«قاراسورا» كەزىندە انىقتالعان قىلمىستار

پوليتسيا دەپارتامەنتىنىڭ ەسىرت­كى قىلمىسىنا قارسى ءىس-قيمىل باس­قارماسى مەن ۇقك قىزىلوردا وبلىسى جانە بايقوڭىر قالاسى بويىن­­شا دەپارتامەنتى قىزمەتكەرلەرى بىر­لە­سىپ جۇرگىزگەن وپەراتسيا بارىسىن­­دا شيەلى اۋدانىنا قاراستى دالا­­لىق القاپتا 1 665 ءتۇپ سورا وسىمدىگىن ەككەن ازامات ۇستالدى. كۇدىكتىنى ءتىنتۋ كە­زىن­­دە ودان كەپتىرىلگەن ماريحۋانا الىندى.

ماۋسىم ايىنىڭ ورتاسىندا پوليتسەيلەر جالاعاش اۋدانىندا قالىڭ شەڭگەل اراسىندا ەگىلگەن ءدال وسىنداي ءىرى القاپتى انىقتاپ, 1 149 ءتۇپ سورانى جويعان ەدى.

وبلىستىق پوليتسيا دەپارتا­مەن­تىنىڭ باسشىسى بەكتورە سۇلتاننىڭ ايتۋىنشا, وڭىردە 5 اي ىشىندە 73 قىل­مىس تىركەلىپ, ولاردى تەرگەپ-تەك­سەرۋ بارىسىندا ماريحۋانا مەن سين­تەتيكالىق ەسىرتكى تاركىلەنىپ الىن­عان. وسى ەسەپتىك مەرزىمدە ەسىرتكىگە قاتىستى قىلمىستاردىڭ اشىلۋى 53 پايىزدى قۇراپ وتىر.

قۇقىق قورعاۋشىلار ايماقتا ماريحۋانانىڭ ءۇندى جانە گوللاند­تىق تۇرلەرىن ءوسىرۋدى كاسىپكە اينال­دىرعانداردىڭ بار ەكەندىگىن ايتادى. ەلىمىزدە 1 ماۋسىم – 31 قازان ارالىعىندا وتەتىن «قاراسورا» جەدەل-پروفيلاكتيكالىق ءىس-شا­رالارى اياسىندا قالالار مەن اۋىل­دارداعى باۋ-باقشالار, شارۋا قو­جا­­لىقتارىنىڭ اۋماقتارى جانە وبلىستىڭ بارلىق دالالىق جەرلە­رىندە اۋەدەن مونيتورينگ جاسالىپ جاتىر.

ءدال وسى ماسەلە جاقىندا وتكەن قۇقىق بۇزۋشىلىق پروفيلاكتيكاسى جونىندەگى ۆەدومستۆوارالىق كوميسسيا وتىرىسىندا دا قارالدى. وبلىس اكىمى نۇرلىبەك نالىباەۆتىڭ توراعالىعىمەن وتكەن جيىنعا جا­ۋاپتى سالا باسشىلارى مەن بىرقاتار اۋدان اكىمدەرى قاتىستى.

وبلىس اكىمى ەسىرتكىگە قاتىستى قىلمىستاردى اشۋعا بايلانىستى بىرقاتار ناقتى تاپسىرما جۇكتەدى.

– ەسىرتكى زاتتارى تاسىمالداناتىن كانالداردى, دايىندايتىن جانە وتكىزەتىن ورىنداردى انىق­تاپ, پارمەندى اشكەرەلەۋ شارالارى قابىلدانسىن. وسى باعىتتا زاماناۋي تەحنولوگيالاردى كەڭىنەن پايدالانۋ مۇمكىندىكتەرىن قاراستىر­عان ءجون. ەسىرتكىمەن كۇرەس جالعىز پولي­تسەيلەردىڭ عانا جۇمىسى ەمەس. قوعام كەسەلىنە قارسى كوپ بولىپ جۇمىلۋىمىز كەرەك. «عارىشتىق مونيتورينگ» قىزمەتىن قولدانۋ ءۇشىن وبلىستىق ەكونوميكا جانە قارجى باسقارماسىمەن بىرلەسىپ, ۇسىنىس بەرىلسىن. وبلىستىق قوعامدىق دامۋ باسقارماسىمەن بىرلەسىپ, زاڭسىز ەسىرتكى اينالىمى ءۇشىن قۇقىقتىق جاۋاپتىلىقتى ءتۇسىندىرۋ زاڭناماعا سايكەس بۇقارالىق اقپارات قۇرالدارى ارقىلى كەڭىنەن جاريالانۋى كەرەك, – دەدى ن.نالىباەۆ.

سونىمەن قاتار ناشاقورلىققا جانە ەسىرتكى بيزنەسىنە قارسى ءىس-قي­مىلعا باعىتتالعان قىزمەتتى ۇيلەس­تىرۋ جونىندەگى وبلىستىق شتابتىڭ جۇمىسىن كۇشەيتىپ, جاستار ءجيى قول­داناتىن الەۋمەتتىك جەلىلەردە ناشا­قۇمارلىقتىڭ زيانى تۋرالى ارنايى بەينەروليكتەر مەن پوستتار جاريالاۋ قاجەت ەكەنىن باسا ايتتى.

كوميسسيا وتىرىسىندا ينتەر­نەت­تەگى الاياقتىق قىلمىستار ماسەلەسى دە ايتىلدى. وبلىستىق پوليتسيا دەپارتامەنتىنىڭ باسشىسى بەكتورە سۇلتان 5 ايدا الاياقتىق قىلمىستىڭ 297 دەرەگى تىركەلىپ, بۇل قىلمىس ءتۇرىنىڭ وتكەن جىلمەن سالىستىرعاندا 27,4 پايىزعا تومەندەگەنىن جەتكىزدى. انىقتالعان قىلمىستاردىڭ 53,1 پا­يىزى ينتەرنەت الاياقتىق سيپاتىندا بولعان.

كوميسسيا وتىرىسىندا ايماق باس­شىسى الاياقتىق, قارجى پيراميداسى, ينتەرنەت جانە الەۋمەتتىك جەلى­لەر ارقىلى جاسالاتىن قۇقىق بۇزۋ­شىلىقتىڭ الدىن الۋ جۇمىستارىن كۇشەيتۋ قاجەتتىگىن اتاپ ءوتتى. اسىرەسە ينتەرنەت الاياقتىقتىڭ جولىن كەسۋ ءۇشىن ناقتى شارالار قابىلداپ, ادام ساناسىن اربايتىن ءتۇرلى جازبالار مەن اقپاراتتاردان ساقتاندىراتىن يممۋنيتەت قالىپتاستىرۋ قاجەتتىگى ءسوز بولدى.

قىزىلوردا