اباي اۋىلىنداعى ايرىقشا كەشەن

وتكەن سەنبىدە اباي اۋدانىنا جو­لىمىز ءتۇستى. اۋدان ورتالىعى قا­راۋىلدا كوكپەڭبەك شىنىلارى جالتىراعان ادەمى عيمارات بوي كوتە­رىپتى. شەكەسىندە «شىڭعىستاۋ سپورت كەشەنى» دەپ ادىپتەلىپ جازىلعان. الدى قاراقۇرىم حالىق. كەشەننىڭ سالتاناتتى اشىلۋىنا كەلگەن مەيمانداردى كەڭپەيىل كوڭىلمەن قارسى الىپ جاتىر. اۋىلدىڭ اق كيمەشەكتى اجەلەرى, اساتاياق ۇستاعان اقساقالدارى, سايداۋىت جىگىتتەر مەن كوركەم قارىنداستار مەرەكەگە مەرەكە قوسقانداي, اينالانى كورىكتەندىرىپ جىبەرگەن. كوكتەمنىڭ سوڭعى جاۋعان قارىن دا ەلەڭ قىلار ەمەس. «تۋعان جەرگە – تاعزىم» اكتسياسى اياسىندا سالىنىپ, اۋدان جاستارىنىڭ يگىلىگىنە بەرىلگەن «شىڭعىستاۋ» سپورت كەشەنىنىڭ اشىلۋىنا ءوڭىر باسشىسى بەردىبەك ساپارباەۆپەن بىرگە ابايلىق اعاي­ىندارعا ايرىقشا تارتۋ جاساعان اتىمتاي ازامات شىڭعىس قۇلجانوۆ ءوزىنىڭ وتباسىمەن قاتىسىپ, سالتاناتتى ءساتتىڭ كۋاسى بولدى. – مەملەكەت باسشىسى نۇر­سۇل­تان نازارباەۆ بۇقارالىق سپورتتى, ۇلت دەنساۋلىعىن كوتەرۋگە ەرەكشە دەن قويىپ وتىرعانىن بىلەسىزدەر. وسى­عان وراي قابىلدانعان مەم­لەكەتتىك باع­دار­لامالار حالىقتىڭ سپورتپەن اينالىسۋىنا جول اشىپ وتىر. «شىڭعىستاۋ» كەشەنى دە جاستارىمىزدىڭ سپورتقا جاپپاي بەت بۇرۋىنا, دەنساۋلىقتارىن نىعايتۋىنا ۇلكەن مۇمكىندىك بەرەدى. وسى كەشەندە گىر كوتەرىپ, تەر توككەن, سپورت ۇيىرمەلەرىنە قاتىسقان بالالارىمىز ەرتەڭ ەلىمىزدىڭ نامىسىن قورعايتىن چەمپيوندار بولسىن! – دەدى وبلىس اكىمى بەردىبەك ساپارباەۆ. ءوڭىر باسشىسى ءوز سوزىندە «تۋعان جەرگە – تاعزىم» اكتسياسى­نا بەلسەندى اتسالىسقانى ءۇشىن قۇل­جانوۆتار اۋلەتىنە العىس ايتتى. جوبانىڭ قۇنى – 120 ميلليون تەڭگە. اتالعان قاراجاتتى تاۋىپ بەرىپ, اتامەكەنىنەن الىس­تا جۇرسە دە كىندىك كەسكەن التىن بەسىك اۋىلىن ۇمىتپاعان شىڭ­عىس قۇلجانوۆ ساۋاپتى ىسكە اي­نالعان يدەيانىڭ 2012 جىلى لوندون وليمپياداسى ءوتىپ جاتقان كەزدە تۋعانىن جەتكىزدى. – 2012 جىلى وتباسىممەن جي­دەبايعا دەمالىسقا كەلدىم. سول ۋاقىتتا لوندوندا جازعى وليم­پيا ويىندارى ءوتىپ جاتتى. اۋىل ازاماتتارى ماعان قاراۋىلداعى وتكەن عاسىردىڭ وتىزىنشى جىلدارى سالىنعان ەسكى سپورت زالىن كورسەتتى. توزىعى جەتكەن ەسكى عي­ماراتتى كورگەندە اباي اۋدانىنا جاڭادان سپورت كەشەنىن سالىپ بەرۋ تۋرالى وي كەلدى. قۇرىلىس جو­با­لاۋشى ماماندارعا ويىمداعى كەشەن­نىڭ جوباسىن جاساتىپ العان سوڭ, وبلىس اكىمى بەردىبەك ماشبەك ۇلىنا كور­سەتتىم. ول مەنىڭ ۇسىنىسىمدى قۋات­تاپ, ۇلكەن قولداۋ كورسەتتى. مىنا زاما­ناۋي عيمارات – سول ويىمىزدىڭ جەمىسى. ەندىگى