كەيىنگى تولقىن الدىندا سويلەگەن سوزىندە ايماق باسشىسى ەلدىك ىستەرگە ارالاسقان, عىلىم-بىلىمدە ەرەكشەلەنگەن تۇلعالار ومىرىنەن مىسالدار كەلتىردى. ولاردى جاستارعا ۇلگى ەتتى. جاڭاشىلدىققا قول سوزعان دارىندىلار باستامالارىن قولداۋعا دايىن ەكەنىن جەتكىزدى.
– جاستارعا قولداۋ كورسەتۋ – ءبىزدىڭ جۇمىسىمىز عانا ەمەس, باستى مىندەتىمىز. وبلىس اكىمىنىڭ حالىقتىڭ الەۋمەتتىك وسال جانە كوپبالالى وتباسىلارعا ارنالعان ءبىلىم گرانتى 2 ەسەگە ارتىپ, بيىل 200-گە جەتتى. كاسىپكەرلىكپەن اينالىسۋعا بەل بايلاعانداردىڭ جوبالارىنا وبلىستىق بيۋدجەتتەن 70 ملن تەڭگە ءبولىپ وتىرمىز. مۇنان بولەك, سپورتپەن شۇعىلدانۋعا دا جاعداي جاسالىپ جاتىر. قالا مەن اۋدان ورتالىقتارىندا عانا ەمەس, اۋىلدىق جەرلەردە دە سپورت نىساندارىنىڭ سانى ارتىپ كەلەدى. ءبىز قاي كەزدە دە جاستاردىڭ باستامالارىن قولداۋعا ءازىرمىز, – دەدى نۇرلىبەك نالىباەۆ.
باسقوسۋدا كوللەدج ستۋدەنتى ۇيدەن وقيتىن بالالارعا ارنالعان «ۆيرتۋالدى شىندىق» جوباسىن تانىستىردى. وبلىس اكىمى مۇنداي الەۋمەتتىك جوبالارعا قولداۋ تانىتاتىنىن اتاپ ءوتتى. سونداي-اق ۇزدىك ستۋدەنت بينازير اليحانقىزىنا مانشۇك مامەتوۆا اتىنداعى ارنايى ستيپەنديا سەرتيفيكاتىن تابىس ەتتى.
شولپان كارينوۆا ايماققا جاساعان ساپارى بارىسىندا م.مامەتوۆا اتىنداعى قىزىلوردا پەداگوگيكالىق جوعارى كوللەدجىندە رەسپۋبليكالىق پاتريوتتىق جاستار فورۋمىنا قاتىسۋشىلارمەن كەزدەستى. وندا شولپان تاڭاتقىزىمەن قاتار وبلىس اكىمىنىڭ ورىنباسارى بالجان شامەنوۆا, «قوسشىنار: ءاليا – مانشۇك» قوعامدىق بىرلەستىگى جەتەكشىسى عالىمجان بايدەربەس جانە اقتوبە قالاسىنان ارنايى كەلگەن كوشباسشى ستۋدەنت ا.نۇرلىبەكقىزى كوللەدج ۇجىمىن قۇتتىقتاپ, مانشۇك مامەتوۆا ەسكەرتكىشىنە تاعزىم ەتتى.
توقسان جىل بۇرىن قىزىلوردا اۋداندىق اتقارۋ كوميتەتىنىڭ №33 شەشىمىنە سايكەس پەداگوگيكا تەحنيكۋمى بولىپ اشىلعان وقۋ ورنى 5 جىلدان كەيىن پەداگوگيكا ۋچيليششەسى بولدى. ال 1952 جىلى قازكسر اعارتۋ ءىسى ءمينيسترىنىڭ بۇيرىعىمەن م.مامەتوۆا اتىنداعى قىزىلوردا قازاق قىزدار پەداگوگيكالىق ۋچيليششەسى, 36 جىل بۇرىن پەداگوگيكالىق ۋچيليششە, كەيىننەن زامان تالابىنا ساي كوللەدج اتاندى.
شولپان تاڭاتقىزى فورۋمعا قاتىسۋشىلاردى قوس مەرەيتويمەن قۇتتىقتاپ, وقۋ ورنىنىڭ بۇگىندە بىلىكتى پەداگوگ ماماندار دايارلايتىن ىرگەلى ءبىلىم شاڭىراعىنا اينالعانىن اتاپ ءوتتى. عاسىرعا جۋىق تاريحىندا بۇل وقۋ ورنىن مىڭداعان شاكىرت ءبىتىردى. ولاردىڭ قاتارىندا جيىرمادان استام عىلىم دوكتورلارى, 200-دەن اسا عىلىم كانديداتتارى, قوعام جانە مادەنيەت قايراتكەرلەرى بار. عۇمىرىن بىلىمگە ارناعان ءشامشا بەركىمباەۆا, ايتىسكەر اقىن نادەجدا لۋشنيكوۆا, ەسىمدەرى جۇرەكتە, ۇندەرى قۇلاقتا قالعان انشىلەر باقىت ءاشىموۆا, ءمادينا ەراليەۆالار وسى كيەلى مەكەننەن تۇلەپ ۇشقان تالانتتار.
شولپان كارينوۆا فورۋم اياسىندا جارىق كورگەن ء«بىلىم شامشىراعى» اتتى كىتاپتىڭ تانىستىرىلىمىنا قاتىسىپ, سالتاناتتى تۇردە لەنتاسىن قيدى. «مەكتەپكە دەيىنگى تاربيە جانە وقىتۋ» ماماندىعىنىڭ «دۋالدى وقىتۋ الاڭى», ء«بىلىم نۇرى» اتتى پەداگوگيكالىق ساباقتاستىق گالەرەياسى مەن «قۇزىرەتتىلىك ورتالىعى», «كوركەم ەڭبەك» شەبەرحاناسىنداعى كىرىكتىرىلگەن ساباقتارعا قاتىسىپ, ستۋدەنتتەردىڭ ەنگىزگەن جاڭارعان جوبالارىنا وڭ باعاسىن بەردى.
وسى كۇنى ن.بەكەجانوۆ اتىنداعى قازاق اكادەميالىق مۋزىكالىق دراما تەاترىندا باتىر قىزدىڭ ءومىرىن بەينەلەگەن «مونشاق» سپەكتاكلى ساحنالاندى. قويىلىم كەيىپكەرلەرىن كوللەدجدىڭ 100-دەن استام ستۋدەنتى سومداپ شىعىپ, كورەرمەن قوشەمەتىنە يە بولدى.
قىزىلوردا
