ءۇيى بولماعان سوڭ كۇيى وڭالا ما؟

«عالامتورعا شىرمالىپ, اقپاراتتار اعىنىندا الاسۇرعان بۇگىنگىنىڭ بۋىنى كىتاپتى قاجەتسىنبەيدى, كەلەشەك ۇرپاق ەكىباستان», دەيدى بىرەۋلەر. بىراق, بۇل ناقتى اقيقات ەمەس, تەك بولجامنان تۋعان پىكىر, زامان اۋانىن شولعان كوزقاراس. بولاشاقتىڭ قالاي بولارىن ەشكىم بىلمەيدى, بالكىم, كىتاپ ەكىنشى ورىنعا ىعىسار, مۇمكىن قولمەن ۇستاپ, جاستانا وقۋدى جاقسى كورەتىن قالىڭ وقىرمان كىتاپقا قايتىپ ورالار...  قالاي بولعاندا دا, ءدال قازىر كىتاپتى مانسۇقتاپ, كىتاپحانالاردى كۇيرەتىپ, كىتاپ وقۋدان ءبىرجولا باس تارتىپ جاتقانداردى ەستىمەدىك. تەك, كۇيزەلىستى باستان كەشىپ تۇرعان كىتاپحانالاردى كوردىك... ماڭعىستاۋدان! نەگە ەكەنى بەلگىسىز, ماڭعىس­تاۋ­دا حالىقتىڭ سالاۋاتتى ءومىر سۇرۋىنە, رۋحاني بايلىعىن ارتتى­رۋعا نەگىزدەلگەن الەۋمەتتىك نىساندار كوپ جىلداردان بەرى سىرتوراي كۇيدە قالىپ كەلەدى. ەڭسەلى دۇكەندەر, ساۋلەتتى مەيرامحانا­لار مەن سان ءتۇرلى كەڭسەلەر ءسانىمىزدى اسىرىپ, سالتاناتتىڭ كوركىن قىزدىرا تۇسەر, ايتسە دە الەۋمەتتىك سالاداعى مارعاۋلىق رۋحاني مەشەۋلىككە اپارماسا بولعانى... مۇناي جانە گاز وندىرىسىمەن ءماشھۇر ولكەنىڭ ورتالىعى اقتاۋ قالاسىندا ءجونى ءتۇزۋ سپورت كەشەنى كۇنى بۇگىنگە دەيىن جوق, «ماڭعىستاۋ وبلىستىق تاريحي-ولكەتانۋ مۇراجايى» دەگەن دىرداي اتاقتى ارقالاپ, ءىشىن ءوڭىر, ەل تاريحىنا, تۇرمىسىنا قاتىستى مىڭداعان قۇندى جادىگەرلەرمەن جاسانتقان مۇراجاي قالتارىستاعى ءبىر قاباتتى جاتاعان عيماراتتىڭ سىڭار قاناتىندا تىرلىك ەتۋدە. ال 1,5 ميلليونعا تارتا قورى بار, بىلدەي وبلىستىق كىتاپحانا مەن وعان قاراستى اۋداندىق, قالا­لىق كىتاپحانالار جۇيەسىندەگى كى­تاپ ور­دالارىنىڭ احۋالى ادام اياعانداي. كىتاپحانا 1973 جىلى جاڭادان قۇرىلعان وبلىستىڭ عىلىمي كىتاپحاناسى بولىپ اشىلىپ, وعان وڭىرگە باسشىلىققا كەلگەن تۇتقاباي اشىمباەۆتىڭ جارى نەيلا اشىمباەۆا باسشى بولعان ەكەن. كەيىننەن بولەك-بولەك بالالار جانە جاسوسپىرىمدەر كىتاپحاناسى اشىلىپ, ءبارى بىرىگىپ تۇتاس ءبىر ايماقتىڭ رۋحاني قاجەتتىلىگىن قاناعاتتاندىرا العان. تالاپ پەن تەگەۋرىننىڭ مىقتىلىعى ما, الدە كىتاپ وقۋعا قۇمارلىق كوپ پە, جاز جايلاۋ, قىس قىستاۋلاردى ارالاپ, بەلىنەن بۋا تارتقان كىتاپتاردى ناسيحاتتاپ ءجۇرۋ مىندەتتەلگەن زامانداردا وسى كىتاپحانالار جۇيەسى ماڭعىستاۋدىڭ ويى مەن قىرىن تۇگەل قامتىپ وتىردى. 