پرەمەر-ءمينيستردىڭ ايتۋىنشا, قازىر سۋ شارۋاشىلىعى نىساندارىن تسيفرلاندىرۋ مەن اۆتوماتتاندىرۋدىڭ جول كارتاسى دا بار. بىراق, شەنەۋنىكتەر مەن وسى سالاداعى مامامانداردىڭ سالعىرتتىعىنان ەگىستىكتەرگە تارتىلاتىن سۋدىڭ 40-ى دالاعا كەتىپ جاتقان كورىنەدى.
«اۋىل شارۋاشىلىعىنا ارنالعان سۋدىڭ نەبارى 60 پايىزى عانا ەگىس القاپتارىنا دەيىن جەتەدى. قالعان بولىگى ينفراقۇرىلىمنىڭ ناشارلىعىنان دالاعا كەتەدى», دەدى ءاليحان سمايىلوۆ.
ونىڭ ايتۋىنشا, سۋدى ۇنەمدەمەسە, قازاقستاننىڭ وڭتۇستىك وڭىرلەرى كوپ ۇزاماي سۋ تاپشىلىعىنا تاپ بولادى.
«قازاقستانداعى 8 سۋ شارۋاشىلىعى باسسەينىنىڭ 7-ەۋى باستاۋىن ترانسشەكارالىق وزەندەردەن الادى. ياعني, وزەن سۋلارىنىڭ تەڭ جارتىسىنا جۋىعى سىرتتان كەلەدى. ساراپشىلار 2040 جىلعا قاراي قازاقستاندا سۋدى تۇتىنۋ كولەمى 56 پايىزعا دەيىن وسەدى دەپ بولجاپ وتىر. سۋ تاپشىلىعى جىلىنا 12 تەكشە شاقىرىمعا دەيىن جەتۋى ىقتيمال. ونىڭ ۇستىنە بىز قازاقستانداعى وزەندەردىڭ تارتىلىپ بارا جاتقانىن كورىپ وتىرمىز. بۇل الداعى ۋاقىتتا ەلىمىزدىڭ وڭتۇستىك وڭىرلەرى سۋ تاپشىلىعىنىڭ زاردابىن تارتادى دەگەندى بىلدىرەدى», دەدى ول ۇكىمەت وتىرىسىندا.
ءوز كەزەگىندە اۋىل شارۋاشىلىعى ءمينيسترى ەربول قاراشوكەەۆ بۇل ماسەلەنى شەشۋ ءۇشىن شارۋالاردى ىنتالاندىرۋ باعدارلاماسى بار ەكەنىن العا تارتتى.
«سۋارمالى ەگىنشىلىكتى دامىتۋ سۋارۋدىڭ سۋ ۇنەمدەۋ تەحنولوگيالارىن كەڭىنەن ەنگىزۋ ارقىلى قامتاماسىز ەتىلەدى. ماسەلەن شارۋالاردى زاماناۋي سۋ ۇنەمدەۋ تەحنولوگيالارىن قولدانۋعا ىنتالاندىرۋ ماقساتىندا زاماناۋي سۋارۋ جۇيەسىن ساتىپ الۋعا جانە قاجەتتى بۇكىل ينفراقۇرىلىمدى جۇرگىزۋگە جۇمسالعان شىعىنداردىڭ 50% وتەۋدى كوزدەيتىن ينۆەستيتسيالىق سۋبسيديالاۋ تۇرىندەگى مەملەكەتتىك قولداۋ بار. بۇل ماقساتتار ءۇشىن وبلىستاردىڭ وتىنىمدەرى بويىنشا بيىل 268 جوبانى ىسكە اسىرىلادى, وعان 16,6 ملرد تەڭگە كوزدەلگەن», دەدى قاراشوكەەۆ.
