حوككەي • 19 مامىر، 2022

شۆەيتساريادان دا ۇپاي الا المادى

24 رەت كورسەتىلدى

فينليانديا استاناسى – حەلسينكي مەن تامپەرە قالالا­رىندا ءوتىپ جاتقان شايبالى حوككەيدەن الەم چەمپيو­ناتىنىڭ توپتىق كەزەڭدەگى ءۇشىنشى تۋر ويىندارى اياقتالدى. بۇل تۋردا قازاقستان ۇلتتىق قۇراماسىنىڭ حوككەيشىلەرى الەمدىك دوداعا قاتىسىپ جاتقان ەلدەر اراسىنداعى رەيتينگتە كوش باستاپ تۇرعان شۆەيتساريامەن شەبەرلىك بايقاستى. اسا تارتىستى وتكەن كەزدەسۋدە جەرلەستەرىمىز ءبىر شايبا ايىرماشىلىعىمەن جەڭىلىپ قالدى – 3:2.

شۆەيتساريا قۇراماسى ال­عاشقى ەكى تۋردا يتاليا (5:2) مەن دانيا (6:0) قۇرامالارىن ءىرى ەسەپپەن قاپى قالدىرعاننان كەيىن شايبالى حوككەي ماماندارى ءۇشىنشى تۋر الدىندا ولار قازاق­ستاندى دا قالپاقپەن ۇرىپ الادى دەپ بولجام جاساعان ەدى. الايدا ءار تۋر سايىن ويىنى قالىپتاسىپ كەلە جاتقان قازاقستاندىق حوككەيشىلەر بۇل جولى «ا» توبىنىڭ تۋرنير كەستەسىندە ەكىنشى ورىندا تۇر­عان شۆەيتساريالىقتارعا لايىقتى قارسىلىق كورسەتتى. ءتىپتى العاشقى 20 مينۋتتا جەر­لەستەرىمىز شۆەيتساريامەن تەڭ ءتۇسىپ، قارسىلاستاردىڭ شايبا سوعۋىنا مۇمكىندىك بەرمەدى. پاتريك فيشەر شاكىرتتەرى العاشقى ەكى تۋردىڭ ءبىرىنشى كەزەڭىندە-اق يتاليا قاقپاسىنا – ءبىر، دانياعا ءۇش شايبا سوققا­نىمەن، بۇل جولى شۋتوۆ قاق­پاسىنان ساڭىلاۋ تابا الماي، ابدەن پۇشايمان بولدى.

الايدا ەكىنشى كەزەڭدى وتە بەلسەندى باستاعان شۆەيتسا­ريا­لىق حوككەيشىلەر كەز­دە­سۋدىڭ 24-مينۋتىندا ەسەپ اشتى. گولدىڭ اۆتورى – دەنيس مالگين. قازاق­ستان­دىق حوككەيشىلەردە وسى كە­زەڭ­نىڭ وزىندە-اق تارازى باسىن تەڭەستىرەتىن كەرەمەت مۇم­كىندىكتەر بولعانىمەن، سوڭعى ساتتە ءجيى ءمۇلت كەتىپ جات­تى. ەسەسىنە كەزەڭنىڭ سوڭىنا تامان داريو سيميون ەسەپتى ەسەلەپ كەتتى – 2:0. ەكىنشى اينالىمدا سوعىلعان ەكىنشى شايبا قورعاۋشى سامات دانياردىڭ قاتە­لىگىنەن كەيىن اندرەي شۋ­توۆ قورعاعان قاقپا تورىنان تابىلدى.

ءۇشىنشى كەزەڭنىڭ 46-مينۋتىندا ءبىزدىڭ قۇراما مۇزايدىندا ءبىر ويىنشى كەم ويناسا دا، ەسەپ ايىرماسىن قىسقارتۋعا مۇمكىندىك الدى. كەزەكتى قارسى شابۋى­ل كەزىندە قورعاۋشى دجەسسي بلەكەر شايبانى ءوز اي­ما­عىنان قارسىلاستىڭ اي­ما­­عىنا دەيىن اپارىپ، ورتا قا­شىقتىقتان قاقپاعا باعىت­تاعان شايباسىنىڭ الدىندا شۆەيتساريالىق قورعاۋشىلار دا، قاقپاشى دا دارمەنسىز قالدى – 2:1. بىراق ارادا كوپ وتپەي شۆەيتساريا قۇراماسى ەسەپ ايىرماسىن قايتا ۇلعايتتى – 3:1. ماتچتىڭ 56-مينۋتىن­دا دانيەل گەرتسوگ ءوز كومان­داسىنىڭ باسىمدىعىن ارتتىر­عانىمەن، ويىننىڭ اياق­تا­لۋىنا ەكى مينۋت قالعاندا قازاق­ستان­دىق قورعاۋشى ۆالەري ورەحوۆ قۇرامانىڭ ەكىنشى شايباسىن سوقتى. تارازى باسىن تەڭەستىرۋ ءۇشىن يۋري ميحايليس ويىن­نىڭ سوڭعى مينۋتتارىندا قاق­پاشىنىڭ ورنىنا التىنشى ويىنشىنى شىعارعانىمەن، ونىسى ءبارىبىر ناتيجە بەرمەدى.

