«داستارقاندىق پاتريوتيزم»

بەلگىلى جازۋشى ەستاي مىرزاحمەتوۆتىڭ ۇلى اباي مارقۇم ەلگە تانىمال كاسىپ­­كەر ەدى. بىردە سول كىسىمەن سۇحبات­تاسقانىمدا: «ءبىزدىڭ كوبىمىز ءۇي ىشىندە عانا پاتريوتپىز. ادەمى سويلەپ, ادەمى تىلەك ايتامىز. ال ءىس جۇزىنە كەلگەندە, بۇراۋ باسىن سىندىراتىنىمىز نەكەن-ساياق. بىزدىكى – «داستارقاندىق پاتريوتيزم» عوي...», دەگەن ەدى. اكەسىنەن شەشەندىك دارىعان ءبىرتۋار ازاماتتىڭ جادىمدا جاتتالىپ قالعان سوزدەرى قىزىلجار وڭىرىندە وتكەن سەنبىلىكتەن سوڭ ەسىمە قايتا ءتۇستى. راس, ەڭبەك ۇجىمدارىنىڭ ءبارى ءوز باسشىلارىنىڭ باس­تاۋىمەن قولدارىنا تىرناۋىش پەن كۇرەك ۇستاپ, كوشەگە شىعىپ, مەكەمەلەرىنىڭ ماڭايىن تارتىپكە كەلتىردى. ال تۇرعىن ۇيلەردىڭ ماڭى شە؟ وبلىس ورتالىعىنىڭ ءوزىم تۇرىپ جات­قان تۇسىنداعى كوپ پاتەرلى ۇيلەر­دىڭ كوبىنىڭ ماڭىنا ادام قولى تيمەي, قىستان كەيىنگى بىلىققان كۇيىندە جاتقاندىعىن بايقادىم. ال ءوزىم بولسام, مەكەمەدە وتكىزىلگەن سەنبىلىكتەن كەيىن وبلىستىق ءماسليحاتتىڭ دەپۋتاتى دەگەن دارداي اتاعىم بار ەكەنىن ويىما الىپ, وزىمنەن ءوزىم ۇيالعاندىقتان, كوپ پاتەرلى ءۇيىمنىڭ ماڭىنداعى قىستان قالعان قوقىستى جالعىز ءوزىم تازالاۋعا كىرىستىم. شاماسى, مەنىڭ بۇل ءىسىمدى ءوز پاتەرلەرىنىڭ تەرەزەلەرىنەن كورگەن بولۋلارى كەرەك, ءبىرازدان سوڭ بىرنەشە جاس جىگىت سىرتقا شىعىپ, جۇرگىنشىلەر جولىنىڭ ەكى جاعىندا شاشىلىپ جاتقان بوتەلكەلەر مەن تۇرمىستىق قالدىقتاردى جيناي باستادى. ءاپ-ساتتە ءۇيىمىزدىڭ ماڭايى تازارىپ شىعا كەلدى. ...توي-تومالاقتاردا جۇرتتىڭ الدىنا شىعىپ, اۋزىمىزدى تولتىرىپ: «...ەلىمىز كوركەيە بەرسىن!» دەپ كوسىلەتىنىمىز بار. ونداي ءسوز ايتۋعا مورالدىق قۇقىمىز بولۋى ءۇشىن ەڭ اۋەلى ءۇيىمىزدىڭ ماڭىن كوركەيتىپ العانىمىز ءجون ەمەس پە؟!. «داستارقاندىق پاتريوتيزم» دەگەن, مىنە, وسى ەكەن, اعايىن. كارىباي مۇسىرمان, سولتۇستىك قازاقستان وبلىستىق ءماسليحاتىنىڭ دەپۋتاتى. پەتروپاۆل.