ماڭعىستاۋدا ءسابي جۇرەگىنە كۇردەلى وتا جاسالدى

اقتاۋ. 28 ءساۋىر. جاڭاوزەن قالاسىنىڭ بەس ايلىق تۇرعىنى, ءبىر اۋلەتتىڭ تۇلا بويى تۇڭعىشى ماليكا فارحاتوۆاعا ماڭعىستاۋ وبلىستىق اۋرۋحاناسىنىڭ كارديوحيرۋرگيا بولىمىندە وتا جاسالدى. بۇل تۋرالى egemen.kz ءتىلشىسى حابارلادى. جۇرەگىندە تۋا ءبىتتى اقاۋى, جۇرەك قارىنشاسىنىڭ تەسىگى بار دەگەن دياگنوز قويىلعان ماليكاعا ۋاقىت وتكىزبەي وتا جاساۋ قاجەتتىگى تۋعان. جەرگىلىكتى حيرۋرگ-دارىگەرلەر مەن استانا, ماسكەۋ قالالارىنان كەلگەن بىلىكتى ماماندار جۇرگىزگەن وتا ءساتتى ءوتتى. جۇرەكتى ۋاقىتشا توقتاتىپ, جاساندى قان اينالىمدى ىسكە قوساتىن, سول ارقىلى وكپە مەن جۇرەكتىڭ قىزمەتىن ۇيلەستىرىپ تۇراتىن ارنايى اپپارات ارقىلى  جاسالعان وتا كۇردەلى وتكەنمەن, ناتيجەسى جاقسى. دارىگەرلەردىڭ ايتۋىنشا, قازىر ءسابيدىڭ جاعدايى جاقسى كورىنەدى. ال 2013 جىلى وبلىستا جۇرەگىندە اقاۋى بار دەپ تانىلعان 50-گە تارتا بۇلدىرشىنگە كۇردەلى وتا جاسالىپتى. ولاردىڭ بارلىعى دا ءبىر جاسقا تولماعان سابيلەر ەكەن. گۇلايىم شىنتەمىرقىزى. دەرەككوز: egemen.kz. فوتو: fotofond.org.