ۋاقىتتا اۋداننىڭ جاس­تارى بوس ۋاقىتىن ىسىراپ قىلماي, سپورتپەن شۇعىلدانىپ, بولاشاقتا بيىك تۇعىرلاردى باعىندىرادى دەپ ويلايمىن, – دەدى مەتسەنات شىڭعىس قۇلجانوۆ. جارتى جىلدان استام ۋاقىتتا سالىنعان «شىڭعىستاۋ» كەشەنىندە بوكس جانە كۇرەس زالدارى, توعىزقۇمالاق سىنىبى, دەنە تاربيەسىمەن شۇعىلداناتىن جاتتىعۋ زالى, سونداي-اق سپورتشىلاردىڭ جۋىنۋ-شايىنۋىنا ارنالعان مونشا, كيىم اۋىستىرۋ بولمەلەرى بار. كەشەن سوڭعى ۇلگىدەگى سپورتتىق قۇرال-جابدىقتارمەن قامتاماسىز ەتىلگەن. «شىڭعىستاۋ» سپورت نىسانىنىڭ اشىلۋ سالتاناتىنا وراي, سىڭعىرلاعان عيماراتتا ەكى جارىس قاتار ءوتتى. اتاپ ايتقاندا, وبلىس قۇراماسى مەن اۋدان كومانداسىنىڭ بىلعارى قولعاپ شەبەرلەرى اراسىندا جولداستىق كەزدەسۋ, ەرلەر مەن ايەلدەر كۇرەسىنەن وبلىس بىرىنشىلىگى ۇيىمداستىرىلدى. بۇل دا زاماناۋي عيماراتتىڭ اۋقىمدى جارىس وتكىزۋ مۇمكىندىگىن كورسەتەدى. كەلەشەكتە اۋدان ورتالىعىنىڭ وزىندە ءىرى رەسپۋبليكالىق, حالىقارالىق جارىس­تاردى وتكىزۋدىڭ ورايى تۋدى دەۋگە بولادى. عيماراتتىڭ ىشكى قابىرعالارى قازاقستاننىڭ اتىن الەمگە تانىتقان وليمپيادا, ەۋروپا جانە ازيا چەمپيوندارىنىڭ سۋرەتتەرىمەن اسەمدەلىپتى. ولاردىڭ ساپىندا ج.ۇشكەمپىروۆ, د.تۇرلىحانوۆ, ە.ىبىرايىموۆ جانە تاعى باسقا سپورت ساڭلاقتارى بار. م.تاۋتانوۆ سىندى اباي اۋدانىنىڭ اتاقتى تۋمالارى دا ءبىر بولەك ساپ تۇزەگەن. مۇنىڭ ءبارى جاس جەتكىنشەكتەردى تالاپتاندىراتىنى ءسوزسىز. «قازاقستان بارىسىندا» شىعىس ءوڭىرىنىڭ نامىسىن جىرتقان بەلگىلى بالۋاندار, اباي اۋدانىنىڭ تۋمالارى ايبەك نۇعىماروۆ پەن مۇحيت تۇرسىنوۆتىڭ جاتتىقتىرۋشىسى شىڭعىس تۇرسىنوۆ مۇنداي سپورت كەشەنىنىڭ ناتيجەسى ەرتەڭ وسى ەلدەن شىعاتىن سپورتشىلاردىڭ باعىندىرعان بيىكتىكتەرىنەن كورىنەتىنىن جەتكىزدى.   ال اۋداننىڭ بۇرىنعى ەسكى بوكس جانە كۇرەس زالى اۋدان اكىمشىلىگى تاراپىنان قايتا جوندەۋدەن وتكىزىلىپ, اۋدان ورتالىعىنان شالعايدا ورنالاسقان اۋىل بالالارىنا ارنالعان شاعىن ينتەرناتقا اينالماق. سپورت كەشەنىنىڭ اشىلۋ سالتاناتى ءما­دە­نيەت ۇيىندە «قالامقاس» حالىقتىق ءان-بي ءانسامبلىنىڭ كونتسەرتىمەن جالعاستى. جەرگى­لىكتى زيالى ازاماتتاردىڭ, حالىقتىڭ تاما­شا­لاۋىمەن وتكەن كەش جوعارى دەڭگەيدە ۇيىم­داستىرىلۋىمەن جان جادىراتتى. اباي اۋدانىنىڭ ارداگەرلەرى حافيز ما­تاەۆ پەن ناسەن سەمباەۆ وسى يگىلىكتى ءىستى ۇيىم­داستىرعان وبلىس جانە اۋدان باسشىلارىنا, كاسىپكەرگە راقمەت ايتىپ, باتاسىن بەردى. دۋمان اناش, «ەگەمەن قازاقستان». شىعىس قازاقستان وبلىسى, اباي اۋدانى. ___________________ سۋرەتتى تۇسىرگەن ەسىمحان ورىنباەۆ.