«1 شىلدەدەگى جاعداي بويىنشا قازاقستاندىقتارعا 1,4 ترلن تەڭگەدەن استام سوماعا زەينەتاقى تولەندى. 2022 جىلعى ماۋسىمدا رەسپۋبليكالىق بيۋدجەتتەن زەينەتاقى تولەمدەرىنە 261,9 ملرد تەڭگە, ونىڭ ىشىندە بازالىق زەينەتاقىنى تولەۋگە - 79,4 ملرد تەڭگە, ىنتىماقتى زەينەتاقىنى تولەۋگە - 182,6 ملرد تەڭگە باعىتتالدى», دەلىنگەن ۆەدومستۆو حابارلاماسىندا.
2022 جىلعى 1 شىلدەدەگى جاعداي بويىنشا ەلىمىزدەگى زەينەتكەرلەر سانى 2 ملن 247 مىڭ ادامدى قۇرايدى.
«بۇگىندە زەينەتاقى تولەمدەرىنىڭ ورتاشا مولشەرى (بازالىق زەينەتاقى تولەمىن ەسكەرە وتىرىپ) 117 469 تەڭگەنى قۇرادى», دەپ قوستى ۆەدومستۆو.
ەڭبەك مينيسترلىگىندە 2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى ءاربىر الۋشىعا ونىڭ زەينەتاقى جۇيەسىنە قاتىسۋ ءوتىلىن ەسكەرە وتىرىپ, جەكە تاعايىندالاتىنىن ەسكە سالدى. بۇل رەتتە زەينەتاقى جۇيەسىنە قاتىسۋ وتىلىنە 1998 جىلعى 1 قاڭتارعا ىنتىماقتى جۇيەدە جيناقتالعان ەڭبەك ءوتىلى, سونداي-اق مىندەتتى زەينەتاقى جارنالارى تولەنگەن كەزەڭدەر قوسىلادى.
ماسەلەن, ەگەر زەينەتاقى جۇيەسىنە قاتىسۋ ءوتىلى 10 جانە ودان از جىلدى قۇراسا, سونداي-اق ول بولماعان كەزدە بازالىق زەينەتاقى مولشەرى ەڭ تومەنگى كۇنكورىس دەڭگەيىنىڭ 54%-ىنا تەڭ بولسا, ودان ءارى 10 جىلدان اساتىن ءاربىر جىل ءۇشىن ونىڭ مولشەرى 2%-عا ارتادى.
مىسالى, 20 جىل قاتىسۋ ءوتىلى كەزىندە بازالىق زەينەتاقى ەڭ تومەنگى كۇنكورىس دەڭگەيىنىڭ 74%-ىن, 30 جىل-ەڭ تومەنگى كۇنكورىس دەڭگەيىنىڭ 94%-ىن قۇرايدى. ەڭبەك ءوتىلى 33 جانە ودان كوپ جىل بولعان جاعدايدا ول ەڭ تومەنگى كۇنكورىس دەڭگەيىنىڭ 100%-ى مولشەرىندە بەلگىلەنەدى.
ەگەر بىرىڭعاي جيناقتاۋشى زەينەتاقى قورىنا مزج اۋدارۋ ءبىر ايدا بىرنەشە رەت جۇزەگە اسىرىلسا, جيناقتاۋشى جۇيەگە قاتىسۋ كەزەڭى ءبىر ايدى قۇرايدى. وسىلايشا, مىندەتتى زەينەتاقى جارنالارى قانشالىقتى تۇراقتى جانە تولىق كولەمدە تولەنەتىن بولسا, زەينەتاقى جاسىنا جەتكەن كەزدە بازالىق زەينەتاقى تولەمىنىڭ مولشەرى دە سونشالىقتى جوعارى بولادى.
سونداي-اق ۆەدومستۆودا جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جاعداي بويىنشا ەڭبەك وتىلىنە (كەمىندە التى اي تالاپ ەتىلەدى) جانە زەينەتاقى الدىنداعى كەزەڭدە الىنعان ورتاشا ايلىق كىرىسكە بايلانىستى ەكەنىن اتاپ ءوتتى.
