ەل پرەزيدەنتى نۇرسۇلتان نازارباەۆتىڭ وتكەن جىلعى 22 ساۋىردە استانا قالاسىن ودان ءارى دامىتۋ بويىنشا بەرگەن تاپسىرماسىنا وراي وڭىرلەردەگى تەاترلار مەن مۇراجايلاردى, جەكە ورىنداۋشىلار مەن شىعارماشىلىق ۇجىمداردى كەڭىنەن تانىستىرۋ ماقساتىندا مادەني جوبالار ۇيىمداستىرۋ قولعا الىنعان ەدى. ەل جۇرەگىنە وڭتۇستىك شۋاعىن سىيلاي ەنگەن كيەلى اۋليەاتا ەلىنىڭ كول-كوسىر سۇلۋ ورنەگى كوز تويماستاي قازىنالى.
ەلورداداعى ق.قۋانىشباەۆ اتىنداعى قازاق مۋزىكالىق دراما تەاترىندا بەلگىلى قالامگەر شەرحان مۇرتازانىڭ شىعارماسى نەگىزىندە ساحنالانعان «دومالاق انا» سپەكتاكلىن جۇرتشىلىق سۇيسىنە تاماشالادى. بۇل – ءبىر. ەكىنشىدەن, جامبىل وبلىستىق فيلارمونياسى ۇسىنعان «تاراز – عاسىرلار كۋاسى!» اتتى ونەر كەشىنە قاتىسۋشىلار جىلى جاققا ورالعان قۇستاردىڭ كوكتەمدە سالعان اسەم سازىنداي اسەر قالدىردى. «الاتاۋ» فولكلورلىق, «كاۋسار» ۆوكالدىق, «اقكەربەز» بيشىلەر انسامبلدەرى, «سىمبات» بالدىق بي توبى, «تاراز» تريوسى, «جامبىل-Star» تريوسى, جەكە ورىنداۋشىلاردان جاندوس وماروۆ, عاني ماتەباەۆ, مارالبەك باباقۇلوۆ, ءمادينا ساعىمبەكوۆا, دينارا ديقانباەۆا سياقتى تۋعان جەردىڭ تۋىن جەلبىرەتىپ جۇرگەن وڭكەي ورەن تۇتاسا تۇعىرعا كوتەرىلگەندە, ساحنا قۇراقتاي قۇلپىردى. قازاقستاننىڭ ەڭبەك سىڭىرگەن قايراتكەرى, جامبىل وبلىستىق فيلارمونياسىنىڭ ديرەكتورى ساۋلە جانپەيىسوۆا ونەرى ءوز الدىنا عاجايىپ ءبىر كەستە ەمەس پە؟ حالىق ءانى «گاككۋدى», ءسوزىن ت.ايبەرگەنوۆ جازعان, ءوزىنىڭ «ورتاڭا كەلدى ءوز بالاڭ» ءانىن شىرقاعاندا, داۋىسى بۇلبۇلدىڭ ۇنىندەي سىڭعىرلاي اۋەلەگەن انشىگە قوشەمەتپەن كوپ قول سوعىلدى.
جەرگىلىكتى كومپوزيتورلاردىڭ شىعارمالارى مەن حالىقتىق جاۋھارلاردى قالاپ ورىنداعان تارازدىق ونەرپازدار ورىنداۋىندا «شاتتىق», «دالا ەركەلەرى», «ءورنەك» بيلەرى, «جاڭارعان جامبىل», «قازاقتاي ەلمىز عالامات», «قازاق ءۆالسى», «اقباقاي», «كوزىمنىڭ قاراسى», «جايدارلى جامبىلىم», «تارازىم», «قاراتاۋ», «كوكتەم ءۆالسى» سياقتى ت.ب. ءبىرتالاي تاڭداۋلى اندەر تامىلجي قالىقتادى.
ۇشىنشىدەن, جامبىل وبلىستىق تاريحي ولكەتانۋ مۇراجايىنىڭ كورمەسى ۇلتتىق قۇندىلىقتاردى ۇلىقتاۋمەن استاسا ءورىلدى. ءوڭىردىڭ تاريحي كەسكىن-كەلبەتى شىنايى بەينەلەرمەن بەدەرلەنىپ تانىستىرىلدى. وسى ءبىر ءۇش ءتۇرلى ونەگەگە ءوڭىر جىرى تۇگەل سىيىپ كەتكەندەي.
«ەگەمەن-اقپارات».
––––––––––––––
سۋرەتتەردى تۇسىرگەن
ەرلان وماروۆ.
