قار بارىسى قازاق جەرىنە قايتا ورالدى

شىمكەنت. 22 ءساۋىر. وڭتۇستىك قازاقستان وبلىسىنداعى «سايرام-وگەم» ۇلتتىق تابيعي ساياباعى اۋماعىندا قار بارىسى پايدا بولدى. ولاردىڭ سانى ەداۋىر وسە تۇسكەن. بۇل تۋرالى «24kz» حابارلادى. كەيىنگى 50 جىلدىڭ ىشىندە تۇقىمى قۇرىپ بىتۋگە جاقىن دەپ سانالىپ جۇرگەن قار بارىسىنىڭ قازاق جەرىندە بوي كورسەتۋى, ارينە, جاعىمدى جاڭالىق ءارى ۇلكەن قۋانىش. «سايرام-وگەم» ۇلتتىق ساياباعىنىڭ قورىقشىلارى ءتۇز تاعىسىنىڭ اتا-جۇرتىنا قايتا ورالۋىن جاقسىلىققا جورىپ,  كوڭىلدەرى كوتەرىلىپ, ونى جالما-جان بەينە كامەراعا ءتۇسىرىپ الا قويادى. دالىرەك ايتقاندا, تەڭىز دەڭگەيىنەن 4 200 مەتردەن استام بيىكتىكتە ونالاسقان «سايرام-وگەم» ساياباعىنىڭ  سارىايعىر شاتقالىنان قىلاڭ بەرگەن قار بارىسىن العاش رەت قورىقشى نۇرجان اقىنبەكوۆ كەزدەستىرگەن. نۇرجان اقىنبەكوۆ: «قار بارىسى مەنى كورگەندە ۇركىپ نەمەسە بوتەن قىلىق كورسەتكەن جوق. اسىقپاي, جان-جاعىنا بەيقام قاراپ كەتە باردى. قۇيرىعى وتە ۇزىن. ءجۇنى ۇلپىلدەك. ءتۇسى تارعىل-تارعىل بولى كەلەدى ەكەن», – دەيدى. «سايرام-وگەم» ۇلتتىق ساياباق قىزمەتكەرلەرى 2009 جىلدان باستاپ جابايى اڭداردى زەرتتەۋمەن اينالىسىپ كەلەدى ەكەن. وسى ارالىقتا ولار قار بارىسىنىڭ ءىزىن كورگەنىمەن ءوزىن كەزدەستىرە الماپتى. تابيعاتتىڭ تاكاپپار دا سۇلۋ جاراتىلىسى – قار بارىسىنىڭ قازاق جەرىنە ورالۋىن اتالعان قورىقتىڭ قىزمەتكەرلەرى ۇلكەن جەتىستىك دەپ سانايدى. وسى ورايدا, «سايرام-وگەم» جانۋارلار دۇنيەسى ءوسىمىن مولايتۋ ءبولىمىنىڭ باس مامانى فاريد حاليلوۆ دەگەن ازامات: «2013 جىلدىڭ قاراشا ايىنىڭ سوڭىندا مەملەكەتتىك قورىقشىلار قىرعيلى شاتقالىنان ونىڭ ءىز كورگەن. ءبىز قوندىرعىلاردى سول جاققا قاراي اۋىستىرىپ قويدىق. وسىلايشا تاۋعا بەتكەيلەپ شىعىپ بارا جاتقان قار بارىسىن قازىرگى ەلىمىزدىڭ تاريحىندا تۇڭعىش رەت بەينە كامەراعا ءتۇسىرىپ الدىق. بۇل 2014 جىلدىڭ 21 ناۋرىزى بولاتىن», – دەدى. سوڭعى جىلدارى پارك اۋماعىندا ادام اياعى باسپايتىن جەرلەردە عانا ءوسىپ كوبەيەتىن قاراتاۋ ارقارى, تاۋەشكى مەن ەلىك, ايۋ مەن كەمىرگىشتەردىڭ سانى ارتقان. مۇندا وتە سيرەك كەزدەسەتىن ۇلار مەن قارا لايلەك تە بار. 149 مىڭ گەكتار اۋماقتى الىپ جاتقان ۇلتتىق ساياباق اۋماعىندا قار بارىسىنىڭ تاعى ءبىر انالىعى مەن كۇشىگى مەكەندەيدى ەكەن. قورىقشىلار قار بارىسىنىڭ  قورەگى كوپ  اۋماقتا تۇراقتى مەكەندەپ, سانى كوبەيەتىنىنە سەنىمدى. جولدىباي بازار. دەرەككوز: «24kz». فوتو: Joyreactor.cc.