47 ءتۇپ اعاش وتىرعىزىلادى

2 مامىردا استانادا ازيا دامۋ بانكى باس­قارۋ­شىلار كەڭەسىنىڭ 47-ءشى جىل سايىنعى ءماجىلىسى ءوز جۇمىسىن باستايدى. وسىعان وراي 30 ساۋىردە ەلوردادا ازيا دامۋ بانكىنىڭ (ادب) پرەزيدەنتى تاكاحيكو ناكاونىڭ جانە ادب ءماجىلىسىنىڭ توراعاسى – ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆتىڭ قاتىسۋىمەن 47 اعاش وتىرعىزىلعان جاڭا اللەيا اشىلادى. سونىمەن بىرگە ازيا دامۋ بانكى جۇمىسىنىڭ باسىم باعىتتارىنىڭ ءبىرى ەكولوگيانى ساقتاۋ بولعاندىقتان, جيىن بولاتىن تاۋەلسىزدىك سارايىندا قالدىقتاردى قايتا وڭدەۋگە ارنالعان جاشىكتەر قويۋ, فورۋمعا قاتىسۋشىلاردى ەكولوگيالىق تازا سومكەلەرمەن قامتاماسىز ەتۋ, سونداي-اق, وتاندىق تاۋار وندىرۋشىلەر ونىمدەرى مەن قازاق مادەنيەتى مەن ونەرىنىڭ كورمەسىن ۇيىمداستىرۋ جوسپارلانعان. ازيا دامۋ بانكى باسقارۋ­شى­لار كەڭەسىنىڭ 47-ءشى ءماجىلىسى – «ازيانى اۋىسپالى الەمدە بىرىكتىرەتىن جاڭا جىبەك جولدارى» دەپ اتالادى. قازىردىڭ وزىندە قازاقستاندا جىبەك جولىن جاڭعىرتۋ بويىنشا كەشەندى جۇمىستار قولعا الىنۋدا. باس كەڭسەسى مانيلا (فيليپپين) قالاسىندا ورنالاسقان ازيا دامۋ بانكىنىڭ ماقساتى ايماقتىق ينتەگراتسيا جانە تۇگەل قامتيتىن ەكونوميكالىق ءارى ەكولوگيالىق تۇراقتى ءوسىم ارقىلى ازيا-تىنىق مۇحيتى ايماعىندا كەدەيشىلىك دەڭگەيىن قىسقارتۋ بولىپ تابىلادى. اتالعان ۇيىم 1966 جىلى قۇرىلدى, 67 مۇشە-مەملەكەتتەر ونىڭ اكتسيونەرى سانالادى. قازاقستان ۇيىمعا 1994 جىلدان بەرى مۇشە. بۇگىنگى كۇنى كولىك, ەنەرگەتيكا سالالارىن, مەملەكەتتىك باسقارۋ جۇيەسىن جەتىلدىرۋ, جەكەمەنشىك سەكتوردى دامىتۋ ماسەلەلەرى بويىنشا ىنتىماقتاستىق جولعا قويىلعان. قازىرگى كەزدە قازاقستان تەحنيكالىق قايتارىمسىز كومەك الۋشى ەمەس, كەرىسىنشە, دامۋشى ەلدەرگە جاردەمدەسۋ بويىنشا ادب ارىپتەسى بولۋعا نيەتتى. ايتالىق, 2013 جىلى ادب قازاقستانمەن ىنتىماقتاستىق اياسىندا ازيا دامۋ قورىنا دونورلىق كومەك رەتىندە 5 ميلليون دوللار قارجى بولگەن. «ەگەمەن-اقپارات».