بيزنەس • 08 ماۋسىم، 2022

كاسىپكەر ايەلدەردىڭ قۇقىعى قورعالادى

25 رەت كورسەتىلدى

«بايتەرەك» حولدينگى بۇۇ-نىڭ ايەلدەردىڭ قۇقىقتارى مەن مۇمكىندىكتەرىن كەڭەيتۋ جونىندەگى باستاماسىنا قوسىلدى. ايەلدەردىڭ قۇقىقتارى مەن مۇمكىندىكتەرىن كەڭەيتۋ قاعيداتتارىنا قوسىلۋ تۋرالى مالىمدەمەگە حولدينگتىڭ باسقارما توراعاسى قانات شارلاپاەۆ قول قويدى.

وسىلايشا ۇلتتىق كومپانيا ايەلدەردىڭ قۇقىقتارى مەن مۇم­كىن­دىكتەرىن كەڭەيتۋ قاعيدات­تارىنىڭ (Women’s Empowerment Principles) جاھاندىق پلاتفورماسىندا ءساتتى تىركەلدى.

ءىس-شارا كەزىندە «بۇۇ-ايەل­دەر» قۇرىلىمىنىڭ قازاقستان­داعى وكىلى ماريا دوتسەنكو كوم­پا­نيالار مەن بيزنەس قۇرىلىمدار ارا­سىندا WEPs ىلگەرىلەتۋ بويىنشا قازاقستاننىڭ ورتالىق ازيادا كوشباسشى بولىپ تابى­لا­تىنىن اتاپ ءوتتى.

«پاندەميا بۇكىل الەمدەگى، سونىڭ ىشىندە قازاقستانداعى ەكو­نوميكا مەن بيزنەستىڭ دامۋى­نا ۇلكەن اسەر ەتتى. سوندىق­تان ءبىز «بايتەرەك» حولدين­گىنىڭ قازاقستانداعى العاشقى، پان­دەميادان كەيىنگى كەزەڭدە WEPs قاعيداتتارىنا قول قويعان باستاماسى اق جول اشىپ وتىر دەپ سانايمىز. ءبىز حولدينگتىڭ ايەل­دەردىڭ قۇقىقتارى مەن مۇمكىندىكتەرىن كەڭەيتۋ قاعي­دات­تارىنا قوسىلۋىن قۇپتاي وتىرىپ، ونىڭ دالەلدى ءىسى قازاقستاننىڭ باسقا كومپانيالارى ءۇشىن دە ۇلگى بولادى دەپ ۇمىتتەنەمىز، دەدى م.دوتسەنكو.

ءوز كەزەگىندە قانات شارلاپاەۆ حولدينگتە بۇۇ-نىڭ تۇراقتى دامۋ ماقساتتارىن ىسكە اسىرۋعا ەرەكشە كوڭىل بولىنەتىنىن اتاپ ءوتتى. «تۇراقتى دامۋ ماقساتتاردىڭ ماڭىزدى تۇسىنىڭ ءبىرى – گەن­دەر­لىك تەڭدىكتى قامتاماسىز ەتۋ جانە ايەلدەردىڭ قۇقىقتارى مەن مۇمكىندىكتەرىن كەڭەيتۋ. حول­دينگ ءوز قىزمەتىن جۇزەگە اسىرۋ كە­زىندە تەڭ مۇمكىندىكتەر بەرۋ قاعي­داتىن باسشىلىققا الادى جانە ءوز قىزمەتكەرلەرىن، ونىڭ ىشىن­دە گەندەرلىك بەلگىسى بويىن­شا كەمسىتۋگە جول بەرمەيدى. حولدينگتىڭ بۇۇ باستا­ما­سىنا قوسىلۋى گەندەرلىك تەڭ­دىك ماسەلەلەرى بويىنشا كورپو­را­تيۆتىك كوشباسشىلىقتى جوعارى دەڭگەيدە ودان ءارى قولداۋ بويىنشا ماڭىزدى قادام بولىپ تابىلادى»، دەپ اتاپ ءوتتى باسقارما توراعاسى.

قانات شارلاپاەۆ «بۇۇ-ايەلدەر» قۇرىلىمنىڭ اتقارۋشى دي­رەكتورىنىڭ ورىنباسارى انيتا بحاتيامەن كەزدەسۋ كەزىندە حول­دينگتىڭ تەك كومپانيا ىشىندە ەمەس، ەل كولەمىندە دە ايەلدەردى قولداۋ جونىندەگى قىزمەتى تۋرالى حاباردار ەتتى.

ونىڭ ايتۋىنشا، «بايتەرەك» ايەلدەر باستامالارى مەن كوش­باس­شىلىعىنا بارىنشا جاردەمدەسىپ كەلەدى. حولدينگتىڭ بىرىڭعاي كادر ساياساتىنا سايكەس 2022-2024 جىلدارعا ارنالعان KPI رەتىندە دامۋ جوسپارلارىنا «حولدينگ پەن ەنشىلەس ۇيىمداردىڭ باس­شى­لىعىنداعى ايەلدەر سانى» كورسەت­كىشى ەنگىزىلگەن. بۇدان بولەك، حولدينگتىڭ بىرىڭعاي كادر رە­زەرۆىنە ىرىكتەۋ كەزىندە قىز-كەلىن­شەكتەرگە باسىمدىق بەرىلەدى.

سونىمەن قاتار حولدينگ ومىردە قيىن جاعدايعا تاپ بول­عان ايەلدەرگە، كوپبالالى جانە از قامتىلعان وتباسىلاردا تار­بيە­لەنىپ جاتقان بالالارعا قايى­رىمدىلىق كومەك كورسەتەدى. «باي­تەرەك» حولدينگى قارجى ينستيتۋتى رەتىندە ايەلدەرگە ءوزىنىڭ ەنشىلەس ۇيىمدارى – «وتباسى بانك» اق جانە «دامۋ» كاسىپكەرلىكتى دامىتۋ قورى» اق ارقىلى «ۇماي» يپوتەكاسىن ۇسىندى، سونداي-اق، ايەل كاسىپكەرلەردىڭ جوبالارىن قارجىلاندىرۋعا قولداۋ كورسەتىپ كەلەدى.

ايتا كەتەيىك، WEPs قاعيدات­تارىنا قول قويۋ – كومپانيانىڭ گەندەرلىك تەڭدىكتى ىلگەرىلەتۋدەگى جانە ايەلدەردىڭ قۇقىقتارى مەن مۇمكىندىكتەرىن كەڭەيتۋدەگى مۇددەلىلىك پەن بەلسەندى ۇستانىم تۋرالى جاريا مالىمدەمەسى بولىپ تابىلادى. بۇگىنگى تاڭدا الەمدە 5 مىڭنان استام كومپانيا WEPs باستاماسىنىڭ قاتىسۋشىلارى بولىپ تابىلادى. ونىڭ ىشىندە 40-تان استام قازاقستاندىق كومپانيا دا بار.

سوڭعى جاڭالىقتار

تمد ءسامميتى قازان ايىندا وتەدى

پرەزيدەنت • بۇگىن، 19:56

بۇگىنگى ۆاليۋتا باعامى

قارجى • بۇگىن، 10:17

ەلىمىزدە 9،5 ملن ادام ەكپە سالدىردى

كوروناۆيرۋس • بۇگىن، 09:49

ۇقساس جاڭالىقتار