«ىشكى نارىقتا گازدى پايدالانۋدىڭ كۇرت ارتۋىنا بايلانىستى سوڭعى بەس جىلدا تۇتىنۋ كولەمى 35 پايىزعا ءوستى. بولجامعا سايكەس, مۇنداي قارقىن وسى جىلى دا ساقتالماق. الايدا قولدانىستاعى كەن ورىندارىنان گاز ءوندىرۋ كولەمىنىڭ ۇلعايۋىنا ءۇمىت ارتۋعا بولمايتىن سياقتى», دەدى سەناتور.
ونىڭ اتاپ وتۋىنشە, ەلىمىزدە وندىرىلەتىن ىلەسپە مۇناي گازىنىڭ 80 پايىزدان استامى قاراشىعاناق, قاشاعان جانە تەڭىز جوبالارىنا تيەسىلى بولىپ وتىر. بىراق اتالعان كەن ورىندارىندا جۇمىس ىستەيتىن جەر قويناۋىن پايدالانۋشىلارمەن جاسالعان ءونىمدى ءبولۋ تۋرالى كەلىسىمگە جاسالعان ساراپتاما مۇناي وندىرۋگە باسىمدىق بەرىلەتىندىگىن كورسەتەدى.
«سونىڭ اياسىندا جەر قىرتىسى قىسىمىن ۇستاپ تۇرۋ ءۇشىن جەر قويناۋىنا كەرى ايدالاتىن گاز كولەمى جىل سايىن ارتىپ كەلەدى. 2021 جىلدىڭ قورىتىندىسىندا بۇل كولەم شامامەن 39 پايىزدى قۇرادى.
ال «QazaqGaz» ۇك» اق بولجامىنا سايكەس, بۇل كولەم 2030 جىلعا قاراي 50 پايىزدان اسىپ تۇسەدى. بۇعان قوسا جەر قويناۋىن پايدالانۋشىلار شىعىننىڭ جوعارى, ساتىپ الۋ باعاسى مەن رەنتابەلدىلىكتىڭ تومەن بولۋىنا بايلانىستى گازدى ءوندىرۋ جانە قايتا وڭدەۋگە قاتىستى جاڭا جوبالاردى جۇزەگە اسىرۋعا قىزىعۋشىلىق تانىتپايدى. مۇنداي تەندەنتسيا 2024 جىلدان باستاپ ەلىمىزدە تاۋارلىق گاز تاپشىلىعىن تۋىنداتۋى مۇمكىن. ال ەلىمىز گاز قورى بويىنشا الەمدە 22-ءشى جانە تمد-دا ءۇشىنشى ورىندا تۇر», دەدى ەرىك سۇلتانوۆ.