1988 جىلى وبلىس تاراعان كەزدە الگى ۇشەۋى «امبەباپ» بوپ بىرىكتىرىلىپ, كۇنى بۇگىنگە دەيىن سول كۇيىندە قالىپ قويدى. ارقايسىسى ءوز الدىنا جەكە كىتاپحانا بولسا دا ارتىق ەتپەس ەدى, بىراق ەڭ باستى ماسەلە بۇل ەمەس, كىتاپحانانىڭ باسىبايلى عيماراتىنىڭ بولماۋىندا بولىپ تۇر. بۇعان دەيىن قالانىڭ العاشقى باراق ۇيلەرىندە, ونان سوڭ اباي اتىنداعى مادەني-دەمالىس كەشەنىندە, سوسىن ۋنيۆەرسيتەت قابىرعاسىندا كوشىپ-قونىپ جۇرگەن وبلىستىق كىتاپحانانىڭ قازىرگى بالاباقشا عيماراتىن پانالاعانىنا 16 جىل. سالىنعالى 40 جىل بولعان, وسى جىلدار ىشىندە كۇردەلى جوندەۋدەن وتپەگەن عيمارات ىشىندە, 2200 م² جەردەگى تار بولمەلەردە سىعىلىسىپ كۇن كورگەن «امبەباپ» كىتاپحانانىڭ بالالار كىتاپحاناسىنىڭ قورى سىيماعاندىقتان كىر جۋاتىن بولمەلەردە بۋلى-ءتۇيۋلى جاتىر. پاۆلوداردان باسقا وبلىستاردا ءوز الدىنا جەكە كىتاپحانا بوپ تۇرعان, بالالار مەن جاسوسپىرىمدەر كىتاپحاناسىنىڭ ماڭعىستاۋدا تەك ابونومەنت ءبولىمى مەن شاعىن وقۋ زالى جۇمىس ىستەۋدە. ال ولكە­دەگى مۇناي, كولىك-ترانسپورت سالاسى, وزگە دە تەحنيكالىق وقۋ ورىن­دارىنىڭ ستۋدەنتتەرى سۇراستىرىپ ءجيى كەلەتىن تەحنيكالىق كىتاپتار «ماياك» سپورت كەشەنىنىڭ ءبىر بولمەسىنە ورنالاسقان. «كىسىدەگىنىڭ كىلتى اسپاندا» دەمەكشى, «بوسا­تى­ڭىز» دەگەن دۇڭك-دۇڭك حابار دۇركىن-دۇركىن بۇل جاقتان دا جەتىپ تۇرادى ەكەن. كىتاپحانا جايلى جاقسى ءۇمىتتىڭ وتىن ۇرلەگەن «2007-2009 جىلدارعا ارنالعان وبلىس كىتاپحانالارىن دامىتۋ مەن جاڭارتۋدىڭ» وڭىرلىك باعدارلاماسى بولدى. عيمارات سالۋ, كولىكپەن قامتۋ, كومپيۋتەرلەندىرۋ سەكىلدى كىتاپحانالار ءۇشىن «جاندى» تەتىكتەردى تاپ باسقان باعدار­لامانىڭ ءۇش جىلدا ماڭعىستاۋعا بەرگەنى – اقتاۋ قالالىق كىتاپ­حا­نانىڭ «تاقىمىنا» «گازەل» كولى­گىنىڭ ءتيۋى مەن كەيبىر اۋىلدارداعى كىتاپحانالاردىڭ دۇنيە-مۇلكىن جاڭارتۋى, وبلىستىق زاعيپتار ءۇشىن جانە جاڭا كىتاپحانا اشۋ ءۇشىن اقتاۋدان ءۇش بولمەلىك ەكى پاتەردىڭ بەرىلۋى بولدى. وسى قار­ساڭدا بىرقاتار كىتاپحانالار كۇردەلى, ەندى بىرەۋلەرى اعىمداعى جوندەۋدەن ءوتىپ قالدى. باعدارلا­مانىڭ «ءبىسسىمىللاسى» وبلىستىق كىتاپحاناعا ءوز الدىنا عيمارات سالۋ ءجايى بولدى. ول ءۇشىن جوبالىق-سمەتالىق قۇجاتتار جاساقتاۋعا ارنايى قارجى قارالعانمەن, بەرىلمەگەن. تەك, 60 ملن. تەڭگە قارالعان قاراقيا اۋداندىق كىتاپحاناسى قۇرىلىسىنىڭ 30 ملن. تەڭگەگە ىرگەتاسى قالانعان, ول وسى كۇيىندە بىرنەشە جىلدان بەرى تۇرالاپ تۇر. اتالمىش باعدارلاما اياسىندا ءبىرى جايىق جاعاسىنان, ەكىنشىسى قالانىڭ قاق ورتاسىنان ەڭسەلى عيمارات سالىپ العان اتىراۋ جانە قىزىلوردا وبلىستارىنا تامسانۋمەن ماڭعىستاۋلىق كىتاپحاناشىلار مەن وقىرمان­دار­دىڭ تاڭى اتىپ, كۇنى باتۋدا. اسىرەسە, كىتاپحانا ماسەلەسى تەك كى­تاپحاناشىلاردىڭ عانا مۇڭى بو­لىپ قالعان ءتارىزدى, ءۇنىن ەشكىم ەستىمەيدى, كوز جاسىن ەشكىم كورمەيدى, كىتابىن بۋىپ-ءتۇيىپ, ازىن-اۋلاق جالاقىمەن ءارتۇرلى مادەني-رۋحاني, ادەبي-تانىمدىق كەشتەر وتكىزىپ, جاستاردىڭ باسىن بىرىكتىرىپ, قازاقتىڭ ۇلى تۇلعالارىن «ءتىرىلتىپ», ولاردىڭ شىعارماشىلىعىن ناسيحاتتاپ شاپقىلاپ جۇرگەن – سولار. كە­زىندە پروزاشى و.بوكەي: «ادام­زاتقا اۋا قانشالىقتى قاجەت بولسا, كىتاپحاناشىلار دا سون­شالىقتى قاجەت», دەپ ال ءا.كەكىل­باي: «كى­تاپحانالاردى اقىل-ءبىلىم, ادامگەرشىلىك, پاراسات ورداسى دەپ, ال كىتاپحاناشىلاردى ەشقاشان جوعالماۋعا ءتيىستى سول اسىل قازىنانىڭ ساقشىلارى دەپ بىلەمىن», دەپ باعالاعان ماماندىق يەلەرىنىڭ قازىرگى مارتەبەسى قانداي كۇيدە؟ شاعىن زالدى شارا ءۇشىن بوساتىپ, شاقىرىلعان قوناعى سىيماي ابىرجىپ, ۇستەلدەرىن ءارى-بەرى تاسىپ ورىن دايىنداپ قاربالاساتىندارىن قايتەرسىڭ؟! رۋحاني سانانىڭ نازىك, ءالسىز, بىراق ساف ساۋلەلەرى سەكىلدى... جالپى, وبلىس بويىنشا مادە­نيەت باسقارماسىنا قارايتىن 66 كىتاپحانا بار. «كىتاپحانا ەكەن عوي» دەپ ماڭدايدان