احمەت بايتۇرسىن ۇلى • 11 تامىز، 2022

ماجارستان استاناسىندا «احمەت بايتۇرسىن ۇلى جانە الاش» جيناعى جارىق كوردى

71 رەت كورسەتىلدى

ماجارستان استاناسى بۋداپەشت قالاسىندا حالىقارالىق تۇركى اكادەمياسى ازىرلەپ شىعارعان «احمەت بايتۇرسىن ۇلى جانە الاش» جيناعى مەن ارميني ۆامبەريدىڭ «پۋتەشەستۆيە پو سرەدنەي ازي» اتتى كىتابىنىڭ تانىستىرۋ ءراسىمى ءوتتى، دەپ حابارلايدى Egemen.kz.

قازاقتىڭ دارا اقىنى، ادەبيەت زەرتتەۋشى عالىم ءارى تۇركىتانۋشى احمەت بايتۇرسىن ۇلىنىڭ تۋعانىنا 150 جىل جانە كورنەكتى ماجار تۇركولوگى ارميني ۆامبەريدىڭ تۋعانىنا 190 جىل تولۋىنا وراي ۇيىمداستىرىلعان سالتاناتتى ءىس-شارانى تۇركى اكادەمياسى قازاقستاننىڭ ماجارستانداعى ەلشىلىگىمەن بىرلەسىپ وتكىزگەن.

ماجار عىلىم اكادەمياسىنىڭ عيماراتىندا وتكەن القالى جيىنعا حالىقارالىق تۇركى اكادەمياسىنىڭ دەلەگاتسياسى، تۇركسوي-دىڭ بۇرىنعى باس حاتشىسى دۇيسەن قاسەيىنوۆ، تۇركى مەملەكەتتەرى ۇيىمىنىڭ ماجارستانداعى وكىلدىگىنىڭ اتقارۋشى ديرەكتورى يانوش حوۆاري، ماجارستان عىلىم اكادەمياسىنىڭ مۇشەسى يشتۆان ۆاشاري، بەلگىلى قىرعىز تۇركولوگ كادىرالي كونكوباەۆ، تاريح ينستيتۋتىنىڭ ديرەكتورى انتال مولنار، گۋمانيتارلىق زەرتتەۋلەر ورتالىعىنىڭ باس ديرەكتورى بالوگ بالاش، سەگەد ۋنيۆەرسيتەتىنىڭ پروفەسسورى ماريا يۆانيچ، ايشا ماندوكي، سونداي-اق بەلگىلى تۇركولوگ-عالىمدار مەن ديپلوماتيالىق ميسسيا وكىلدەرى دە قاتىستى.

ر

قازاق، اعىلشىن تىلىندە جارىق كورگەن «احمەت بايتۇرسىن ۇلى جانە الاش» جيناعىنا احاڭ تۋرالى زامانداستارىنىڭ جانە بەلگىلى عالىمداردىڭ ماقالالارى توپتاستىرىلسا، «تۇركىستان» سەرياسى اياسىندا جارىق كورگەن «پۋتەشەستۆيە پو سرەدنەي ازي» ەڭبەگىندە ايگىلى ساياحاتشى ارميني ۆامبەري تۇركىستان حالىقتارىنىڭ تاريحى مەن مادەنيەتى، ەتنوگرافياسى مەن گەوگرافياسى تۋرالى دەرەكتەر قامتىلعان. بۇل كىتاپ العاش 1865 جىلى سانكت-پەتەربۋرگتە ورىس تىلىندە جارىق كورىپ، كەيىن تۇركىستان گەنەرال-گۋبەرناتورى ك.پ.كاۋفماننىڭ باستاماسىمەن ازىرلەنگەن «تۇركىستان جيناعىنىڭ» 12-تومىنا ەنگەن ەدى. ال تۇركى اكادەمياسى اتالمىش ەڭبەكتى تۇپنۇسقاسىنا سايكەس قايتا جاريالادى.

سونداي-اق، ماجار وقىرماندارىنىڭ نازارىنا تۇركى اكادەمياسى شىعارعان بىرقاتار ەڭبەكتەر، اتاپ ايتقاندا عۇن ءامىرشىسى اتتيلا تۋرالى اعىلشىن تىلىندە جازىلعان «The Lord of Europe Attila» (ەۋروپا ءامىرشىسى اتيللا) اتتى كىتاپتىڭ، ماندوكي قوڭىر يشتۆاننىڭ «ۇزىلمەس تامىرلار»، قازاق-ماجار تىلىندە قۇراستىرىلعان «جامبىل جىرلارى – Dzsambul muvei»، تونىكوك ەسكەرتكىشىنىڭ 1300 جىلدىعىنا وراي جارىق كورگەن «Bilge Tonyquq» جيناقتارى دا ۇسىنىلدى.

ايتا كەتسەك، سالتاناتتى جيىن اياسىندا تامىرلاس ەلدەردىڭ ىنتىماقتاستىعىن ارتتىرۋعا قوسقان ۇلەسى مەن عىلىمنىڭ دامۋىنا سىڭىرگەن ەڭبەگى ءۇشىن بىرقاتار ماجار عالىمدارى، ياعني يانوش حوۆاري، يشتۆان ۆاشاري، ماريا يۆانيچ حالىقارالىق تۇركى اكادەمياسىنىڭ التىن مەدالىمەن ماراپاتتالدى.

تۇركى اكادەمياسى ازىرلەگەن قۇندى كىتاپتار ماجار عىلىم اكادەمياسىنىڭ كىتاپحانا قورىنا تارتۋ ەتىلدى.

ا

 
سوڭعى جاڭالىقتار

COVID-19: ۆاكتسينا العانداردىڭ سانى ارتتى

كوروناۆيرۋس • بۇگىن، 09:58

ۇقساس جاڭالىقتار