قازاقستان قۇراماسى بۇل ويىندا جەڭىلسە دە، الدىڭعى ەكى ماتچپەن سالىستىرعاندا ءتاۋىر ويىن كورسەتتى. قاقپاشى اندرەي شۋتوۆتىڭ دا كەشەگى ويىندا جاساعان ەرلىگىن ەرەكشە اتاپ وتكەن ءجون. ول 60 مينۋتتا قارسىلاستىڭ 40 سوققىسىن قايتارا ءبىلدى. ال بۇل ويىندا قازاقستان قۇراماسىنىڭ ەڭ ۇزدىك ويىنشىسى دەپ قورعاۋشى ۆالەري ورەحوۆ تانىلدى. وعان ماراپاتتى وسى ويىندى تاماشالاۋعا بارعان مادەنيەت جانە سپورت ءمينيسترى داۋرەن اباەۆ تاپسىردى.

ماتچ اياقتالعان سوڭ قازاق­ستان ۇلتتىق قۇراماسىنىڭ باس باپكەرى يۋري ميحايليس بىلاي دەدى: «بۇگىن ەكى قۇراما دا جاقسى ويىن كورسەتتى. جىگىتتەر مۇزايدىنعا كوتەرىڭكى كوڭىل كۇيمەن جەڭىسكە جەتەمىز دەگەن قۇلشىنىسپەن شىقتى. ونى وزدەرىڭىز دە بايقادىڭىزدار دەپ ويلايمىن. بارلىق حوككەيشى ويىننىڭ ءار ساتىندە جەڭىسكە جەتۋ ءۇشىن بارىن سالدى. بىزدە شايبا سوعىپ، تارازى باسىن وزىمىزگە قاراي اۋداراتىن جاقسى مۇمكىندىكتەر بولدى. بىراق شابۋىلدىڭ نۇكتەسىن قوياتىن ويىنشى تابىلماي جاتتى. ال ءبىزدىڭ قاقپاعا گولدىڭ ءبارى ءوز قاتەلىگىمىزدىڭ سالدارىنان سوعىلدى. دەسە دە جىگىتتەر ەڭسە­سىن تۇسىرمەي، سوڭعى مينۋتقا دەيىن بارىن سالدى».

توپتاعى وزگە ويىندارعا توقتاساق، كانادا سلوۆاكيانى جەڭسە (5:1)، دانيا حوككەيشىلەرى يتاليالىقتاردان ءبىر شايبا ايىرماشىلىعىمەن باسىم ءتۇستى (2:1). گەرمانيا قۇراماسى دا فرانتسيانى 3:2 ەسەبىمەن ۇتتى. «ا» توبىنىڭ تۋرنير كەستەسىندە شۆەيتساريا مەن كانادا قۇرامالارى 9 ۇپايمەن كوش باستاپ تۇر. قازاقستان قۇراماسى كەلەسى كەزدەسۋىن بۇگىن ءدال وسى ۇيەڭكى جاپىراقتارى ەلىنىڭ كومانداسىمەن وتكىزەدى. ماتچ ەلوردا ۋاقىتىمەن 23:20-دا باستالادى.

«ۆ» توبىنىڭ تۋرنير كەستە­سىندە دە ەكى قۇراما كوش باستاپ كەلەدى. شۆەتسيا ءۇشىنشى تۋردا ۇلىبريتانيانى 6:0 ەسەبىمەن جەڭسە، فينليانديا اقش-تان ايلاسىن اسىردى (4:1). بۇل قۇرامالاردا 9 ۇپايدان بار. اۋستريا بۋلليت سەرياسىندا چەحيادان (2:1)، لاتۆيا نور­ۆەگيادان باسىم ءتۇسىپ (3:2)، چەم­پيوناتتاعى العاشقى جەڭىس­تەرىنە قول جەتكىزدى.

سوڭعى جاڭالىقتار

ۆاكتسينا سالدىرعاندار سانى ارتتى

كوروناۆيرۋس • بۇگىن، 09:17

1227 قازاقستاندىق ىندەتتەن ساۋىقتى

كوروناۆيرۋس • بۇگىن، 09:08

وتكەن تاۋلىكتە 1169 ادام ىندەت جۇقتىردى

كوروناۆيرۋس • بۇگىن، 09:01

قارسىلاستار انىقتالدى

سپورت • بۇگىن، 08:47

پۋتينتسەۆا ۇتىلىپ قالدى

سپورت • بۇگىن، 08:46

مەرەي كۇمىس الدى

سپورت • بۇگىن، 08:45

سەربيادان ولجالى ورالدى

سپورت • بۇگىن، 08:43

تەمىرتاۋدا گاز تۇتاندى

ايماقتار • بۇگىن، 08:43

جومارت جاننىڭ جاقسىلىعى كوپ

قوعام • بۇگىن، 08:40

مەدال سانى 70-تەن استى

سپورت • بۇگىن، 08:38

ادەبيەتتانۋ تارلانى

ادەبيەت • بۇگىن، 08:33

شۇمەكتەن شىققان سۋ مەن شۋ

قوعام • بۇگىن، 08:23

«اينەگىڭىزدى جۋىپ بەرەيىك»

قوعام • بۇگىن، 08:21

ۇقساس جاڭالىقتار