سىرداريا سىر بەرمەدى

بۇرناعى كۇنى قىزىلوردا وبلىسىنىڭ اكىمى قىرىمبەك كوشەرباەۆتىڭ توراعا­لىعىمەن قالا جانە اۋدان اكىمدەرىنىڭ كەڭەي­تىلگەن ءماجىلىسى ءوتتى. جيىندا وبلىس اكىمى اپپاراتى باسشىسىنىڭ ورىنباسارى رۋسلان ورماعامبەتوۆ سۋ تاسقىنى كەزەڭىنىڭ ءوتۋ قورىتىندىسى جونىندە باياندادى. اقپان ايىنىڭ سوڭىنا قاراي شاردارا سۋ قويماسىنان سەكۋندىنا 1050 تەكشە مەتر سۋ كەلىپ تۇردى. بۇل جاعداي سەڭ ءجۇرۋ كەزىندە ءبىرشاما قيىندىقتاردىڭ تۋىنداۋىنا اسەر ەتتى. دەگەنمەن, جۇدىرىقتاي جۇمىلۋدىڭ ارقاسىندا سەڭ وبلىس اۋماعىنان ەش قاۋىپ تۋدىرماي ءوتتى. ايتكەنمەن, كۇتپەگەن وقيعانىڭ جاڭاقورعان اۋدانىندا ورىن العانىن ايتا كەتكەن ابزال. «نەگىزى سىرداريا وزەنىنەن قاۋىپتەندىك. بيىل جاۋىن-شاشىن كوپ بولدى. سەڭنىڭ سىردىڭ ارناسىن جىرماعانى ەسەلى ەڭبەكتىڭ وتەۋى. ال قاراتاۋدان اققان قارعىن سۋدىڭ سالدارىنان زارداپ شەككەن تۇرعىندارعا سول مەزەتتە كومەك بولاتىنىن جەتكىزگەن ەدىم. شىعىن 29 ميلليون تەڭگەنىڭ شاماسى ەكەن. بۇل تولىعىمەن وتەلەدى», – دەدى قىرىمبەك ەلەۋ ۇلى. سونداي-اق, ءوڭىر باسشىسى كەلەر جىلدىڭ قامىن بۇگىننەن ويلاستىرۋ قاجەتتىگىن ەسكەرتىپ, سىرداريا وزەنىنىڭ بويىنداعى قاۋىپتى دەگەن ايماقتاردىڭ بوگەتتەرىن قالپىنا كەلتىرۋگە وسى باستان كىرىسۋدى تاپسىردى. ەرجان بايتىلەس, «ەگەمەن قازاقستان». قىزىلوردا.