سيپاعاندار عانا جاڭادان سالىنعان كلۋب ءۇيىنىڭ ىشىنەن ورىن بەرە العان, وسى 66-نىڭ 17-ءسى تيپتىك ۇلگىدەگى كىتاپحانا, قالعاندارىنىڭ ءبىرى بۇرىنعى اكىمنىڭ ءۇيىن قالقالاسا, ەكىنشىسى مەملەكەت ەسەبىندەگى قىرۋار كىتاپ­قا اياۋشىلىق بىلدىرگەن الدەبىر قايىرىمدى جاننىڭ دۇكەنىنىڭ ءبىر بولمەسىندە سىقاپ تۇر. وزگەلەرمەن سالىستىرعاندا كىتاپحاناسىنىڭ كۇيى كوشىلگەرى تۇرعان تۇپقاراعان اۋدانى ەكەن. مۇنداعى تەڭىزدەگى مۇناي وپەراتسيالارىن قولداپ, سەرۆيستىك قىزمەت كورسەتەتىن كوم­پا­نيالاردىڭ, اسىرەسە, «ادجيپ» كومپانياسىنىڭ ىشكەن-جەگەنى ادال ەكەن, اۋداننىڭ الەۋمەتتىك-ينفراقۇرىلىمدىق دامۋىنا دەمەۋ كورسەتىپ كەلەدى. وسى نازاردان قاعىس قالماعان اقشۇقىر, قىزىلوزەن, اتاش اۋىلدارىنىڭ كىتاپحانالارىنىڭ «بەتى بەرى قارادى», ال تۇرعىندارىنىڭ سانى 2-3 ەسە وسكەن سايىن اۋىلىندا بۇل ماسەلە بولىپ تۇر. جىل سايىن كىتاپحاناسىنىڭ جەل كەۋلەمەسىن دەپ ىرگەسىن قىم­تاپ, سۋ تامباسىن دەپ توبەسىن جاپ­سىرمالاعان شەتپەدەن اۋداندىق كىتاپحانا سالامىز دەپ بۇرىنىراق 4 ملن.تەڭگەگە جوبالىق-سمەتالىق قۇجات جاسالعان, بىراق قۇرىلىس ماتەريالدارىنىڭ قۇنى وزگەرۋى­نىڭ اسەرى مە, مەرزىمى ءوتىپ كەتكەن­دىكتەن ول قايتا قارالۋدى كۇتىپ قالعان سىڭايلى. بىراق, 2008 جىلى كىتاپحانا اۋلاسىنان عيما­رات سالۋ ءۇشىن 1000 مەتر² جەر پاي­دالانۋعا بەرىلسىن دەگەن شەشىم­نىڭ بولۋى – كوڭىلگە مەدەۋ. ماڭعىستاۋ اۋدانىنىڭ ساي-وتەس اۋىلى ۆوكزال ماڭىنداعى ەكى قاباتتى ءۇيدىڭ تومەنگى قاباتىنىڭ ەكى بولمەلى پاتەرىنە جايعاسقان كىتاپحانانىڭ جاعدايى جوندەۋ كورمەگەن مۇشكىل حالدە. ال تۇششىبەك حالقىنىڭ «باسپاق تۇگىل, باس قايعى» قىلماۋعا حاقى بار, تۋبەركۋلەز دەرتىمەن اۋىراتىن ناۋ­قاستار جاتاتىن ساناتوري ىشىنە, باكزەرتحاناعا ورنالاسقان اۋىل كىتاپحاناسى ءوز-وزىنەن وقشاۋ­لا­نىپ قالعان. سەبەبى, ايتپاسا دا تۇسىنىكتى. حالىق پەن كىتاپ اراسىن كوزاپارا الشاقتاتۋدىڭ استارىندا نە تۇر – باسشىلار حالىقتى كىتاپ وقىمايدى دەپ سانايدى ما, الدە «كىتاپحانا بار» دەگەن ەسەپ-قيساپقا عانا قاجەت پە؟! اتالمىش اۋداندا «مۇناي