قاراعاندىلىق بالانى ديەتامەن ۇستاۋ ءۇشىن جىلىنا 2,2 ملن. تەڭگە قاجەت

قاراعاندى قالاسىنىڭ 5 جاسار تۇرعىنى بەيبىت بەكنازاروۆ گەنەتيكالىق اۋرۋ تۇرلەرىنىڭ ىشىندەگى ەڭ سيرەك كەزدەسەتىنىنە (گوموتسيستينۋريا) دۋشار بولعان ەلىمىزدەگى جالعىز بالا. ونىڭ مي جانە جۇرەك-قان تامىرلارىنىڭ جۇمىسىنا كادىمگى تاعامدار كەرى اسەرىن تيگىزۋى ابدەن مۇمكىن. بۇل تۋرالى «ەكسپرەسس ك» حابارلادى. بالانى امان ساقتاۋدىڭ ءبىر جولى – ونى ءومىر بويى ديەتا بويىنشا قورەكتەندىرۋ. بىراق ول ءۇشىن مول قارجى كەرەك. بەيبىت - وتباسىنىڭ ءتورتىنشى پەرزەنتى. وعان بۇل دياگنوز 2014 جىلدىڭ اقپانىندا اقش-تىڭ چيكاگو قالاسىنداعى دياگنوستيكالىق زەرتحانادا قويىلعان. قاراعاندى وبلىسىنىڭ باس بالالار دارىگەرى ناتاليا دۇيسەمباەۆانىڭ ايتۋىنشا, ازىرگە بالاعا دياگنوز قويىلعانىمەن, ونىڭ ەمى تابىلماي وتىر. بالانى ديەتا بويىنشا تاماقتاندىرۋ ءۇشىن ارنايى امينقىشقىلمەن بايىتىلعان ۇنتاق جانە مەيىلىنشە ەمدىك قاسيەتتەرى مول ازىق-ت ۇلىكتەر كەرەك. ال مۇنداي قورەكتىڭ ءبىر قۇتىسى 80 مىڭ تەڭگە تۇرادى. دەمەك, بەيبىتتىڭ ديەتالىق تۇرعىدا تاماقتاندىرۋ ءۇشىن 2,2 ملن. تەڭگە قاجەت. وسىعان بايلانىستى قاراعاندى وبلىستىق دەنساۋلىق ساقتاۋ باسقارماسى اتالمىش وبلىستىڭ دەپۋتاتتارىنا وتىنىشپەن شىقتى. بۇل وتىنىشتە بەيبىتكە قاجەتتى ديەتالىق تاعامدى حالىققا تەگىن بەرىلۋى ءتيىس ءدارى-دارمەكتەردىڭ تىزىمىنە ەنگىزۋ سۇرالعان. بۇل حاباردى ەستىگەن وبلىستىق ءماسليحات دەپۋتاتتارى جەدەل تۇردە ءۇن قاتتى. دەپۋتاتتار وسى جاعدايعا بايلانىستى وبلىستىق ءماسليحاتتىڭ كەزەكتەن تىس سەسسياسىن شاقىرىپ, ءتيىستى قۇجاتتارعا وزگەرتۋلەر ەنگىزدى. ناتيجەسىندە بەيبىت ءومىر بويى اعزاسىنا قاجەتتى, قۇنى قىمبات ديەتالىق تاعاممەن قامتاماسىز ەتىلەتىن بولدى. جولدىباي بازار. دەرەككوز: «ەكسپرەسس ك». فوتو: Strongside.ru.