كادر ساياساتىن جەتىلدىرۋگە ەرەكشە ءمان بەرىلىپ وتىر

س.كامالەتدينوۆتىڭ ايتۋىنشا, قازىرگى تاڭدا كادرلىق الەۋەتتى ارتتىرۋ ماق­سا­تىندا اسكەري ءبىلىم بەرۋ جۇيە­سىن دامىتۋ جانە كادر ساياساتىن جەتىلدىرۋ ءىس-شارالارى قابىلدانۋدا. بۇل ءىس-شارالاردىڭ تۇپكى ماقساتىندا اسكەري قىزمەتشىلەردىڭ كاسىبي قۇزىرەتىن كەڭەيتۋ, لايىقتى جوعارىلاتۋ جانە اشىقتىق قاعيداسىمەن ولاردىڭ مانساپتىق ءوسۋىن قامتاماسىز ەتۋ جاتىر.

«وسىعان وراي قارۋلى كۇشتەردەگى كادر ساياساتىنىڭ 2027 جىلعا دەيىنگى تۇجىرىمداماسى ازىرلەندى. بۇل ماقساتتا «جاس ۇلان» مەكتەپتەرى, اسكەري كوللەدجدەر, ءۇش اسكەري جوعارى وقۋ ورنى جانە ۇلتتىق قورعانىس ۋنيۆەرسيتەتى اسكەري كادرلار دايارلاۋدا ءۇش دەڭگەيلى جۇيەمەن قىزمەت ەتەدى. ودان وزگە, اسكەري قىزمەتشىلەردىڭ كۋرستىق دايىندىقتان ءوتۋى دە قامتىلعان. نەعۇرلىم تاپشى ما­مان­دىقتار, سونداي-اق قاجەتتى ما­مان­­دىقتار بويىنشا دايارلىق شەتەل­دىڭ جەتەكشى اسكەري وقۋ ورىندارىندا ۇيىمداستىرىلعان», دەدى قورعانىس ءمينيسترىنىڭ ورىنباسارى.

ول سونداي-اق مەملەكەت باسشىسىنىڭ تاپسىرماسى بويىنشا مەرزىمدى اسكەري قىزمەتتىڭ بەدەلىن ارتتىرۋ جونىندە بىر­قاتار باستاما پىسىقتالىپ جاتقانىن دا ايتتى. ماسەلەن, 2007 جىلدان باستاپ بۇۇ-نىڭ نەپال, باتىس ساحارا, كوت-د'يۆۋار جانە ليۆانداعى ميسسيالارىنا 500-دەن استام قازاقستاندىق اسكەري قىزمەتشى قاتىسقان. سونىمەن قاتار 1992-2001 جىلدار ارالىعىندا قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ 9 مىڭنان استام اسكەري قىزمەتشىسى تاجىك-اۋعان ۋچاسكەسىندە تمد-نىڭ سىرتقى شەكاراسىن كۇزەتۋدى كۇشەيتۋ مىندەتىن ورىندادى. 2003 جىلعى تامىزدان 2008 جىلعى قازانعا دەيىن قازاقستاندىق «قازبات» باتالونىنىڭ ينجەنەرلىك-ساپەرلىك جاساعى قۇرامىندا 300-دەن استام اسكەري قىزمەتشى يراكتا ميسسياسىن ورىندادى. س.كامالەتدينوۆتىڭ مالىمدەۋىنشە, قازاقستان قازاقستاندىق بىتىمگەرلەر ءۇشىن قوسىمشا كۆوتالار الۋعا, ەلدىڭ بىتىمگەرشىلىك الەۋەتىن نىعايتۋعا جانە بۇۇ بىتىمگەرشىلىك وپەراتسيالارىنا قاتىسۋ گەوگرافياسىن كەڭەيتۋگە مۇددەلى.

