جيىنعا قاتىسقان پرەمەر-ءمينيستردىڭ ورىنباسارى ەرالى توعجانوۆ رەفەرەندۋم قورىتىندىسى قوعامدىق توپتاسۋدىڭ جاڭا دەڭگەيىن كورسەتكەنىن اتاپ ءوتتى.
«بۇل ەلىمىزدىڭ ودان ءارى دامۋ بولاشاعى تۋرالى بيلىك پەن قوعامنىڭ ورتاق تۇسىنىگى بار ەكەنىن بىلدىرەدى. ازاماتتار ەلىمىزدىڭ اتا زاڭىنا ەنگىزىلگەن وزگەرىستەر مەن تولىقتىرۋلاردى قولدادى. ەندى ۇكىمەتتىڭ الدىندا جاڭا مىندەتتەر تۇر – بۇل ازاماتتاردىڭ بارلىق سىندارلى ءوتىنىش-تىلەكتەرىن جەدەل ءارى ءتيىمدى شەشۋ جانە بارلىق سالانى ستراتەگيالىق باسقارۋ. ياعني ساپالى جۇمىس ورىندارىن قۇرۋ, حالىقتىڭ تابىس دەڭگەيىن, الەۋمەتتىك جانە مەديتسينالىق قىزمەت كورسەتۋ ساپاسىن ارتتىرۋ, كولىك-لوگيستيكالىق جۇيەنى جەتىلدىرۋ سەكىلدى ماڭىزدى ءارى اۋقىمدى جۇمىستاردى اتقارۋىمىز قاجەت», دەدى ۆيتسە-پرەمەر.
ءوز كەزەگىندە Amanat پارتياسىنىڭ اتقارۋشى حاتشىسى اسحات ورالوۆ 5 ماۋسىمدا وتكەن رەفەرەندۋم ەلدە دەموكراتيا ينستيتۋتى نىعايىپ كەلە جاتقانىن كورسەتكەنىن اتاپ ءوتتى.
«بۇل ماڭىزدى ساياسي وقيعا مەملەكەتتىلىكتى دەموكراتيالىق قۇندىلىقتارعا نەگىزدەپ قۇرۋعا دەگەن باعدارىمىزدى بەكىتتى دەپ سەنىممەن ايتا الامىز. كونستيتۋتسياعا ەنگىزىلەتىن وزگەرىستەر – ساياسي رەفورمالاردىڭ باسى عانا. ەلىمىزدى جان-جاقتى جاڭعىرتۋ جۇمىسى جالعاسادى. پارتيا جاڭا جاعدايعا دايىن. ەلدىڭ جەتەكشى ساياسي كۇشى پوزيتسياسىن ساقتاپ قالۋ ءۇشىن Amanat-تىڭ الەۋەتى جەتكىلىكتى. تاجىريبەلى ساياسي ويىنشى جانە پارلامەنتتىك كوپشىلىك داۋىسقا يە پارتيا رەتىندە ناقتى باسەكەلەستىككە دايىنبىز», دەدى اسحات ورالوۆ.
«ەگەمەن قازاقستان» رەسپۋبليكالىق گازەتى» جشس باس ديرەكتورى دارحان قىدىرالىنىڭ پىكىرىنشە, رەفەرەندۋم دەموكراتيالىق رەسپۋبليكاعا ازاماتتىق, اشىق قوعامعا جانە ادىلەتتى ەلگە جاسالعان ناقتى قادام بولدى.
«پرەزيدەنت ۇسىنعان رەفورمالار باعىتى قوعامدا قوردالانىپ قالعان كوكەيكەستى ماسەلەلەردىڭ ءتۇيىنىن تارقاتتى, ال رەفەرەندۋم وزگەرىستەردىڭ باستالعانىن ايقىندايدى», دەپ اتاپ ءوتتى دارحان قىدىرالى.
ماجىلىستەگى Amanat فراكتسياسىنىڭ مۇشەسى يۋليا كۋچينسكايا رەفەرەندۋم ازاماتتاردىڭ ەداۋىر بولىگىن ساياسي پروتسەستەرگە بويلاپ, ەلدە بولىپ جاتقان وزگەرىستەردى سارالاۋىنا مۇمكىندىك بەردى دەپ سانايدى.
«ەگەر ازاماتتار قانداي وزگەرىستەر ورىن الىپ جاتقانىن, تۇزەتۋلەردى قابىلداعاننان كەيىن ولاردىڭ قانداي مۇمكىندىكتەرى بولاتىنىن تۇسىنبەسە, وزگەرىستەر تەك قاعاز بەتىندە قالىپ قويۋى مۇمكىن», دەپ قوستى يۋليا كۋچينسكايا.
پارلامەنت جانىنداعى پارلامەنتاريزم ينستيتۋتىنىڭ ديرەكتورى مانسۇرحان ماحامبەتوۆتىڭ ايتۋىنشا, رەفورمالار ءبىرىنشى كەزەكتە مەملەكەتتىك بيلىكتىڭ تيىمدىلىگىن ارتتىرۋعا باعىتتالعان.
«ياعني, مەملەكەتتىك بيلىكتىڭ ستاندارتىن جاساۋىمىز كەرەك. ستاندارت بولعان جەردە عانا ءتارتىپ, اشىقتىق, جاۋاپكەرشىلىك بولادى. ستاندارت دەگەنىمىز – جالپى ەرەجە. ءبىز مەملەكەتتىك بيلىكتىڭ پارمەندىلىگىن ارتتىرامىز دەسەك, وسى ستاندارتتىڭ توڭىرەگىندە جۇمىلا جۇمىس ىستەۋىمىز قاجەت», دەدى م.ماحامبەتوۆ.
ەستەرىڭىزگە سالا كەتەيىك, Talqylau ديالوگ الاڭىن قۇرۋ باستاماسى Amanat پارتياسىنىڭ 1 ناۋرىزدا وتكەن كەزەكتەن تىس سەزىندە پارتيالىق ترانسفورماتسيا باعدارلاماسى تارماقتارىنىڭ ءبىرى رەتىندە كوتەرىلگەن بولاتىن. الاڭدا ساراپشىلار, دەپۋتاتتار, مەملەكەتتىك ورگاندار مەن ۇكىمەتتىك ەمەس ۇيىم وكىلدەرى ازاماتتاردى تولعاندىراتىن وزەكتى ماسەلەلەردى شەشۋ جونىندە ۇسىنىستار ازىرلەۋ ءۇشىن تۇراقتى تۇردە كەزدەسىپ وتىرادى.
