قازاقستان مەن گرۋزيا اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولدى. ق.وسكەنباەۆتىڭ ايتۋىنشا, سوڭعى 16 جىلدا گرۋزيادان قازاقستانعا جالپى تىكەلەي ينۆەستيتسيا اعىنى 285 ملن دوللاردان اسقان. ال قازاقستان گرۋزيا ەكونوميكاسىنا 495,3 ملن دوللار ينۆەستيتسيا قۇيعان. وتكەن جىلى ەكى ەل اراسىنداعى تاۋار اينالىمى 88 ملن دوللاردان استى. جىل باسىنان بەرى وڭ ديناميكا ساقتالىپ وتىر.
مينيستر ەكى ەل اراسىنداعى ءوزارا ساۋدا-ساتتىقتى ارتتىرۋ ءۇشىن ايتارلىقتاي الەۋەت بار ەكەنىن اتاپ ءوتتى. قازاقستاندىق كومپانيالار مەتاللۋرگيا, مۇناي-حيميا, تاماق جانە ماشينا جاساۋ, سونداي-اق فارماتسەۆتيكا سىندى بىرقاتار سالادا وڭدەلگەن تاۋارلار ەكسپورتىن ارتتىرۋعا دايىن. جالپى, ەكسپورتتىق الەۋەت 170 ملن دوللارعا باعالانىپ وتىر.
– ونەركاسىپ سالاسىندا گرۋزيندىك ارىپتەستەرىمىزدى ىنتىماقتاستىققا جانە قازاقستاندا بىرلەسكەن كاسىپورىندار قۇرۋعا شاقىرامىز. ءبىز قولداۋ كورسەتۋگە دايىنبىز. بۇگىنگى تاڭدا ەلىمىزدە گرۋزيانىڭ قاتىسۋىمەن 248 بىرلەسكەن كاسىپورىن جۇمىس ىستەيدى, – دەدى ق.وسكەنباەۆ.
يندۋستريا جانە ينفراقۇرىلىمدىق دامۋ ءمينيسترى قازىر قازاقستاندا بەلسەندى يندۋستريالىق-يننوۆاتسيالىق ساياسات جۇرگىزىلىپ جاتقانىن, ال دامۋدىڭ باسىم باعىتتارىنىڭ ءبىرى بىرلەسكەن جوعارى تەحنولوگيالىق وندىرىستەردى ەنگىزۋ ەكەنىن اتاپ ءوتتى.
– الەمدەگى كۇردەلى گەوەكونوميكالىق جاعدايعا قاراماستان, قازاقستاننىڭ ينۆەستيتسيالىق احۋالى مەن ماكروەكونوميكالىق جاعدايى تۇراقتى جانە ينۆەستورلار تاراپىنان سەنىمگە يە, – دەدى ول.
پلەنارلىق وتىرىس بارىسىندا قاتىسۋشىلار قازاقستان مەن گرۋزيا اراسىنداعى كولىك, كوممۋنيكاتسيا, IT جانە يننوۆاتسيالار, اۋىل شارۋاشىلىعى, مادەنيەت, سپورت جانە تۋريزم سياقتى سالالارداعى ىنتىماقتاستىقتىڭ جاي-كۇيى مەن دامۋ پەرسپەكتيۆالارىن تالقىلادى.
اتاپ ايتقاندا, ادەتتەگىدەي ترانسكاسپي حالىقارالىق كولىك باعىتىن (حتر) دامىتۋ پەرسپەكتيۆالارى قاراستىرىلدى. ق.وسكەنباەۆ بۇل باعىتتا قازاقستاندىق ەكسپورتتىڭ ۇلعاياتىنىن, ونىڭ ىشىندە قىتايدان ءترانزيتتىڭ كولەمى ارتا بەرەتىنىن, وسى ورايدا گرۋزيا اۋماعى ارقىلى ءترانزيتتىڭ ىڭعايلىلىعىن ساقتاي وتىرىپ, ىنتىماقتاستىقتى ودان ءارى دامىتۋ كەرەكتىگىن اتاپ ءوتتى.
سونىمەن قاتار قوس تاراپ دەنساۋلىق ساقتاۋ سالاسىندا ىنتىماقتاستىق, اتاپ ايتقاندا, ءبىلىم جانە تاجىريبە الماسۋ بويىنشا ۇزاق مەرزىمدى ىنتىماقتاستىقتى نىعايتۋ جانە كەڭەيتۋ بويىنشا ۇسىنىستاردى قاراستىردى.
ۇكىمەتارالىق كوميسسيانىڭ 11-ءشى وتىرىسىنىڭ قورىتىندىسى بويىنشا ق.وسكەنباەۆ پەن ل.داۆيتاشۆيلي ءتيىستى حاتتاماعا قول قويدى. سونىمەن قاتار ءىس-شارا اياسىندا «قازاقستان رەسپۋبليكاسىنىڭ مادەنيەت جانە سپورت مينيسترلىگى مەن گرۋزيانىڭ مادەنيەت, سپورت جانە جاستار مينيسترلىگى اراسىنداعى سپورت سالاسىنداعى ءوزارا تۇسىنىستىك تۋرالى» مەموراندۋمعا, سونداي-اق ستاندارتتاۋ جانە مەترولوگيا سالاسىنداعى ىنتىماقتاستىق تۋرالى كەلىسىمگە قول قويىلدى.
