«بيىل 23 مىڭعا جۋىق حالقى بار 11 اۋىلدى ورتالىقتاندىرىلعان اۋىز سۋمەن جانە 39 اۋىلدى كەشەندى بلوك-مودۋلدەرمەن قامتۋ جوسپارلانعان. الدىمىزدا مەملەكەت باسشىسىنىڭ 2025 جىلى حالىقتىڭ 100 %-ىن ساپالى اۋىز سۋمەن قامتاماسىز ەتۋ مىندەتى تۇر. دەگەنمەن قابىلدانىپ جاتقان شارالار ارقىلى بۇل كورسەتكىشتى 2023 جىلى ورىنداۋدى ماقسات ەتىپ وتىرمىز. وسى جىلدىڭ سوڭىنا دەيىن وبلىس تۇرعىندارىنىڭ 93,4%-ى كوگىلدىر وتىنمەن قامتاماسىز ەتىلەدى», دەدى وبلىس باسشىسى.
بىلتىر اقتوبە وبلىسىندا 1,2 ملن شارشى مەتر تۇرعىن ءۇي پايدالانۋعا بەرىلسە, بيىل جىل سوڭىنا دەيىن 1,3 ملن شارشى مەتر تۇرعىن ءۇي بەرىلەدى دەپ جوسپارلانعان.
وسى جىلى 580 شاقىرىم جول جوندەلىپ جاتىر. وعان رەسپۋبليكالىق جانە جەرگىلىكتى بيۋدجەتتەن 34 ملرد تەڭگە قاراستىرىلسا, ونىڭ 20 ملرد تەڭگەسى جەرگىلىكتى جولداردى جوندەۋگە, ال 14 ملرد تەڭگەسى اۋىل-قالا كوشەلەرىن جوندەۋگە بولىنگەن.
وتكەن جىلدان باستاپ مال ازىعىن سۋبسيديالاۋ جوباسى قولعا الىندى. سونىڭ ناتيجەسىندە بىلتىرعى قۋاڭشىلىقتا مال باسىن ساقتاپ قالۋعا مۇمكىندىك بولدى. قازىرگى كەزدە شارۋالار جەم-ءشوپ قورىن دايىنداۋعا ءىرى قارا باسىنا 30 مىڭ, ءار جىلقى باسىنا 20 مىڭ تەڭگە قارجى الىپ وتىر. سونداي-اق «بيزنەستىڭ جول كارتاسى-2025» مەملەكەتتىك باعدارلاماسى شەڭبەرىندە اۋىل شارۋاشىلىعى قۇرىلىمدارىنا, سونىڭ ىشىندە شارۋا قوجالىقتارىنا گاز, سۋ قۇبىرلارىن تارتۋ جۇيەلى تۇردە قولعا الىندى. بيىل مايلى داقىلدار ەگىستىگى جانە كولتاباندى سۋارمالى شارۋاشىلىقتار سانى كوبەيتىلىپ, مال بورداقىلاۋ الاڭدارى مەن ەت كومبيناتتارىن سالۋ جوسپارلانىپ وتىر.
بريفينگتە جۋرناليستەر اقتوبە تەمىرقورىتپا زاۋىتىنىڭ اۋاعا شىعارىلاتىن زياندى قالدىقتارىن ازايتۋ, العا حيميا زاۋىتىنداعى «تاريحي حيميالىق» قالدىقتاردى كومۋ, كوكجيدە تۇششى سۋ قورىن ساقتاۋ, اقتوبە قالاسىنداعى جاعىمسىز ءيىستى جويۋ, قالاداعى كارىز جۇيەسىن جاڭعىرتۋ جۇمىستارى, توقتاپ قالعان وزەن ارنالارىن كەڭەيتۋ جوباسى تۋرالى سۇرادى.
2017 جىلى اقتوبە قالاسىنىڭ توڭىرەگىندەگى 8 وزەننىڭ ارناسىن كەڭەيتۋ جۇمىستارى باستالىپ, 2019 جىلى جەرگىلىكتى ەكوبەلسەندىلەردىڭ تالابىمەن توقتاتىلعان بولاتىن. ولار تازالاۋ جۇمىستارى ساپاسىز جۇرگىزىلگەندىكتەن, وزەن ارنالارى تارتىلىپ, جاعالاۋداعى بۇلاق كوزدەرى كومىلىپ قالدى دەگەن تالاپپەن وبلىستىق پروكۋراتۋراعا شاعىم تۇسىرگەن. مەردىگەرلەردى ەلەك, قارعالى وزەندەرىنىڭ جاعاسىندا ءوسىپ تۇرعان قىزىل كىتاپقا ەنگەن اعاشتاردى زاڭسىز كەسىپ تاستادى دەپ ايىپتادى. ءوڭىر باسشىسىنىڭ ايتۋىنشا, قازىر وسى جوباعا تۇزەتۋ ەنگىزىلىپ جاتىر. كەشەگى ساۋىردەگى سۋ تاسقىنى كەزىندە ارنالارى كەڭەيتىلگەن جەرلەردە بۇرىنعىداي جاعالاۋداعى ۇيلەردى سۋ باسۋ قاۋپى تونگەن جوق. ءوڭىر باسشىسى كەزىندە جاعالاۋدى كەڭەيتۋ جوباسىنا ءۇزىلدى-كەسىلدى قارسى شىققان بەلسەندىلەردى سۋ باسۋ قاۋپى بار جەرلەردە تۇراتىن جۇرتشىلىقپەن سويلەسۋگە شاقىردى.
بريفينگتە قاڭعىباس يتتەردىڭ 12 جاستاعى بالانى تالاپ جازىم ەتۋىنە بايلانىستى قابىلدانعان شەشىمدەر تۋرالى سۇرادى. جاس بالانىڭ ومىرىنە بالتا شاپقان وسى وقيعادا ۇلكەندەردىڭ جاۋاپسىزدىعى مەن زاڭنىڭ سولقىلداقتىعى, مامانداردىڭ ءوز جۇمىسىن دۇرىس اتقارماۋى دا سەبەپشى بولدى. مۇنداي وقيعانىڭ ەندى قايتالانباۋى ءۇشىن قازىر بارلىق جەردە قاڭعىباس يتتەر مەن مىسىقتاردان تازارتۋ جۇمىستارى باستالدى.
اقتوبە وبلىسى
