1995 جىلعى سوڭعى رەفەرەندۋمنان كەيىن حالىقتان ەشكىم بولاشاعىن جالپىحالىقتىق تالقىلاۋ ارقىلى انىقتاۋ تۋرالى سۇراماعان ەدى. مىنە, جاڭا قازاقستاننىڭ نوبايىن جاسايتىن كونستيتۋتسيالىق رەفورمالاردى پرەزيدەنت حالىقتىڭ قالاۋىنا ۇسىنىپ وتىر. قاراڭىزدارشى, 27 جىلدان كەيىن حالىق ءوز بولاشاعىن باستى قۇجات – اتا زاڭىن انىقتاپ, ەكىنشى رەسپۋبليكاعا وتپەك.
سۋپەرپرەزيدەنتتىڭ زامانى كەتتى, قازىر حالىق وكىلدەرى وتىرعان مىقتى پارلامەنتى بار پرەزيدەنتتىك باسقارۋ فورماسىمەن ءومىر سۇرۋگە اياق باسۋدامىز. پرەزيدەنت بيلىگىنىڭ قۇزىرەتتەرىن بارىنشا شەكتەپ حالىقپەن ءبولىسىپ وتىر. بۇدان ءارى اۋىل, اۋدان قالا, وبلىستار ءوز اكىمدەرىن, ءماسليحاتتارىن سايلايدى, پرەزيدەنتتىڭ ۇسىنىستارىنا كەلىسىم بەرەدى, جەكە ايماقتىڭ قارجىسىن يگەرۋگە قول جەتكىزەدى. جەر مەن ونىڭ قويناۋىنداعى دۇنيەنىڭ بارلىعى حالىقتىكى بولىپ ەسەپتەلەدى. ءولىم جازاسىنا تولىق تىيىم سالىندى. سايلاۋشىلار جەكە مانداتپەن قايراتكەرلەر مەن تۇلعالاردى سايلاي الادى. وسىنداي كۇتىلەتىن جاڭالىقتارعا تولى ساياسي رەفورمالار جالپىحالىقتىق رەفەرەندۋم ارقىلى انىقتالماق.
بىلتىر عانا قىرعىز باۋىرلارىمىز كونستيتۋتسياعا وزگەرىستەر ەنگىزۋ جونىندە رەفەرەندۋم وتكىزۋ ءۇردىسىن باستارىنان وتكەردى. شىنداپ كەلگەندە, بۇل – ۋاقىت تالابى, جاڭا قوعامنىڭ قۇرىلىسىنا ءوتۋ, جاڭا دامۋدىڭ بەلەسىنە شىعۋ دەگەن ءسوز.
ماقسات جاقاۋ,
اباي اتىنداعى قازۇپۋ رۋحاني جاڭعىرۋ جوبالىق كەڭسە جەتەكشىسى,
ساياساتتانۋشى
