باس پروكۋراتۋرانىڭ رەسمي وكىلى دارحان دۇيسەمباي سوڭعى كەزدەرى ازاماتتاردىڭ ەلدى مەكەندەر ماڭىنداعى تۇرمىستىق جانە وندىرىستىك قالدىقتاردىڭ زاڭسىز شىعارىلۋى تۋرالى ارىز-شاعىمدار جيىلەپ كەتكەنىن ايتادى.
كەلىپ تۇسكەن ارىز-شاعىمدار بويىنشا باس پروكۋراتۋرا ۋاكىلەتتى ورگانداردىڭ تابيعاتتى قورعاۋ سالاسىندا ەكولوگيالىق زاڭنامالاردىڭ ساقتاۋىنا تەكسەرۋ جۇرگىزگەن. تەكسەرۋ ءىس-شارالارى كەزىندە پروكۋرورلار كاسىپورىنداردىڭ وندىرىستىك قالدىقتاردى وڭدەۋسىز رۇقسات ەتىلمەگەن جەرلەرگە توگۋىنە قاتىستى 43 فاكتىنى انىقتاپ, تىركەدى. «مىسالى, اقتوبە فەرروقورىتپا زاۋىتى ەكولوگيالىق تۇرعىدان رۇقساتى جوق كاسىپورىندارعا 150 مىڭ تونناعا جۋىق قاۋىپتى قالدىقتاردى وتكىزگەن. ال كاسىپورىندار بولسا, سول قالدىقتاردى وڭدەۋسىز قالاداعى بوس جاتقان جەرلەرگە تاستاعان. بۇگىنگى كۇندە كىنالى تۇلعالار اكىمشىلىك جاۋاپكەرشىلىككە تارتىلدى. ولاردان 80 ملن تەڭگەدەن استام شىعىن ءوندىرىلدى. وعان قوسا, زاۋىتقا قورشاعان ورتاعا ەميسسيا تۇرىندە 1 ملرد 600 ملن تەڭگە كولەمىندە تولەماقى ەسەپتەلدى», دەيدى باس پروكۋراتۋرانىڭ رەسمي وكىلى.
رۇقسات ەتىلمەگەن پوليگونداردىڭ كولەمى دە ازايماۋدا. «قازاقستان عارىش ساپارى» مەكەمەسىنىڭ عارىشتىق باقىلاۋ ناتيجەسىنە سايكەس, وڭىرلەردە جىل سايىن 9 مىڭعا جۋىق جاڭا پوليگون انىقتالادى. مىسالى, الماتى قالاسىنىڭ پروكۋراتۋراسى الاتاۋ, مەدەۋ جانە تۇركسىب اۋداندارىنان 17 كوممۋنالدىق جانە وندىرىستىك قالدىقتار كومىلگەن جەردى تاپقان. قازىرگى كەزدە پروكۋراتۋرانىڭ تالابى بويىنشا قوقىس پوليگوندارى جويىلدى.
جالپى تەكسەرۋ قورىتىندىسى بويىنشا, اقتوبە, الماتى, قىزىلوردا, پاۆلودار, شىعىس قازاقستان وبلىستارى جانە الماتى قالاسى بويىنشا ەكولوگيا دەپارتامەنتتەرىنىڭ باسشىلارى, سونداي-اق ءپروفيلدى مينيسترلىكتىڭ لاۋازىمدى تۇلعالارى تارتىپتىك جاۋاپكەرشىلىككە تارتىلىپ, تابيعات قورعاۋ ينسپەكتورلارى بيۋدجەتكە 33 ملرد تەڭگەگە جۋىق ەكولوگيالىق شىعىندى, سونداي-اق 12 ملرد تەڭگە كولەمىندەگى اكىمشىلىك ايىپپۇلدى وندىرگەن. تيىسىنشە ۇكىمەتكە زاڭ بۇزۋشىلىقتاردى جويۋ تۋرالى ۇسىنىس ەنگىزىلىپ وتىر. بۇل ءىس-شارالاردىڭ بارلىعى قوعامنىڭ, اتاپ ايتقاندا وندىرىستىك قالدىقتاردى قالاي بولسا سولاي قالدىرىپ كەتە بەرەتىن كاسىپورىنداردىڭ قورشاعان ورتانى ساقتاۋعا دەگەن جاۋاپكەرشىلىگىن ارتتىرۋعا باعىتتالىپ وتىر.
