باتىس قازاقستاندا ءۇش ادام قاققان ەكس-شەنەۋنىككە كەشىرىم جاسالدى

كولىگىمەن ءۇش ادامدى قاعىپ, ىلە ءىزىن جاسىرماق بولعان باتىس قازاقستان وبلىسى تەرەكتى اۋدانى اكىمىنىڭ بۇرىنعى ورىنباسارى ابزال بىراليەۆ اكىمشىلىك جاۋاپكەرشىلىككە تارتىلدى. بۇل تۋرالى «قازاقپارات» حابارلادى. باتىس قازاقستان وبلىسى ىشكى ىستەر دەپارتامەنتى اكىمشىلىك باسقارماسىنىڭ تاراتقان مالىمەتىنە قاراعاندا, كىنالىگە ءۇش جابىرلەنۋشى دە كەشىرىم بەرگەن. ولار سوت-مەديتسينالىق ساراپتامادان وتۋدەن باس تارتىپ, وزدەرىنىڭ بىراليەۆكە قويار ەشقانداي تالاپتارى جوق ەكەنىن جەتكىزگەن. كولىككە قاعىلعان ۇشەۋدىڭ ءبىرى – 9 جاسار بالا ەكەن. جابىرلەنۋشىلەردىڭ جۇمساق كوڭىلىنىڭ ارقاسىندا ا.بىراليەۆ قر اكىمشىلىك قۇقىقبۇزۋشىلىق كودەكسىنىڭ 467-بابى 3-ءبولىمى  جانە 469-بابى  بويىنشا اكىمشىلىك جاۋاپكەرشىلىككە تارتىلدى. بۇل باپتاردا كولىكتى ماس كۇيىندە باسقارۋ, جول-كولىك وقيعاسىن جاساۋ جانە جول-كولىك وقيعاسى بولعان جەردەن بوي جاسىرۋ سەكىلدى ماسەلەلەر قارالاتىنىن ەسكەرتە كەتەيىك. ەستەرىڭىزگە سالساق, ا.بىراليەۆ 6 ءساۋىر كۇنى «تويوتا كامري 50» ماركالى كولىگىن ماس كۇيىندە باسقارىپ, سونىڭ كەسىرىنەن  ۇش بىردەي ادامدى قاعىپ كەتكەن-ءدى. وسى وقيعادان كەيىن ول «نۇر وتان» پارتياسى قاتارىنان شىعارىلىپ ءارى جانە قىزمەتىنەن بوساعان. جولدىباي بازار. دەرەككوز: «قازاقپارات». فوتو: Tengrinews.kz.