نەسيەلەندىرۋدى باستادى

«قازاگرو» ۇلتتىق باسقارۋشى حولدينگىنىڭ ەنشىلەس كومپانياسى – اۋىل شارۋاشىلىعىن قارجىلاي قولداۋ قورى – «ەگىنجاي» باعدارلاماسى بويىنشا اگروونەركاسىپ كەشەنى سۋبەكتىلەرىنە كوكتەمگى دالا جۇمىستارىنا نەسيەلەر بەرە باستادى. باعدارلاما 2010 جىلى اشىلىپ, شاعىن جەر تەلىمدەرى بار فەرمەرلىك شارۋاشىلىقتار, شارۋا قوجالىقتارى, جەكە ازاماتتاردى قول­داۋعا باعىتتالعان. ءۇش جىلدىڭ ىشىندە اۋىل شارۋاشىلىعىن قارجىلاي قولداۋ قورى 2,7 ملرد. تەڭگەگە 1 مىڭنان استام جوبانى ءوز قارا­جاتىنان قارجىلاندىردى. سونىمەن قاتار, تارتىلعان قاراجاتتان ماقتا وسىرەتىن اۋىلشارۋاشىلىق تاۋار وندىرۋشىلەرىنە «ىرىس» شاعىن نەسيە ۇيىمى ارقىلى 1 ملرد. تەڭگە ءبولىندى. اوك سۋبەكتىلەرىن قولداۋ كەلەسى تالاپتارمەن جۇزەگە اسىرىلۋدا: نەسيەنىڭ سوماسى 6 ملن. تەڭگەگە دەيىن بولسا, جىلدىق سىياقى ۇستەمەسى – 9,5%, ءتيىمدى سىياقى ۇستەمەسى 10,2%-عا دەيىن. نەسيەنى قايتارۋ ەكى استىقتى ساتۋدان كەيىن قاراستىرىلعان, بۇل اۋىلشارۋاشىلىق تاۋار وندىرۋشىلەرى ءۇشىن وتە ماڭىزدى جەڭىلدىك. قازاقستاننىڭ وڭتۇستىك ايماقتارىنداعى شارۋالار جاقىن ارادا ەگىس ناۋقانىن باستاۋعا دايىن. قوردىڭ وڭتۇستىك قازاقستان فيليالى «ەگىنجاي» باعدارلاماسى بويىنشا ناۋرىزدىڭ ءبىرىنشى كۇندەرى 8,5 ملن. تەڭگەگە 2 جوبانى قارجىلاندىرىپ, تاعى 2 ءوتىنىمدى قاراستىرۋدا. اعىمداعى جىلى وبلىستا كوكتەمگى-دالا جانە كۇزگى جيىن-تەرىم جۇمىستارىنا 50 ملن. تەڭگە باعىتتالادى دەپ جوسپارلاندى. جالپى, 2014 جىلى اۋىل شارۋاشىلىعىن قارجىلاي قولداۋ قورى تاراپىنان كوكتەمگى-دالا جانە كۇزگى جيىن-تەرىم جۇمىستارىنا 1,6 ملرد. تەڭگە بولىنەدى دەپ جوسپارلانعان. «اۋىل شارۋاشىلىعىن قارجىلاي قولداۋ قورى» اكتسيونەرلىك قوعامى – «قازاگرو» ۇلتتىق باسقارۋشى حولدينگى» اق قۇرامىنا كىرەتىن مامانداندىرىلعان قارجى-نەسيە­لىك ۇيىم بولىپ تابىلادى. قازاقستان رەس­پۋب­ليكاسى قارجى نارىعىن جانە قارجى ۇيىمدارىن رەتتەۋ مەن قاداعالاۋ اگەنتتىگىنىڭ بانكتىك قارىز وپەراتسيالارىن جۇزەگە اسىرۋعا ليتسەنزياسى بار. قوردىڭ نەگىزگى مىندەتى – قارجىلىق قىزمەتتەر مەن رەسۋرستارعا اۋىل تۇرعىندارىنىڭ قولجەتىمدىلىگىن ارتتىرۋ. «ەگەمەن-اقپارات».