«وتكەن رەفەرەندۋمنىڭ قورىتىندىسى قازاقستاندىقتاردىڭ باسىم كوپشىلىگى پرەزيدەنتتىڭ جاڭعىرۋ باعىتىنداعى باستامالارىن قولدايتىنىن كورسەتتى. ازاماتتارىمىزدىڭ سايلاۋ ۋچاسكەلەرىنە كەلىپ, داۋىس بەرۋى – قاسىم-جومارت كەمەل ۇلى توقاەۆتىڭ باستامالارىنا دەگەن سەنىمىنىڭ جارقىن كورسەتكىشى. شىنىن ايتۋ كەرەك, ۇلكەن ءىس اتقارىلدى. ەل بولىپ جۇمىلىپ, رەفەرەندۋمدى ابىرويمەن اتقاردىق. وسى جۇمىستىڭ بەل ورتاسىندا وزدەرىڭىز دە جۇردىڭىزدەر. دەپۋتاتتار كۇنىنە 250-گە جۋىق كەزدەسۋ وتكىزدى. سىزدەر پرەزيدەنت رەفورمالارىن حالىققا تۇسىندىرۋگە زور ۇلەس قوستىڭىزدار», دەدى ە. قوشانوۆ ءماجىلىستىڭ جالپى وتىرىسىندا.
وسى ورايدا ول بۇل رەفەرەندۋمنىڭ ەل بولاشاعى ءۇشىن تاريحي ماڭىزى زور ەكەنىن, حالقىمىز ءوز تاعدىرىن ءوزى ايقىنداعانىن اتاپ ءوتتى.
«بىرلىگى بەكەم ەل ەكەنىن كۇللى الەمگە پاش ەتىپ, بولاشاققا نىق سەنىممەن قادام باستى. بىرلىك پەن سەنىم – «جاڭا قازاقستاننىڭ» نەگىزگى تىرەگى. حالقىمىزدا ەرتەڭگە دەگەن سەنىم بار, اۋىزبىرلىك بار, تاتۋلىق پەن تۇراقتىلىق بار. ەندىگى كەزەكتە, پرەزيدەنتىمىزدىڭ ماڭايىنا توپتاسىپ, وسى سەنىم مەن ىنتىماقتى ەسەلەي تۇسۋگە ءتيىسپىز. العا قويعان بيىك ماقساتتاردىڭ بارىنە بىرگە قول جەتكىزۋىمىز كەرەك. رەفەرەندۋم – «جاڭا قازاقستانعا» جول اشتى. ونى حالقىمىز جاقسى قابىلداعانىن كوردىك. حالىقارالىق جانە وتاندىق ساراپشىلار دا ناۋقاننىڭ ءادىل ءارى اشىق وتكەنىن ايتىپ, جاقسى پىكىر ءبىلدىرىپ جاتىر. بۇل – ۇلكەن ءىستىڭ باسى عانا. ءبىزدى بۇدان دا ماڭىزدى ءارى اۋقىمدى جۇمىس كۇتىپ تۇر», دەدى ءماجىلىس توراعاسى.
بۇدان سوڭ, ول كونستيتۋتسيالىق وزگەرىستەردى جۇزەگە اسىرۋ كەزەڭىنە كوشەتىنىمىزدى ايتتى.
«مەملەكەت باسشىسى قاسىم-جومارت كەمەل ۇلى توقاەۆ كەشەگى ۇندەۋىندە اتاپ وتكەندەي, كونستيتۋتسيالىق رەفورما قۇقىقتىق جۇيەنى تولىق جاڭعىرتۋعا مۇمكىندىك بەرەدى. سوندىقتان دەپۋتاتتار الەمدىك تاجىريبەنى ەسكەرە وتىرىپ, ءتيىمدى قۇقىقتىق جانە سوت جۇيەسىن قۇرۋ ءۇشىن ءتيىستى زاڭناماعا وزگەرىستەر ەنگىزۋى قاجەت. پرەزيدەنت زاڭنامادا مەملەكەتتىڭ تۇراقتى دامۋىنا كەدەرگى كەلتىرەتىن نورمالار بولماۋعا ءتيىس ەكەنىن ەرەكشە اتاپ ءوتتى. وسى ماسەلەگە دەپۋتاتتاردىڭ نازارىن اۋدارعىم كەلىپ وتىر. جالپى الداعى ۋاقىتتا كونستيتۋتسيالىق رەفورمالاردى ىسكە اسىرۋ ءۇشىن ءبىراز جۇمىس اتقارىلادى. كوپتەگەن زاڭنامالىق اكتىگە وزگەرىس ەنگىزۋ كەرەك. سوندىقتان مەملەكەت باسشىسىنىڭ سەنىمىن اقتاپ, ساياسي وزگەرىستەردى زاڭنامالىق تۇرعىدا ساپالى ءارى جەدەل ىسكە اسىرۋىمىز قاجەت», دەدى ە.قوشانوۆ.
