رەفەرەندۋم دەگەنىمىز حالىقتىڭ ساياسي ەركىن تىكەلەي بىلدىرەتىن قۇرال بولعانىمەن, ءبىز سياقتى تاۋەلسىزدىكتەن كەيىن ومىرگە ارالاسقان ۇرپاق ونى مۇلدەم كورگەن جوق. حالىق ۇزاق جىلدار بويى ساياسي پروتسەستەردەن شەتتەپ قالدى. مەملەكەت تاعدىرىن شەشۋ ات توبەلىندەي ازعانتاي توپتىڭ عانا قۇزىرىندا بولدى.
حالىق ءۇشىن اسا ماڭىزدى شەشىمدەر پارلامەنتتە تالقىلانىپ, كوميسسيالاردا تار اۋقىمدا تالقىلانۋلار ءجۇردى. وسىلايشا جۇرتتىڭ كوپ بولىگى شەتتە قالدى, ساياسي وزگەرىسكە قاتىسۋ مۇمكىندىگىنەن ايىرىلدى.
بۇرىنعى پرەزيدەنت كەزىندە مەرزىمىنەن بۇرىن, ءتۇرلى سىلتاۋلارمەن بۇرمالانىپ وتكىزىلگەن وسىنداي بىرنەشە سايلاۋدا ازاماتتاردىڭ داۋىسى, ءۇمىتى, سەنىمى ۇرلاندى. ءبىر ادامنىڭ قولىنا شەكتەن تىس بيلىك شوعىرلاندىرىلدى. ونىڭ ارتى كەشەگى قاڭتار وقيعاسىنا اكەلگەنىنە ءبارىمىز كۋا بولدىق.
بۇدان بىلاي باسقاشا بولۋعا ءتيىس. حالىق تاعدىرىن ءبىر ادام شەشەتىن ۋاقىت كەلمەسكە كەتتى. شىن مانىندە ۇلكەن وزگەرىستەر داۋىرىنە اياق باستىق. تاريحتىڭ اششى ساباعىنان قاجەتتى قورىتىندى جاساي وتىرىپ, جاڭا قازاقستان قۇرامىز دەپ نيەت ەتتىك. ەسكى تاسىلدەرمەن جاڭا رەسپۋبليكا قۇرا المايمىز. جاڭا قازاقستان حالىقتىڭ ەركىمەن باستالۋعا ءتيىس. ساياسي جاڭارۋدى جۇرتىمىز تىكەلەي ءتۇيسىنىپ, ءوز بولاشاعى ءوز قولىندا ەكەنىن سەزىنۋ ءۇشىن وسىنداي زور تاريحي مۇمكىندىك بەرىلىپ وتىر.
ءبىز وسى مۇمكىندىكتى بارىنشا ۇتىمدى پايدالانىپ, دەموكراتيالىق جاڭعىرۋ جولىنا تۇسسەك ەكەن دەگەن تىلەگىم بار. الداعى رەفەرەندۋمعا – ەل ءومىرىن جاڭارتار تۇبەگەيلى ساياسي بەتبۇرىسقا ءبارىمىز اتسالىسايىق!
ۋايس ەرسايىن ۇلى,
ۇلتتىق قوعامدىق سەنىم كەڭەسىنىڭ مۇشەسى
