بۇگىن, 17 ءساۋىر كۇنى قازاقستان پارلامەنتى ءماجىلىس سپيكەرى قابيبوللا جاقىپوۆ رەسەي فەدەراتسياسىنىڭ سانكت-پەتەربۋرگ قالاسىندا وتكەن ەۋرازەق پارلامەنتارالىق اسسامبلەياسى جيىنىندا وسى ۇيىمنىڭ توراعاسى بولىپ سايلاندى. بۇل تۋرالى ءماجىلىستىڭ ءباسپاسوز قىزمەتى حابارلادى.
«قازاقستان اتالعان ۇيىمنىڭ دامۋىنا, بەدەلىنىڭ وسۋىنە ايرىقشا ۇلەس قوستى, ناتيجەسىندە ءبىزدىڭ ەلىمىز ەكى مەرزىم قاتارىنان ەۋرازەق پاا-عا توراعالىق ەتىپ وتىر. پلەنارلىق وتىرىسقا ەكولوگيا جانە ونەركاسىپتىك قاۋىپسىزدىك, الەۋمەتتىك سالالاردا ەۋرازەق مۇشە-مەملەكەتتەردىڭ ۇلتتىق زاڭنامالارىن ۇندەستىرۋ, ەۋرازەق مۇشە-مەملەكەتتەر اۋماعىنا شەتەلدىكتەردىڭ كەلۋ ءتارتىبىن رەتتەۋ سىندى ماسەلەلەر ەنگىزىلدى», - دەلىنگەن حابارلامادا.
اسىرەسە, الەۋمەتتىك زاڭنامالاردى ۇندەستىرۋ, ناقتىلاي ايتاتىن بولساق, «اتاۋلى الەۋمەتتىك كومەك تۋرالى», «مەملەكەتتىك الەۋمەتتىك ساقتاندىرۋ نەگىزدەرى تۋرالى» زاڭنامالىق قۇجاتتار جوباسىنا باسا نازار اۋدارىلدى.
ەۋرازەق پارلامەنتارالىق اسسامبلەياسىنىڭ ماڭىزدىلىعىنا توقتالعان ءماجىلىس توراعاسى قابيبوللا جاقىپوۆ ۇيىم قىزمەتىنىڭ ەۋرازەق مۇشە-مەملەكەتتەر زاڭدارىن ۇندەستىرۋگە, ينتەگراتسيانىڭ ەكونوميكالىق اسپەكتىلەرىن دامىتۋعا, سونداي-اق, ازاماتتاردىڭ الەۋمەتتىك ءال-اۋقاتىن جاقسارتۋعا باعىتتالعانىن اتاپ ءوتتى.
الەۋمەتتىك زاڭنامالىق قۇجاتتاردىڭ ۇلگىلىك جوباسىن قاراۋ ەۋرازيالىق ەكونوميكالىق قاۋىمداستىق اياسىندا حالىقتى الەۋمەتتىك قورعاۋدىڭ ورتاق ۇستانىمدارىن ازىرلەۋ قاجەتتىلىگىنە نەگىزدەلگەن.
ساكەن مايلىباي.
دەرەككوز: پارلامەنت ءماجىلىسىنىڭ ءباسپاسوز قىزمەتى.
فوتو: oralinform.kz.
