرلىعىمەن ۇستالعاندار تۋرالى دا ءجيى حاباردار بولاتىنبىز. ەندى قاراقشىلاردىڭ مەشىتتەردى جاعالاپ جۇرگەنى جاعا ۇستاتپاي قويمايدى. اللانىڭ جەردەگى تۇراعىنا بارىپ, قۇلشىلىق پەن «تىرشىلىكتى» شاتاستىراتىن قاراقشىلارمەن كۇرەسەتىن كۇن تۋادى دەپ كىم ويلاپتى؟! قالاي بولعان كۇندە دە مەشىتكە بارعان حالىق الاڭداۋمەن الەك بولىپ ءجۇر...
جامبىل وبلىسى