كومپانيالارى شەبىر مەن اقشىمىراۋ اۋىلدارىنا كىتاپحانا سالادى ەكەن» دەگەن جىلىمىق جاڭالىق قۇلاققا تيەدى... اقتاۋ قالالىق كىتاپحاناسى كۇنى بۇگىنگە دەيىن اباي اتىنداعى مادەني-دەمالىس كەشەنى قانا­تى­نىڭ استىندا. كەشەندە جۋىردا باستالعان كۇردەلى جوندەۋ بۇلاردى كىتاپتارىن بۋىپ-ءتۇيىپ, باراتىن جەر ىزدەۋ تىعىرىعىنا تىرەدى. ءتۇرلى ۇيىرمەلەرى, كلۋبتارى مەن توپتارى كوپ كەشەننىڭ باسشىلىعى كۇردەلى جوندەۋ بىتكەن سوڭ, ارتى­نىپ-تارتىنعان كىتاپحاناعا ەسىگىن قايتادان ايقارا اشپاسا, «تورلەت» دەمەسە, تاڭعالۋدىڭ قاجەتى جوق. مونوقالا ساناتىندا بولۋ جا­­ڭاوزەن قالاسى مەن ونىڭ ما­ڭا­ي­ىن­داعى شاعىن اۋىلداردىڭ جوعىن تۇگەندەيدى دەگەن وي بار. سەنەك­تە 3-4 جىل بۇرىن سالىنعان جاڭا كلۋب ۇيىنەن سىڭعىراعان كىتاپحانا بولمەسى اشىلسا, وسى جاعدايلار تەڭگە مەن قىزىلسايدا جالعاسىن تاپتى. بىراق, 130 مىڭعا جۋىق حالقى بار جاڭاوزەندەگى جوعارىداعى ەكى اۋىلدى قوسپاعاندا قالعان 5 كىتاپحانا قالانىڭ وزىنە شوعىرلانعان. ال, راحات-1, راحات-2, اراي شاعىن اۋداندارى ءۇشىن كىتاپحانا اشىلماعان. مۇن­داي جاعداي مۇنايلى جانە بەينەۋ اۋداندارىنا دا ورتاق. مادەنيەت سالاسىنىڭ كىتاپحانا قىزمەتىنىڭ زاڭدىلىعىنا ساي, ءاربىر مىڭ تۇر­عىنى بار اۋىلدا كىتاپحانا بولۋى ءتيىس, ال اۋماعى اتشاپتىرىم قاشىقتىققا ۇلعايىپ, تۇرعىن­دارى بىرنەشە مىڭعا ارتا تۇسكەن اۋدانداردىڭ شەت اۋىلدارىندا كىتاپحانا جوق. وقۋلىقتار مەن مەكتەپ باعدارلامالارىنا قاتىستى قوسىمشا قۇرالداردى ۇسىناتىن مەكتەپ كىتاپحانالارىن جالپىعا ارنالعان دەۋگە بولمايدى, ولار ءبىلىم سالاسىنا قاتىستى مەكەمەلەر. مەكتەپتە ساپالى ءبىلىم بەرۋ ءىسىن, بالاباقشامەن قامتۋدى, ءۇش اۋىسىمدىق وقىتۋدى جويۋدى جول­عا قويۋ جولىندا جۇرگەن بۇل سالا­نىڭ جالپى تۇرعىنداردىڭ «ساۋاتىن اشىپ, ءبىلىمىن جەتىلدىرۋگە» مىندەتتىلىگى دە, شاماسى دا جوق. وسىلاي تىزبەكتەپ, تۇرتپەكتەپ كە­تە بەر­سەڭ, وڭىردە بىرىنەن-ءبىرى «اسىپ ءتۇس­كەن» كىتاپحانالاردى كەز­دەس­تىرۋگە بولادى. جۋىق ارادا جوس­پاردا تۇرعاندار دا بار بولار, ءبى­راق بۇعان دەيىنگى جوسپارلار