سالىق مەجەسى – 1,5 تريلليون تەڭگە

الماتى قالاسىنىڭ سالىق قىزمەتى ۇستىمىزدەگى جىلدىڭ ءبىرىنشى توقساندىق ەسەبىن پىسىقتادى. جيناقتالعان دەرەككە ساي, جىل باسىنان بەرى قالا قازانىنا تۇسكەن 295,2 ميلليارد تەڭگەنىڭ 249,2 ميللياردى سالىق قىزمەتىنىڭ ۇلەسىنە تيەسىلى. قالا اكىمى احمەتجان ەسىموۆ ەلباسى نۇرسۇلتان نازارباەۆتىڭ تاپسىرماسى بويىنشا ەلدەگى شاعىن جانە ورتا بيزنەستى قولداۋ ءۇشىن جانە نەسيەلەۋ ماقساتىندا بانك جۇيەسىن دامىتۋ, سونداي-اق, ۇدەمەلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسىن ىلگەرى باستىرۋ ءۇشىن  ۇلتتىق بانكتەن قارجى بولىنەتىنىن ايتا كەلىپ, الماتى قالاسىنىڭ قارجىلىق الەۋەتىنە توقتالىپ ءوتتى. «الماتى قالاسى ىسكەرلىك پەن كاسىپكەرلىكتىڭ قايناعان كوزى رەتىندە مەملەكەت تاراپىنان قاراستىرىلعان قارجىنىڭ بەلگىلى ءبىر بولشەگى كەلەشەكتە ءبىزدىڭ قالامىزعا بولىنەتىنىن ەسكەرگەن ءجون. سوندىقتان دا, ۇلتتىق قوردان قاراستىرىلىپ وتىرعان قاراجات ەل ەكونوميكاسىنا قىزمەت ەتىپ, جاڭا جۇمىس ورىندارىن اشۋ مەن سالىقتى ۋاقىتىلى تولەۋ ارقىلى مەملەكەتتىڭ قازانىنا ورنىمەن قايتارىلۋى ءتيىس. الماتى قالاسى بويىنشا سالىق قىزمەتىنىڭ الدىنا قويىلعان مەجە – 1,5 تريلليون تەڭگە, دىتتەگەن ۋاقىتتا ورىندالۋى كەرەك»,  دەدى قالا اكىمى ا.ەسىموۆ. قالا ەكونوميكاسىن دامىتۋ تاسىلدەرىن تىلگە تيەك ەتكەن قالا باسشىسى سالىق قىزمەتىنىڭ ساپاسىن ارتتىرۋعا نازار اۋدارتتى. ونىڭ ايتۋىنشا, قالاداعى پاتەرىن جالعا بەرۋشىلەر مەن بازارلاردا ساۋدا جاساۋشىلار, كوشەلەردەگى جارناما تاقتايشالارى مەن تمد ەلدەرىنەن كەلەتىن جۇمىس كۇشىن زاڭداستىرۋعا جانە سالىق تولەۋگە جۇمىلدىرۋ كەرەك. قانات ەسكەندىر, «ەگەمەن قازاقستان». الماتى.