قوعام • 26 ءساۋىر، 2022

ارنايى ينسپەكتورلار جۇمىسىنىڭ ماڭىزى زور

375 رەت كورسەتىلدى

ەلىمىزدە زورلىق-زومبىلىققا قارسى ءىس-قيمىل ارەكەتتەرىن جەتىلدىرۋ باعىتىندا اۋقىمدى جۇمىس اتقارىلىپ جاتقانىنا قاراماستان، بۇل ساناتتاعى قىلمىستار سانى ازايماي تۇر. بۇل تۋرالى ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا ءىىم اكىمشىلىك پوليتسيا كوميتەتى توراعاسىنىڭ ورىنباسارى الەكسەي ميليۋك، ءىىم اكىمشىلىك پوليتسيا كوميتەتىنىڭ باسقارما باسشىسى اسەت وسپانوۆ مالىمدەدى.

«ادامدى ماجبۇرلەۋ ارەكەتىنە قاتىستى ماسەلە نازاردان تىس قالماق ەمەس. قازىرگى كەزدە حالىقارالىق زاڭنامالار تەتىگى زەردەلەنىپ جاتىر. اتالعان زاڭداردىڭ ءبىزدىڭ قوعامعا قانشالىقتى سايكەس كەلەتىنى ناقتىلانۋدا. كىسىگە ءتيىسۋ، ماجبۇرلەۋ ارەكەتىنە قاتىستى قىلمىستىق جاۋاپكەرشىلىك ەنگىزۋ قانشالىقتى قاجەت؟ ونى قىلمىستىق كودەكسكە ەنگىزۋ ماسەلەنىڭ شەشىلۋىنە قانشالىقتى ىقپال ەتەدى؟ وسىنداي ماسەلەلەر تالقىعا تۇسۋدە. تالقىلاۋعا سالا ساراپشىلارى، پسيحولوگتەر مەن زاڭ سالاسىنىڭ ماماندارى ۇلەس قوسىپ كەلەدى»، دەدى الەكسەي ميليۋك ءباسپاسوز ءماسليحاتىندا.

ءىىم وكىلى زورلاۋعا قاتىستى جازانىڭ قاتاڭ­داتىلعانىنا دا توقتالدى. «زورلىق جاساۋ­شىنىڭ جازاسى جەڭىل بولمايدى. بۇگىندە اتالعان قىلمىس بويىنشا تاتۋلاسۋ مۇمكىندىگى الىنىپ تاستالعان. اڭگىمە بالالارعا قاتىستى بولسا ءتىپتى قاتاڭ. ولار قاتاڭ جازالانىپ، كىناسى كەشىرىلمەيدى، مەرزىمىنەن بۇرىن بوساتىلمايدى»، دەدى ول ماسەلەنىڭ مانىسىنە ءۇڭىلىپ.

ءىىم اكىمشىلىك پوليتسيا كوميتەتىنىڭ باسقارما باسشىسى اسەت وسپانوۆ كەلتىرگەن مالىمەتتەرگە قاراعاندا، قازاقستاندا زورلىق-زومبىلىققا ۇشىرايتىنداردىڭ 54 پايىزى ايەلدەر ەكەن.

«تۇرمىستىق جانجالداردىڭ تۋىنداۋىنىڭ سەبەبى ءارتۇرلى»، دەيدى ءا.وسپانوۆ. «ەلىمىزدە تۇرمىستىق زورلىق-زومبىلىق قۇرباندارىنىڭ 54 پايىزى – ايەلدەر، قالعانى – ەر ادامدار. ماسە­لەنىڭ كوبى وتباسىلىق داۋ-جانجالدان تۋىنداپ جاتادى. تۇرمىستىق زورلىق-زومبىلىق دەگەندە تەك ەرلى-زايىپتىلار اراسىنداعى وزەكتى ماسە­لەلەر عانا ەمەس، اكە مەن بالا اراسىنداعى كەلىس­پەۋشىلىك پەن جانجال دا بار. سول سەكىلدى باۋىر­لاردىڭ اراسىندا دا كەلىسپەۋشىلىك تۋىن­داۋى مۇمكىن. وسىعان ۇقساس جايتتار تۇرمىس­تىق زورلىق، كۇش كورسەتۋگە جاتادى»، دەيدى ول.

«ەلىمىزدە ايەلدەردى زورلىق-زومبىلىقتان قورعاۋ ماقساتىندا ارنايى ينسپەكتورلار جۇمىسىنا ايرىقشا ءمان بەرىلىپ وتىر. پرەزيدەنت ۇلتتىق قوعامدىق سەنىم كەڭەسىنىڭ وتىرىسىندا اتالعان سالا ينسپەكتورلارىنىڭ سانىن كوبەيتۋ قاجەت ەكەنىن باسا ايتتى. قازىرگى كەزدە ىشكى رەزەرۆتەر ەسەبىنەن ولاردىڭ سانى ەكى ەسە ارتتى. قازىر ەلىمىزدە ايەلدەردى زورلىق-زومبىلىقتان قورعاۋ سالاسىندا 248 ينسپەكتور جۇمىس ىستەيدى»، دەدى ءا.وسپانوۆ.

سوڭعى جاڭالىقتار

اقجايناق استانا

ەلوردا • كەشە

ديماش پەن دجەكسون

ونەر • كەشە

ۇقساس جاڭالىقتار