يراندىقتار ەكسپو-2017 كورمەسىنە قىزىعۋشىلىق ءبىلدىردى

ءساۋىردىڭ 16-سى كۇنى قازاقستان سىرتقى ىستەر ءمينيسترىنىڭ ءبىرىنشى ورىنباسارى - ەكسپو-2017 كوميسسارى ءراپىل جوشىباەۆ يراننىڭ Tejarat Almas حولدينگىنىڭ باسشىلىعىمەن كەزدەستى. بۇل تۋرالى «ەكسپو-2017» ۇك» اق ءباسپاسوز قىزمەتى حابارلادى. كەزدەسۋ بارىسىندا يراندىق دەلەگاتسياعا ەكسپو-2017 جوباسى تانىستىرىلدى. سونىمەن قاتار تاراپتار تۋريزم جانە قۇرىلىس سالاسىنا ينۆەستيتسيا تارتۋ ماسەلەلەرىن تالقىلادى. ءراپىل جوشىباەۆ ەكسپو جوباسىنا شەتەلدىك كاپيتالدى قاتىستىرۋدى ىنتالاندىرۋعا بايلانىستى قازاقستاندىق جاقتىڭ جاساپ جاتقان شارالارى مەن قازاقستاننىڭ تۋريستىك قابىلەتى جايىندا ەگجەي-تەگجەيلى اڭگىمەلەپ بەردى. Tejarat Almas حولدينگى 150-گە جۋىق كومپانيانى بىرىكتىرەتىن كوپ سالالى مەكەمە بولىپ تابىلادى. ول تۇرعىن ءۇي, وفيستىك عيماراتتار سالۋ, ءىت تەحنولوگيالار جانە تۋريستىك بيزنەس سالالارىندا جۇمىس ىستەيدى. جىلدىق قارجى اينالىمى - 3,5 ملرد. اقش دوللارىنان استام. كەزدەسۋ قورىتىندىسى بويىنشا تاراپتار ەكسپو نىساندارىنا ينۆەستيتسيا سالۋ ماسەلەسىن تەرەڭىرەك زەرتتەۋگە ۋاعدالاستى. مۇرات ايتقوجا. دەرەككوز: «ەكسپو-2017» ۇك» اق ءباسپاسوز قىزمەتى. فوتو: «ەكسپو-2017» ۇك» اق ءباسپاسوز قىزمەتى.