القاپ دابىلى الىس ەمەس

بىلتىر ەگىنشىلىك ءتۇسىمىن رەكوردتىق كورسەتكىشكە جەتكىزگەن اقمولا وبلىسىنىڭ ديقاندارى ۇستىمىزدەگى جىلى دا بيىك مەجەدەن كورىنۋ قامىندا. قىسقى اگروتەحنيكالىق شارالاردىڭ جۇمىس كەستەسىنە ساي جۇرگىزىلۋى, ونىمدىلىگى جوعارى تۇقىمنىڭ جەتكىلىكتى قامتاماسىز ەتىلۋى, اسىرەسە, ماشينا-تراكتور پاركىنىڭ بۇرىن بولماعان دەڭگەيدە جاڭعىرتىلۋى جاقسى ۇمىتكە جەتەلەپ وتىر. بيىل قىس قىتىمىرلاۋ مىنەز تانىتىپ, كوكتەم ۇزاققا سوزىلىپ تۇرعانىمەن, تاۋەكەلشىل ايماقتىڭ ديقاندارى تالاي سىنعا قارسى تۇرىپ داعدىلانعان, دەيدى وبلىستىق اۋىل شارۋاشىلىعى باسقارماسىنىڭ باسشىسى امانبەك قالجانوۆ. ياعني, باستى ناۋقانعا دايىندىق جامان ەمەس. ۇيىمدىق شارالار دا الدىن الا پىسىقتالدى. بيىل 4,7 ميلليون گەكتار ەگىستىك القاپتىڭ 4,2 ميلليون گەكتارىنا ءداندى جانە بۇرشاقتى داقىلدار سەبىلەتىن بولادى. پارلى القاپتار اۋقىمىنىڭ كەڭۋى, اۋىسپالى ەگىس پەن ىلعال ساقتاۋ تەحنولوگياسىنىڭ جاپپاي قولدانىسقا ەنگىزىلۋى جۇمىس تيىمدىلىگى مەن تۇپكى قايتارىمدى ەسەلەيتىنى انىق. امانبەك ءامىرحامزا ۇلىنىڭ ايتۋىنشا, ەگىستىك القاپتارىنىڭ قۇرىلىمىندا ءارتاراپتاندىرۋ باعىتى ودان ءارى جالعاسىن تاپپاق. الدىمىزداعى ناۋقاندا 271,1 مىڭ گەكتار جەرگە مايلى داقىلدار تۇقىمى سەبىلەدى. بۇل – بىلتىرعى جىلعى دەڭگەيدەن 20 مىڭ گەكتارعا جۋىق ارتىق. وسى ورايدا, اۋىل شارۋاشىلىعىنداعى ينتەگراتسيالىق ىقپالداستىقتىڭ ورىستەۋى ءتيىستى ناتيجەسىن بەرەدى دەگەن سەنىم بار. وبلىستا كانادانىڭ, گەرمانيانىڭ عالىمدارى كوپ جىلداردان بەرى تاجىريبە سىناقتارىن وتكىزىپ, ونىمدىلىگى جوعارى بۇرشاق داقىلدارىن جەرسىندىرۋدە يگى ىستەر اتقاردى. بيىلدىڭ وزىندە كانادا ەلشىسى مەن پروۆينتسيا باسشىلارى باسقارعان دەلەگاتسيا كوكشەتاۋعا ەكى رەت كەلىپ كەتتى. ولار «رودينا» اگروفيرماسىنداعى ايماقتىق كەڭەستە وي-پايىمدارىن ورتاعا سالىپ, ينتەگراتسيالىق بايلانىستار شەڭبەرىن كەڭەيتۋگە ىقىلاستى ەكەندىكتەرىن ءبىلدىردى. سونداي-اق, وبلىس اكىمى قوسمان ايتمۇحامەتوۆ باستاعان دەلەگاتسيا بەلارۋس رەسپۋبليكاسىنداعى گرودنو وبلىسىندا بولىپ, كوپجاقتى ىنتىماقتى قاتىناستار قۇجاتتارىنا قول قويدى. الدىن ويلايتىن ديقاندار بۇل قادامداردان دا جاقسىلىق كۇتەدى. بيىل وبلىستىڭ ەگىنشىلىك شارۋاشىلىعىن دامىتۋعا مەملەكەت تاراپىنان 9,2 ميلليارد تەڭگە سۋبسيديالىق قارجى ءبولىنىپ وتىر. بۇل سالالىق جالپى جۇمىستى ۇيلەسىمدى جۇرگىزۋگە سەپتىگىن تيگىزۋمەن قاتار, استانانىڭ ازىق-ت ۇلىك بەلدەۋىن نىعايتۋداعى جاڭا جوبالارعا سەرپىلىس قوساتىنى بەلگىلى. باقبەرگەن امالبەك, «ەگەمەن قازاقستان». اقمولا وبلىسى.