الماتى قالاسىنداعى مەملەكەتتىك ورتالىق مۋزەيدە اۋەگە 300 مارتە كوتەرىلگەن شتۋرمان-ۇشقىش حيۋاز دوسپانوۆانىڭ ەرەن ەرلىگىن ناسيحاتتايتىن كورمە اشىلدى. ارنايى جاسالعان ەكسپوزيتسيالىق قابىرعالاردا «قاناتتى قىزدىڭ» جەكە جانە وتباسى مۇشەلەرىمەن, تۋعان-تۋىستارىمەن, جاۋىنگەر دوستارىمەن تۇسكەن سۋرەتتەرى, مايدان حاتتارى, ەڭبەك ەتكەن جىلدارىندا يەلەنگەن ماراپاتتارى كورەرمەن نازارىنا ۇسىنىلدى. سونىمەن قاتار, جازۋشى ءابۋ سارسەنباەۆتىڭ باتىر قىزعا جازعان حاتتارى مەن قاھارمان تۇلعا تۋرالى ماقالالار توپتاماسى قويىلدى. كورمەگە كەلۋشىلەر حيۋاز دوسپانوۆانىڭ مايداندا جانە ومىردە قولدانعان جەكە زاتتارىن تاماشالاي الادى. كوشپەلى كورمەنى ۇيىمداستىرعان اتىراۋ وبلىستىق تاريحي-ولكەتانۋ مۋزەيىنىڭ قىزمەتكرەلەرى.
«كورمەنىڭ ماقساتى – حالىق قاھارمانى حيۋاز دوسپانوۆانىڭ ەرلىگىن جاستار اراسىندا كەڭىنەن ناسيحاتتاۋ. كوشپەلى كورمەگە مۋزەي قورىنان 90-عا جۋىق جادىگەر اكەلىندى. جالپى اتىراۋ وبلىستىق تاريحي-ولكەتانۋ مۋزەيىندە حيۋاز انامىزدىڭ 150-دەن استام ەكسپوناتى بار. ونىڭ 120-سى قۇجات پەن سۋرەت بولسا, قالعان 30-ى ءوزى ومىردە قولدانعان بۇيىمى مەن زاتتارى», دەيدى اتىراۋ وبلىستىق تاريحي-ولكەتانۋ مۋزەيى ديرەكتورىنىڭ مىندەتىن اتقارۋشى دينارا بەيسەنباەۆا.
كورمەدە سونداي-اق نەمىس-فاشيست باسقىنشىلارىمەن بولعان كۇرەستە ەرلىك كورسەتكەن مۇنايلى ءوڭىردىڭ پەرزەنتتەرى, «كەڭەس وداعىنىڭ باتىرى» اتاعىن يەلەنگەن قايىرعالي سماعۇلوۆ, بوران نىسانباەۆ, مۇسا بايمۇحانوۆ, گەورگي كانتسەۆ, مۇقات مۋساەۆ, الەكساندر افاناسەۆ, فيليپپ مازۋروۆ, يۆان ماحوريندەر جانە «داڭق» وردەنىنىڭ تولىق يەگەرلەرى شۇكىر ەركىنوۆ, عيزات اليپوۆ, ەۆگەني پولىنين, ساقىپ قىزىلوۆ, گاۆريل شاميندەر تۋرالى دەرەكتەر ۇسىنىلدى. ايتا كەتەيىك, كورمە 6 -12 مامىر ارالىعىندا بولادى. كىرۋ تەگىن.
