بىلىكتىلىك پەن ماشىق سىنعا تۇسكەن ءسات

قازاقستان قارۋلى كۇشتەرى تاريحىندا دەسانتشىلار تۇڭعىش رەت تۇنگى جاعدايدا سۋ كەدەرگىلەرىن ەڭسەرە وتىرىپ ءجۇرىپ ءوتتى

قازاقستان قارۋلى كۇشتەرىنىڭ تاريحىندا اەروۇتقىر اسكەرلەرى تۇڭعىش رەت تۇنگى جاعدايدا سۋدان ءوتۋ قيمىلدارىن جۇزەگە اسىردى. 200-دەن استام اۋىر جانە دوڭگەلەكتى تەحنيكا شىنايى جاۋىنگەرلىك جاعدايدا سۋ كەدەرگىلەرىن كەسىپ ءوتتى. وسى ماقسات ءۇشىن ينجەنەرلىك بولىمشەلەر ىلە وزەنىنە پونتوندى كوپىر قويدى. ءتۇن قاراڭعىلىعىندا وسى كوپىردەن ارتيللەريانىڭ سۇيەمەلدەۋى ارقىلى دەسانتتى-شابۋىلداۋشى بولىمشەلەردىڭ تەحنيكالارى ءجۇرىپ ءوتتى. وزەننەن ءوتۋ قيمىلدارى اەرو­ۇتقىر اسكەرلەرىنىڭ ءبولىم­شەلەرى قاتىسقان بريگادالىق-تاكتيكالىق وقۋ-جاتتىعۋلار شەڭ­بەرىندە جۇرگىزىلدى. وسىنىڭ الدىندا عانا تاڭعى ساعات التىدا 4 گارنيزوننىڭ بريگادالارى دابىل بويىنشا كوتەرىلگەن بولاتىن. بىرنەشە شاقىرىمدىق مارش جاساعان بولىمشەلەر ىلە وزەنىنەن ءوتۋ ءۇشىن لەكتەردى جاساقتاۋ اۋدانىنا توپتاستى. وسىمەن ءبىر مەزگىلدە بريگادالىق-تاكتيكالىق وقۋ-جاتتىعۋعا قاتىسۋشىلار پاراشيۋت ارقىلى تىكۇشاقتان دەسانت ءتۇسىرۋدى جۇزەگە اسىردى. تۇنگى جاعدايدا وزەننەن سوعىسا ءجۇرىپ ءوتۋ جەكە قۇرامعا بىلىكتەرى مەن ماشىقتارىن سىناقتان ءوت­كىزۋگە, ال اەروۇتقىر اسكەرلەرىنىڭ باسشىلىعىنا اسكەرلەر توبىن باسقارۋدا ماسەلەلەردى پىسىقتاۋعا مۇمكىندىك بەردى. بولىمشەلەردىڭ ءوزارا ناقتى ءىس-قيمىلدارى جانە ولاردىڭ شوعىرلانۋى, اسكەرلەردى ساۋاتتى باسقارۋ وقۋ-جاتتىعۋدىڭ وسى كەزەڭىنىڭ جوعارى دەڭگەيدە وتۋىنە مۇمكىندىك بەردى. سونىمەن قاتار, جەكە قۇرام مەن تەحنيكانى جاۋىنگەرلىك ماقساتتاعى اۋدانعا دەر كەزىندە جەتكىزۋدى قامتاماسىز ەتە الدى. وقۋ-جاتتىعۋدىڭ بۇل كەزەڭى «Skylark» ۇشۋ اپپاراتىن پايدالانۋمەن جۇزەگە استى. بارلاۋدىڭ قازىرگى زامانعى تەحنيكالىق قۇرال­دارىن قولدانۋ جەردەگى تەحنيكانى تارتپاي-اق جانە جەكە قۇرامنىڭ ومىرىنە ەش قاۋىپ توندىرمەي قاجەتتى اقپاراتتىڭ ۇلكەن كولەمىن الۋعا مۇمكىندىك بەرەدى. بريگادالىق-تاكتيكالىق وقۋ-جاتتىعۋلارى قازاقستان رەس­پۋب­ليكاسى قارۋلى كۇشتەرى قۇرلىق اسكەرلەرىنىڭ جاۋىنگەرلىك دايارلىق جوسپارىنا سايكەس وتۋدە. قازىرگى ۋاقىتتا 2,5 مىڭ ادامنان تۇراتىن اسكەرلەر توبى مەن 500-دەن استام اسكەري تەحنيكا ال­ماتى وبلىسىنداعى كوكتال پوليگونىنا شوعىرلاندى. وقۋ-جاتتىعۋدىڭ شەشۋشى كەزە­ڭى بارىسىندا اەروۇتقىر اسكەر­لەرىنىڭ بولىمشەلەرى شارتتى قارسىلاستى قور­شاۋ جانە جويۋ سياقتى ارنايى اسكەري قيمىلداردى جۇرگىزەتىن بولادى. «ەگەمەن-اقپارات».