جول-كولىك وقيعالارىنىڭ الدىن الۋ ماقساتىندا وڭىردە وتكەن «قاۋىپسىز جول» ءىس-شاراسىندا دا ءبىرتالاي زاڭبۇزۋشىلىقتىڭ بەتى اشىلدى. جالپى العاندا, جول ەرەجەلەرىن بۇزۋ, جىلدامدىقتى ارتتىرۋ جانە قارسى قوزعالىس جولاعىنا شىعۋدىڭ دەرەگى كوپ. ءۇش كۇننىڭ ىشىندە جامبىل وبلىسى اۋماعىندا جول قوزعالىسى ەرەجەلەرىن بۇزۋدىڭ 4 مىڭنان استام دەرەگى انىقتالعان. ونىڭ ىشىندە 5 ادام كولىك جۇرگىزۋ قۇقىعىنان ايىرىلسا, 11 جۇرگىزۋشى ماس كۇيىندە ۇستالعان. سونىمەن قاتار كولىك قۇرالىن باسقارۋ كەزىندە تەلەفوندى پايدالانعانى ءۇشىن 187 ادام جاۋاپكەرشىلىككە تارتىلعان. ال 293 جۇرگىزۋشى كولىكتە قاۋىپسىزدىك بەلدىكتەرىن تاقپاسا, 18 جۇرگىزۋشى جولدا توتەنشە جاعداي تۋدىرعان. مۇنىڭ بارلىعى دا قوعامدا ءتىلسىز جاۋدان كەلەتىن قاۋىپتىڭ كوبەيىپ تۇرعانىن كورسەتەدى.
بۇگىندە جول ەرەجەسىن بۇزعاندارعا پوليتسەيلەر شارا قولدانىپ ءجۇر. دەگەنمەن ءۇش كۇننىڭ ىشىندەگى عانا دەرەك وسىنداي بولعاندا, جىل بويعى كورسەتكىشتەردى ەلەستەتۋدىڭ ءوزى قيىن. ءبىر انىعى, قازىرگى كەزدە كولىك ماسەلەسىنە قاتىستى وسى سياقتى زاڭبۇزۋشىلىقتار كوبەيىپ كەتكەن. سول سياقتى, ءتيىستى قۇجاتتارسىز كولىك قۇرالىن باسقارعان 180 جۇرگىزۋشى انىقتالىپ وتىر. ال 304 جاياۋ جۇرگىنشى بەلگىلەنبەگەن جەردەن وتكەنى ءۇشىن اكىمشىلىك جاۋاپكەرشىلىككە تارتىلعان. پوليتسيا قىزمەتكەرلەرى تەكسەرۋ جۇرگىزگەن وسى ءۇش كۇننىڭ ىشىندە 85 كولىكتى ايىپتۇراققا قويىپ, ولاردى پايدالانۋعا تىيىم سالعان. وسى ورايدا, وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باستىعى, پولكوۆنيك راحىمبەردى اشكەەۆ جامبىلدىقتارعا جولداردا اباي بولۋدى, جول قوزعالىسى ەرەجەلەرىن قاتاڭ ساقتاۋى كەرەگىن ايتتى.
قازىرگى كەزدە كۇرەجولداردى ايتپاعاندا, قالا ىشىندەگى قوزعالىستىڭ ءوزى قيىن. كۇندەلىكتى كوشەدە جۇرگەن كەز كەلگەن تۇرعىن زاڭبۇزۋشىلىقتىڭ كۋاسى بولىپ جاتادى. سونداي-اق بۇگىندە تاراز قالاسىنىڭ ىشىندەگى باعدارشامدار دا كۇردەلى ماسەلەگە اينالعان. ءسال جەل تۇرسا جالپ ەتىپ ءوشىپ قالاتىن جارىقتىڭ كەسىرى باعدارشامدارعا دا تيۋدە. ودان كەيىن ارينە, انشەيىندە اسىعىس جۇرەتىن كەيبىر كولىك جۇرگىزۋشىلەرى جول ءتارتىبىن بۇزا باستايدى. سول سەكىلدى, كۇرەجولدارداعى جانە قالا ىشىندەگى كەيبىر بەينەكامەرالاردىڭ توزۋى, ىستەن شىعۋى دا جول ەرەجەسىنىڭ بۇزىلۋىنا اكەلىپ سوعىپ وتىر.
جالپى, جامبىل وبلىستىق پوليتسيا دەپارتامەنتىنىڭ زەردەلەۋىنشە, جول-كولىك وقيعالارى جول قوزعالىسى ەرەجەلەرىن ءجيى بۇزۋ سالدارىنان ورىن الادى ەكەن. ەندى قالا سىرتىنداعى جولداردا قالاارالىق تاسىمالداردى جۇزەگە اسىراتىن جۇك تەحنيكالارى مەن اۆتوكولىكتەرگە دە ەرەكشە نازار اۋدارىلدى. سەبەبى وبلىس «باتىس ەۋروپا – باتىس قىتاي» حالىقارالىق كولىك ءدالىزىنىڭ بويىندا ورنالاسقاندىقتان, ايماق ارقىلى ەلىمىزدىڭ ءار وڭىرىنە جانە شەت ەلدەرگە قاتىنايتىن اۋىر جۇك كولىكتەرىنىڭ سانى كوپ. بۇلارعا دا بولاشاقتا ءبىر باقىلاۋ بولۋى كەرەك-اق.
