ءىس-شارانىڭ مودەراتورى, تۇڭعىش پرەزيدەنت – ەلباسى كىتاپحاناسىنىڭ ديرەكتورى باقىتجان تەمىربولات العىسوزىندە كونستيتۋتسيالىق وزگەرىستەردىڭ رەسپۋبليكالىق رەفەرەندۋمى الداعى رەفورمالاردىڭ تۇراقتى تراەكتورياسىن ايقىندايتىنىن ايتتى. «مەملەكەت باسشىسى پرەزيدەنتتىك قىزمەتىنىڭ العاشقى كۇندەرىنەن باستاپ قوعامنىڭ ءوزىن ءوزى ۇيىمداستىرۋ تەتىكتەرىن بەلسەندى تۇردە ىلگەرىلەتىپ كەلەدى. كونستيتۋتسيالىق وزگەرىستەر ازاماتتىق جاۋاپكەرشىلىكتى ارتتىرۋعا مۇمكىندىك بەرەدى», دەپ اتاپ ءوتتى ول.
ال ل.ن.گۋميلەۆ اتىنداعى ەۇۋ پروفەسسورى, كونستيتۋتسياعا وزگەرىستەر ەنگىزۋ بويىنشا ۇسىنىستار ازىرلەۋ جونىندەگى جۇمىس توبىنىڭ مۇشەسى ەرمەك ءابدىراسۇلوۆ رەفەرەندۋمنىڭ ازاماتتاردىڭ ەرىك ءبىلدىرۋىنىڭ, ولاردىڭ مەملەكەتتىك باسقارۋعا تىكەلەي قاتىسۋىنىڭ ماڭىزدى ۇلگىسى ەكەنىن العا تارتتى. «كونستيتۋتسياعا ەنگىزىلمەك وزگەرىستەر مەن تولىقتىرۋلار «مىقتى پرەزيدەنت – ىقپالدى پارلامەنت – ەسەپ بەرەتىن ۇكىمەت» ۇلگىسىن ۇستاناتىن ەكىنشى رەسپۋبليكاعا اينالۋعا باعىتتالعان. كەشەندى وزگەرىستەر قوعامدىق قاتىناستاردىڭ بارلىق سالالارىنا اسەر ەتەدى», دەدى بۇل جايىندا ساراپشى.
جيىندا ءسوز تىزگىنىن العان Amanat پارتياسى قوعامدىق ساياسات ينستيتۋتىنىڭ ديرەكتورى, ساياسي عىلىمداردىڭ كانديداتى ءمادينا نۇرعاليەۆا ەلىمىز باسىنان وتكەرىپ جاتقان تاريحي كەزەڭدە ەۆوليۋتسيالىق دامۋ مەن ساياسي سانا-سەزىمنىڭ ارتۋى كوپتەگەن شەشىمدەردى پارلامەنت ارقىلى ەمەس, جالپىحالىقتىق داۋىس بەرۋ ارقىلى قابىلداۋعا مۇمكىندىك بەرەتىنىنە نازار اۋداردى.
«الەمنىڭ قۇبىلمالى احۋالى مەن جىلدام وزگەرەتىن گەوساياسي جاعدايىندا, زاماننىڭ جاڭا تالاپتارى مەن سىن-قاتەرلەرى تۇسىندا وتكىزىلەتىن رەفەرەندۋم مەملەكەتتى ساياسي تۇرعىدان تۇبەگەيلى جاڭعىرتۋدى جەدەلدەتىپ, تالاپتارعا ساي بولۋدى قامتاماسىز ەتەدى. كوز الدىمىزدا بيلىك پەن قوعام اراسىنداعى قارىم-قاتىناس پەن ءوزارا ارەكەتتەسۋدىڭ جاڭا ۇلگىسى قالىپتاسىپ كەلەدى», دەدى جيىندا ويىن ورتاعا سالعان مەملەكەت تاريحى ينستيتۋتى ديرەكتورى, تاريح عىلىمدارىنىڭ دوكتورى ەركىن ءابىل.
دوڭگەلەك ۇستەل بارىسىندا نۇر-سۇلتان قالاسى ءماسليحاتىنىڭ دەپۋتاتى, G-Park كومپانياسىنىڭ باس ديرەكتورى عابيت ساتماعامبەتوۆ, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى عازيز تەلەباەۆ, پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتى ساياسي زەرتتەۋلەر ءبولىمىنىڭ باسشىسى ەرمەك توقتاروۆ, Astana IT University پروفەسسورى ساۋلە مامىتوۆا, قوعامدىق-ساياسي جانە الەۋمەتتىك ماسەلەلەر جونىندەگى ساراپشى ساعىنتاي بەرداعۇلوۆا بايانداما جاساپ, دەموكراتيالىق وزگەرىستەردىڭ باعىتتارىنا جان-جاقتى توقتالدى.
پىكىرتالاستى قورىتىندىلاي كەلە, مودەراتور ب.تەمىربولات دوڭگەلەك ۇستەلگە قاتىسۋشىلارعا العىسىن ءبىلدىرىپ, ەلىمىز ءۇشىن وسىنداي تاعدىرشەشتى ۋاقىتتا ەشكىم دە شەتتە قالماۋى ءتيىس ەكەنىن جانە اركىم ءوزىنىڭ تاريحي تاڭداۋىن جاساي الاتىنىن اتاپ ءوتتى.
