كومپانيا باسشىسى پرەمەر-مينيسترگە كومپانيانىڭ قازاقستانداعى قىزمەتى مەن جاڭا جوبالاردى ىسكە اسىرۋ پەرسپەكتيۆالارى تۋرالى ايتىپ بەردى.
قازىرگى ۋاقىتتا Yildirim Holding اقتوبە وبلىسىندا حروم كەنىن جانە كونتسەنتراتىن ءوندىرۋ بويىنشا تابىستى جۇمىس ىستەپ كەلەدى, سونداي-اق «قازگەولوگيا» اق-مەن بىرلەسىپ, شيكىزات بازاسىن تولىقتىرۋ اياسىندا پاۆلودار, قاراعاندى جانە شىعىس قازاقستان وبلىستارىندا گەولوگيالىق بارلاۋ جۇرگىزىپ جاتىر.
ر.يۋ. يىلدىرىمنىڭ ايتۋىنشا, 2013 جىلدان باستاپ حولدينگ قازاقستان ەكونوميكاسىنا $500 ملن-نان استام ينۆەستيتسيا سالعان.
كەزدەسۋ بارىسىندا ءاليحان سمايىلوۆ قر ۇكىمەتى Yildirim Holding كومپانياسىنىڭ قازاقستانداعى ەڭ ءىرى تۇرىك ينۆەستورلارىنىڭ ۇشتىگىنە كىرەتىنىن ەسكەرە وتىرىپ, ءبىزدىڭ ەلگە ينۆەستيتسيالاردى كەڭەيتۋدى قۇپتايتىنىن جەتكىزدى.
پرەمەر-مينيستر حولدينگ باستاماشىلىق ەتكەن جامبىل وبلىسىندا كالتسيلەندىرىلگەن سودا ءوندىرۋ زاۋىتىن سالۋ جوباسى ۇلكەن ماڭىزعا يە ەكەنىن اتاپ ءوتتى. اتالعان جوبانى ىسكە اسىرۋ ناتيجەسىندە قازاقستان ونى يمپورتتاۋدان ەكسپورتتاۋعا كوشۋى ءتيىس.
«بۇل جوبا قازاقستان-تۇركيا ينۆەستيتسيالىق ىنتىماقتاستىعى تاريحىندا سەرپىندى بولاتىنى ءسوزسىز. مەملەكەت قازىردىڭ وزىندە قاجەتتى ينفراقۇرىلىمدى قامتاماسىز ەتۋ بويىنشا ءوز مىندەتتەمەلەرىن ورىنداۋعا كىرىستى. وسىعان بايلانىستى 2025 جىلعا دەيىن زاۋىتتى ىسكە قوسۋ ءۇشىن قۇرىلىس-مونتاجداۋ جۇمىستارىنىڭ بەلسەندى كەزەڭى باستالادى دەپ وتىرمىز», دەدى ءاليحان سمايىلوۆ ءوز سوزىندە.
ءوز كەزەگىندە ر.يۋ يىلدىرىم قازاقستاندىق ارىپتەستەرىنە جوبالاردى جۇزەگە اسىرۋدا كورسەتكەن كومەگى ءۇشىن العىس ءبىلدىرىپ, Yildirim Holding قازاقستانمەن ىنتىماقتاستىقتى كەڭەيتۋگە دايىن ەكەنىن اتاپ ءوتتى.