ءجۇن­­جىپ, ۋادەلەر ۇگىتىلىپ, سوزدەر سۇ­يى­لىپ كەتكەن سوڭ سەنۋدىڭ ءوزى قي­ىن. قازىر تۇرمىسقا كومپيۋتەر دەندەي ەنگەن زامان, وسى باعىتتا كىتاپحانالاردى كومپيۋتەرلەندىرۋ ماسەلەسى كۇن تارتىبىندە تۇرسا دا, ماڭعىستاۋداعى 66 كىتاپحانانىڭ قولدانىسىندا 100 كومپيۋتەر بار, ونىڭ 25-ءى وبلىس ورتالىعىندا دەگەندە, اۋداندارداعىنىڭ ءجايىن ءوزىڭىز شامالاي بەرىڭىز. مىسا­لى, ماڭعىستاۋ اۋدانىنىڭ 15 كىتاپ­حاناسىندا كومپيۋتەر سانى – 3! ال وبلىستىق امبەباپ كىتاپحانانىڭ وزدەرىنە پويىزبەن كەلگەن كىتاپ­تاردى تاسىمالداپ الىپ, اۋدان, قالالارعا شىعاتىن كولىگى – كونە «جيگۋلي». كىتاپحانالارداعى احۋالدى كورگەن جاستار بۇل سالادا قىزمەت ەتۋدەن ات-توندارىن الا قاشادى. قازىر وبلىستا 170 كىتاپحانا قىزمەتكەرى بار, ونىڭ دا جارتىسىنا جۋىعى وزگە «ءجونى ءتۇزۋ جۇمىس تابىلعانشا «ستاج» جيناپ» جۇرگەن باسقا ماماندىق يەلەرى. وسى جاعدايلارعا قاراپ وتىرىپ ويعا قالاسىڭ – كىتاپحانالارىمىز قايدا «بەتتەپ» بارادى؟ ولار راسىندا كۇيرەۋگە باعىت العان جوق پا؟ ولارعا نەگە قولداۋ جوق؟ جاستاردى كىنالاۋعا دايىن تۇرا­تىن قوعام ۇرپاقتى رۋحاني يەن بايلىقتان وزدەرى اجىراتىپ الىپ وتىرعان جوق پا؟ كىتاپحانالارمەن قايتا قاۋىشۋ ءۇشىن نە ىستەۋ كەرەك؟ ماڭعىستاۋدىڭ وبلىستىق كىتاپ­حاناسى جىلىنا 18 مىڭ وقىر­مانعا قىزمەت كورسەتەدى ەكەن. اينا­لىمعا كەلمەيتىن تار زال, سىي­ماي جيناۋلى جاتىپ كونەرگەن كىتاپتار, قۇرال-جابدىقتاردىڭ جەتىسپەۋى, ياعني ماتەريالدىق-تەح­نيكالىق بازا تولىققاندى قىزمەت كورسەتۋگە مۇمكىندىك بەرمەي وتىر. زاڭعا ساي كەمىندە 10-20 جىل ساق­تالۋعا ءتيىس رەسپۋبليكالىق جانە جەرگىلىكتى ماڭىزداعى باق ونىمدەرىن ءبىر كۇنى قاجەت بولارىن بىلە تۇرا 2-3 جىلدان سوڭ «ەسەپتەن شىعارۋعا» ءماجبۇر. ماڭعىستاۋدا ەلەكتروندى وقۋ زالى, ينتەرنەت زالى بار كىتاپحانا عيماراتى سالىنسا, «ءبىر وقپەن ەكى قويان اتىپ الۋ» دەگەن سول بولعالى تۇر. ءبىرىنشىسى, ارينە, كىتاپحانا ماسەلەسى شەشىلىپ, وقىرماندارعا وڭتايلى, زاماناۋي تالاپتارعا ساي قىزمەت كورسەتىلەدى, ەكىنشىدەن, بالاباقشا عيماراتى ءبىلىم