«اسكەري قىزمەتشىلەرگە مەرزىمدى قىزمەت وتكەرۋ كەزەڭىندە «كرەديتتىك دەمالىستار», كوممۋنالدىق قىزمەتتەرگە اقى تولەۋ­دە ساربازدار وتباسىلارىنا جەڭىل­دىك­تەر بەرۋ ۇسىنىلادى. وزگە دە ۇسىنىستار ءبىلىم بەرۋ سەكتورىندا جەڭىلدىكتەر بەرۋگە قاتىستى بولىپ وتىر. مەرزىمدى اسكەري بورىشىن وتەپ جۇرگەن ساربازداردىڭ ەكونوميكانىڭ ناقتى سەكتورىندا سۇرانىس­قا يە جۇمىسشى ماماندىقتارىن مەڭگەرىپ شىعۋى جونىندەگى جۇمىستار جالعاسۋدا. سونداي-اق «تەگىن تەحنيكالىق جانە كا­سىپ­­تىك ءبىلىم بەرۋ» جوباسىن ىسكە اسىرۋ شەڭ­بەرىندە قورعانىس مينيسترلىگى بۇ­گىن­دە ەڭبەك نارىعىندا سۇرانىسقا يە 16 ماماندىق دايارلايتىنىن اتاپ وتكەن ءجون. سونىمەن قاتار مەملەكەت باسشىسى «قر كەيبىر زاڭنامالىق اكتىلەرىنە اسكەري قىزمەت جانە ارناۋلى مەملەكەتتىك ورگاندار قىزمەتكەرلەرى مەن اسكەري قىز­مەت­شىلەردىڭ تۇرعىن ءۇي قاتىناستارى ماسە­لەلەرى بويىنشا وزگەرىستەر مەن تو­لىق­تىرۋلار ەنگىزۋ تۋرالى» زاڭعا قول قويدى. بۇل وزگەرىستەر اسكەري قىزمەتشىلەر مەن ارنايى مەملەكەتتىك ورگاندار قىز­مەتكەرلەرىنىڭ الەۋمەتتىك توپتاماسىن جاق­سار­تۋعا, اسكەري قىزمەت وتكەرۋ ماسەلە­لە­رىن رەگ­لامەنتتەۋگە باعىتتالعان», دەپ اتاپ ءوتتى گەنەرال-لەيتەنانت.

قازىرگى ۋاقىتتا «ازاماتتاردى اسكەري-پاتريوتتىق تاربيەلەۋ قاعيدالارىن بەكىتۋ تۋرالى» ۇكىمەت قاۋلىسىنىڭ جوباسى ازىرلەنىپ, مۇددەلى مەملەكەتتىك ورگاندارمەن كەلىسىلۋدە. قۇجات ازاماتتاردى اسكەري-پاتريوتتىق تاربيەلەۋ جانە مەملەكەتتىڭ قورعانىس قابىلەتىن نىعايتۋ سالاسىنا وڭ سەپتىگىن تيگىزەدى.

سپيكەر سونداي-اق قازاقستان پرەزي­دەنتى – قارۋلى كۇشتەردىڭ جوعارعى باس قولباسشىسىنىڭ تاپسىرماسى بويىنشا وبەكتىلەردەگى قارۋ-جاراق پەن وق-دارىلەردى قاۋىپسىز ساقتاۋدى قامتاماسىز ەتۋ جۇمىستارىنا توقتالدى. ونىڭ ايتۋىنشا, «قاۋىپسىز ەل» ۇلتتىق جوباسى اياسىندا ءىرى قويمالار مەن اسكەري قويمالار سالۋ, سونداي-اق ساقتاۋ وبەكتىلەرىن تەحنيكالىق كۇزەت قۇرالدارىمەن جانە اۆتوماتتى ءورت ءسون­دىرۋ جۇيەلەرىمەن جابدىقتاۋ كوز­دەلگەن.

«ەڭ باستىسى, مۇنداي نىسانداردىڭ قاۋىپسىزدىگىنە قويىلاتىن تالاپتار مەن ەرەجەلەردى قاتاڭ ساقتاۋ. زاڭ جۇزىندە قوي­مالار اينالاسىندا تىيىم سالىنعان ايماقتار مەن اۋدانداردى قۇرۋعا بايلانىستى قاتىناستار رەتتەلگەن. جەرگىلىكتى اتقارۋشى ورگانداردىڭ وسى تالاپتاردى قاتاڭ ساقتاۋى ماڭىزدى», دەدى قورعانىس ءمينيسترىنىڭ ورىنباسارى.

ال قارۋلى كۇشتەر باس شتابى باستى­عى­نىڭ ورىنباسارى – قارۋلى كۇشتەر باس شتابى تاربيە جانە يدەولوگيالىق جۇمىس دەپارتامەنتىنىڭ باسشىسى, گەنەرال-مايور سەرىك بورامباەۆ بريفينگ بارىسىندا جىل باسىنان بەرى وتكىزىلىپ كەلە جاتقان قازاقستان قارۋلى كۇشتەرىنىڭ 30 جىلدىعى جانە ۇلى وتان سوعىسىنداعى جەڭىستىڭ 77 جىلدىعىنا ارنالعان ءىس-شارالارعا كەڭىنەن توقتالدى.