ايتا كەتەيىك, قوستاناي وبلىسىندا بيىلعى جىلدىڭ 20-21 ءساۋىر ارالىعىندا قوستاناي وبلىسى اكىمدىگى ءبىلىم باسقارماسىنىڭ «رۋدنىي تاۋ-كەن-تەحنولوگيالىق كوللەدجىنىڭ» كمك ستۋدەنتتەرى تاماقتان ۋلانعان بولاتىن. جۇقپالى اۋرۋلار بولىمىنە بارلىعى 14 ادام جاتقىزىلدى. اتالعان فاكت بويىنشا دەپارتامەنت پەن اۋماقتىق سانيتارلىق-ەپيدەميولوگيالىق باقىلاۋ باسقارماسىنىڭ ماماندارى قوزعالعان قىلمىستىق ءىس اياسىندا كاسىپكەرلىك سۋبەكتىسى جالعا العان كوللەدج اسحاناسىنا جوسپاردان تىس تەكسەرۋ جۇرگىزدى.
ەپيدەميولوگيالىق تەكسەرۋ بارىسىندا ناۋقاستاردا جۇرەك اينۋى, قۇسۋ, سۇيىق ءناجىس تۇرىندەگى بەلگىلەر بولعان, ولار كوللەدج اسحاناسىندا تاماقتانۋمەن بايلانىستى ەكەنى انىقتالدى. بۇگىنگى تاڭدا بارلىق ستۋدەنتتەر قاناعاتتانارلىق جاعدايدا اۋرۋحانادان شىعارىلىپ, دارىگەرلەردىڭ باقىلاۋىنا الىندى.
زەرتحانالىق زەرتتەۋ ناتيجەلەرى بويىنشا اسحانانىڭ 3 قىزمەتكەرىنەن پاتوگەندى ستافيلوكوكك انىقتالدى, دايىن ءونىمنىڭ بارلىق ۇلگىلەرى ميكروبيولوگيالىق كورسەتكىشتەرگە سايكەس كەلمەدى. اۋرۋحاناعا جاتقىزىلعان ستۋدەنتتەردىڭ تالداۋلارىندا پاتوگەندى التىن ستافيلوكوكك انىقتالدى. ينفەكتسيانىڭ كوزى قوعامدىق تاماقتاندىرۋ قىزمەتكەرلەرى بولۋى مۇمكىن.
تەكسەرۋ بارىسىندا تاماق ونىمدەرىن ساپاسى مەن قاۋىپسىزدىگىن راستايتىن قۇجاتتارسىز پايدالانۋ, ساقتاۋ شارتتارى مەن ءپىسىرۋ تەحنولوگياسىن بۇزۋ سىندى سانيتارلىق ەرەجەلەردى بۇزۋ فاكتىلەرى انىقتالدى.
«ماماندار ۆيرۋس وشاعىندا پروفيلاكتيكالىق جانە ەپيدەمياعا قارسى ءىس-شارالار جۇرگىزدى. تەكسەرۋ ناتيجەلەرى بويىنشا قولدانىستاعى زاڭناماعا سايكەس شارالار قابىلدانادى», دەلىنگەن حابارلامادا.
