«جاڭا قازاقستان» دەگەن ۇعىمدى سوزبۇيداعا سالا بەرمەۋ كەرەك. قازاقستان پرەزيدەنتى قاسىم-جومارت توقاەۆ وسى ماسەلەنى دە دۇرىس مەڭزەدى. ول ۇعىمدى ءجيى قايتالاي بەرگەننەن قوعام دا, مەملەكەت تە, باسقا دا وزگەرمەيدى. ول ءۇشىن ارقايسىمىز وزگەرىستى وزىمىزدەن باستاۋىمىز كەرەك. ءاربىر ازامات, ءاربىر مەكەمە, ۇيىمدار, ساياسي پارتيالار ءبىزدىڭ قوعامدى, ادامداردىڭ ىشكى الەمىن جاڭارتۋ, جاڭعىرتۋ جولىندا تالماي تەر توگۋى, ايانباي ەڭبەكتەنۋى كەرەك. سونداي-اق بۇل ىستە كەز كەلگەنىمىز جاۋاپكەرشىلىك جۇگىن قايىسپاي كوتەرە بىلگەنىمىز ابزال. سوندا عانا ناتيجە بولادى.
ءبىرىنشى كەزەكتە قاي-قايسىمىز دا «بۇل وزگەرىستەر ءبىزدىڭ مەملەكەتىمىزدىڭ, جاس ۇرپاعىمىزدىڭ بولاشاعى», دەگەن ءسوزدى سانا تورىنەن شىعارماۋىمىز قاجەت. وسى تۇرعىدان العان كەزدە كونستيتۋتسيامىزعا ەنگىزىلەتىن بارلىق وزگەرىستەردى بۇكىلحالىقتىق رەفەرەندۋمعا شىعارۋ وتە ءبىر ماڭىزدى قادام دەپ ەسەپتەيمىن. ونى بارشامىز جاقسى ءتۇسىنىپ وتىرمىز. ويتكەنى رەفەرەندۋمعا قازاقستاننىڭ بارلىق ازاماتى قاتىسادى. ەلىمىزدىڭ بارلىق قيىرىندا داۋىس بەرۋ پروتسەسى جۇرگىزىلەدى. دەموكراتيالىق ءۇردىستىڭ وزەگى دە وسىندا تۇر.
قىسقاسى, ءاربىر قازاقستاندىق وسى رەفەرەندۋمعا قاتىسا وتىرىپ, اتا زاڭعا ەنگىزىلەتىن وزگەرىستەر مەن تولىقتىرۋلارعا ءوز ويلارىن بىلدىرەدى. بۇل ىسكە بارىنشا جاۋاپكەرشىلىكپەن قارايدى. ءبىر انىعى, حالىقتىڭ ءوزى قابىلداعاننان كەيىن سول وزگەرىستەر ارقىلى سانانىڭ جاڭعىرۋىنا بارلىعىمىز ءبىر كىسىدەي جاۋاپتى بولامىز. ماسەلە مەملەكەت باسشىسى, ۇكىمەت نەمەسە ءبىر مەكەمەنىڭ عانا باسشىسىنا جۇكتەلمەيدى. سوندىقتان دا حالىقتىق رەفەرەندۋم مەملەكەت ءۇشىن ماڭىزدى ءارى تاريحي وقيعاعا اينالىپ وتىر. وسىنى ءبارىمىز جان جۇرەگىمىزبەن ۇعىنعانىمىز ءجون.
جالپى, كونستيتۋتسيامىزعا وتە اۋقىمدى وزگەرىستەر ەنگىزىلگەلى جاتىر. بىردەن 33 باپ جان-جاقتى تولىقتىرىلاتىن بولادى. بۇل – اتا زاڭنىڭ ۇشتەن ءبىر بولىگى. سوندىقتان دا بۇل رەفورمانى قانداي دا ءبىر زاڭنىڭ نەمەسە پارلامەنتتىڭ شەڭبەرىندە قالدىرىپ قويماي, جالپىحالىقتىق رەفەرەندۋمعا شىعارۋ وتە دۇرىس ءارى ماڭىزدى تاريحي قادام.
ەكىنشى ايتىلاتىن ماسەلە, سول رەفەرەندۋم ويداعىداي ءوتىپ جاتسا, ءاربىر قازاقستاندىق وعان جۇمىلعان جۇدىرىقتاي بىرلىكپەن قاتىسۋعا ءتيىس. ەلدىڭ ەرتەڭى ءۇشىن جاسالىپ جاتقان جۇمىستان شەت قالۋعا بولمايتىنىن ءاربىر قازاقستاندىق ءتۇسىنۋى كەرەك. ءبىر بەلگىلىسى, داۋىس بەرۋ ارقىلى ەلىمىزدىڭ ەرتەڭى ءۇشىن ارقايسىمىز بەلگىلى ءبىر دەڭگەيدە مىندەتتەمە الامىز. ول مىندەتتەمە – مەملەكەتتىڭ ەرتەڭى ءۇشىن ارقايسىمىزعا ارتىلعان جاۋاپكەرشىلىك جۇگى. ال جاۋاپكەرشىلىك جۇگى ەشقاشان جەڭىل بولعان ەمەس. سوندا عانا ءبىز مەملەكەتتەن بالالارىمىزعا, بولاشاعىمىزعا قاجەتتى دۇنيەلەردى سۇراي الامىز.
ءتۇيىپ ايتار بولسام, رەفەرەندۋم – ەڭ ءبىرىنشى كەزەكتە حالىقتىڭ ويى مەن پىكىرى. ەكىنشىدەن, بارشامىزدىڭ ورتاق مىندەتىمىز. ۇشىنشىدەن, ەلىمىزدەگى وتە ۇلكەن اۋقىمداعى دەموكراتيالىق ءۇردىس. ونىڭ تاريحي ماڭىزدىلىعى دا وسىندا جاتىر دەۋگە بولادى.
ءالي بەكتاەۆ,
«اۋىل» حدپ پارتياسىنىڭ توراعاسى