سالاسىنا قايتارىلىپ, ونسىز دا شەتى كورىنبەي تۇرعان شيرەتتىڭ ءبىر بولەگى قىسقارعان بولار ەدى. الايدا, ءتيىستى ورىندار تاراپىنان جىلدار بويى جاڭىلماي كەلىپ جەتەتىن «كىتاپحانا سالاتىن جەر جوق» دەگەن جاۋاپ اۋىزعا قاقپاق, اياققا تۇساۋ. قازىرگى تاڭدا ماڭعىستاۋ وب­لىس­تىق امبەباپ كىتاپحاناسى ۇجى­­مى تىرمىسىپ تىرلىگىن ىستەۋ­دە. كىتاپتار كىتاپحانالارعا ءمىن­دەتتەلگەن «رابيس» باعدار­لا­ما­سى­نا وتۋدە. جۋىردا كىتاپحاناعا «كيبو» بيبليوبۋس-كولىگى (كومپلەكسنىي ينفورماتسيوننىي-بيبليوتيچنىي وبسلۋجيۆانيە) الىندى. ىشىندە فاكسى, كسەروكسى, عارىشتىق انتەننالار ارقىلى عالامتورعا قوسىلعان كومپيۋتەرى, كىتاپ جينايتىن سورەلەرى مەن ونشاقتى جينالمالى ورىندىعى بار. قۇنى 27-30 ملن. تەڭگە تۇرا­تىن كولىك-كىتاپحانا اۋىلداردى ارالايتىن بولادى. بۇل دا جاقسى. بىراق, وبلىستىق كىتاپحانا كولىك ءىشىن قونىس ەتپەيتىنى بەلگىلى, سوندىقتان وبلىسقا ەڭسەلى كىتاپ­حانا عيماراتى كەرەك-اق. مەملەكەت باسشىسى ن.نا­زار­باەۆ «مادەني مۇرا» باعدار­لا­ما­سىندا: «ءوزىنىڭ بيىك, تازا, رۋحاني قاسيەتىمەن كىتاپ – مادەنيەت پەن رۋحانياتتى قورعاۋدا تەڭدەسى جوق قارۋ بولىپ تابىلادى» دەگەن بولاتىن. وبلىستىڭ كىتاپحاناسى ماقتانا كىرىپ, ۇيالماي كورسەتەتىن اق ورداعا يە بولسا, «مادەني مۇرا» باعدارلاماسىنىڭ ماڭعىستاۋدا جۇزەگە اسقان ماڭىزدى ىستەرىنىڭ ءبىرى رەتىندە جۇرتشىلىقتىڭ ىقىلاسىنا بولەنەتىنى ءسوزسىز. P.S. ماقالا رەداكتسياعا جىبەرىلىپ جاتقاندا كىتاپحانادان قوڭىراۋ شالىندى – كىتاپحانا سالۋعا اقتاۋ قالاسىنان جەر تەلىمىن سۇراعان وبلىستىڭ مادەنيەت باسقارماسىنا اقتاۋ قالاسى اكىمىنىڭ ورىنباسارى ن.اققۇلوۆ قول قويعان جاۋاپ حات كەلىپتى. وندا «...16, 18, 19ا, 34, 35 شاعىن اۋدانداردىڭ ەگجەي-تەگجەيلى جوسپارلاۋ جوبالارىن جاساقتاۋ بويىنشا جۇمىستار باستالدى. جوبانى جاساقتاۋ بارىسىندا شاعىن اۋدانداردىڭ بىرىنە كىتاپحانا عيماراتىنىڭ قۇرىلىسىنا جەر ۋچاسكەسىن بەلگىلەۋ جوسپارىمىزدا بار» دەلىنىپتى. «جاقسى ءسوز – جارىم ىرىس»... گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى.