قىزىلوردا وبلىسىنىڭ ارال اۋدانىندا قازاقستان رەسپۋبليكاسىنىڭ پارلامەنتى سەناتى مەن وزبەكستان رەسپۋبليكاسىنىڭ ولي ءماجليسى سەناتى اراسىنداعى ىنتىماقتاستىق جونىندەگى كوميسسيانىڭ ەكىنشى وتىرىسى ءوتتى. جيىندا ارالدى قالپىنا كەلتىرۋ جانە ونىڭ ەكوجۇيەسىن قورعاۋ ماسەلەلەرىندە قازاقستان مەن وزبەكستاننىڭ ىنتىماقتاستىعىن ودان ءارى نىعايتۋ ماسەلەسى ءسوز بولدى.
ء«بىزدىڭ ەلدەرىمىزدىڭ مەملەكەت باسشىلارى ارال پروبلەماسىن شەشۋ جانە ترانسشەكارالىق سۋ رەسۋرستارىن ءتيىمدى پايدالانۋ ماڭىزدى ءارى كەزەك كۇتتىرمەيتىن ماسەلە ەكەنىنە ۇنەمى باسا ءمان بەرىپ كەلەدى. ءبىر كەزدەرى بىرەگەي سۋ قويماسى بولعان ارال قازىر وڭىردەگى ەلدەر ءۇشىن وراسان زور ەكولوگيالىق پروبلەماعا اينالىپ وتىر. بۇل ىنتىماقتاستىقتى نىعايتۋ جانە ارالدى قايتا جانداندىرۋ ءۇشىن وزىق تاجىريبە مەن تەحنولوگيالاردى كەڭىنەن قولدانۋعا مۇمكىندىك بەرەتىنى ءسوزسىز», دەدى م. اشىمباەۆ.
سەنات توراعاسى دۇنيەجۇزىلىك بانك پەن قازاقستان ۇكىمەتى قارجىلاندىرعان «سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ» جوباسىنىڭ قولعا الىنۋى مەن ونىڭ ءبىرىنشى كەزەڭىنىڭ ىسكە اسىرىلۋى ماڭىزدى قادام ەكەنىن ايتتى. سونداي-اق پالاتا سپيكەرى قازىرگى تاڭدا تەڭىز دەڭگەيىن ۇستاپ تۇرۋ ءۇشىن جاڭا مىندەتتەردىڭ اۋقىمدى كەشەنىن قامتيتىن وسى جوبانىڭ ەكىنشى كەزەڭىن جۇزەگە اسىرۋ قاجەتتىگىنە نازار اۋداردى.
ماۋلەن اشىمباەۆ ارال ايماعىن قالپىنا كەلتىرۋ بويىنشا بىرلەسكەن جۇمىستى قولداي وتىرىپ, حالىقارالىق ارالدى قۇتقارۋ قورىنىڭ پلاتفورماسىن بارىنشا پايدالانۋ ماڭىزدى ەكەنىن جەتكىزدى. بۇدان باسقا ءوڭىردىڭ ەكوجۇيەسىن قالىپتاستىراتىن ترانسشەكارالىق وزەندەردىڭ سۋ رەسۋرستارىن بىرلەسىپ باسقارۋدىڭ ءوزارا ءتيىمدى جانە وڭتايلى ءتارتىبىن ىزدەستىرۋ كەرەكتىگىن دە تىلگە تيەك ەتتى.
ء«بىرىنشى كەزەكتە ارال ماسەلەسى بويىنشا قازىرگى پروبلەمالاردى شەشۋگە بايلانىستى مەملەكەتتىك ورگاندارمەن تىعىز بايلانىس ورناتۋدىڭ ماڭىزى زور. قازىر بۇل باعىتتا جۇمىس جۇرگىزىلىپ جاتىر. ودان بولەك بەلگىلەنگەن جوسپارلاردىڭ ىسكە اسىرىلۋ بارىسىنا پارلامەنتتىك باقىلاۋ جۇرگىزۋدى ءتيىمدى پايدالانعان ءجون. دەپۋتاتتىق كورپۋس ارال ماسەلەسى بويىنشا جانە ءوڭىردى دامىتۋ جونىندەگى باستامالارعا قاجەتتى زاڭنامالىق قولداۋ كورسەتە الادى. بىرلەسىپ بۇل ماسەلەلەردى حالىقارالىق الاڭداردا دا بەلسەندى تۇردە ىلگەرىلەتۋدىڭ دە بەرەرى مول دەپ ەسەپتەيمىز. جالپى بىزدە ءتيىمدى بىرلەسكەن جۇمىس ءۇشىن قاجەتتى مۇمكىندىكتەر مەن رەسۋرستار بار», دەدى ماۋلەن اشىمباەۆ.
