گۋرامنىڭ جاسى 30-دا. ول گرۋزيادا تۋىپ-وسكەنىمەن, ەسەيە كەلە شۆەتسياعا قونىس اۋداردى. العاشىندا كيكبوكسينگپەن شۇعىلدانىپ, كوپتەگەن حالىقارالىق جارىستا ەلەۋلى تابىستارعا قول جەتكىزدى. كەيىننەن گرەپپلينگ, ەركىن كۇرەس جانە بوكستى مەڭگەردى. 2010 جىلدان بەرى ارالاس جەكپە-جەككە دەن قويدى. باستاپقى ءۇش باسەكەدە كۋتاتەلادزە جەڭىسكە جەتكەنىمەن, كەلەسى ەكى كەزدەسۋىندە جەڭىلىستىڭ كەرمەك ءدامىن تاتتى. سول ساتسىزدىكتەردەن ساباق العان ول ستوكگولمدەگى Allstars Gym Sweden كلۋبىندا ايگىلى شۆەتسيالىق سپورتشى الەكساندر گۋستافسسونمەن ءبىر زالدا جاتتىقتى. كەيىننەن ولاردىڭ قاتارىنا جاس جۇلدىز حامزات چيماەۆ قوسىلدى.
مىقتىلارمەن يىق تىرەسە جاتتىعۋ ءوز جەمىسىن بەردى. 2005 جىلدان بەرى گۋرام توعىز رەت وكتاگونعا شىعىپ, بارلىعىندا جەڭىسكە جەتتى. ونىڭ جالپى رەكوردى – 14 كەزدەسۋ, 12 جەڭىس (8 نوكاۋت), 2 جەڭىلىس. سوڭعى رەت شۆەتسيانىڭ وكىلى 2020 جىلدىڭ 17 قازانىندا ءابۋ-دابيدە وتكەن جارىستا پولشالىق ماتەۋش گەمروتتى ۇپاي سانىمەن ۇتتى.
ال دامير يسماعۇلوۆتىڭ ءجۇرىپ وتكەن جولى قازاق جانكۇيەرلەرىنىڭ كوز الدىندا. ورىنبوردا دۇنيەگە كەلگەن قانداسىمىز 2014 جىلدان بەرى مما-نى سەرىك ەتۋدە. سول كەزدەن بەرى 24 كەزدەسۋ وتكىزگەن ول سونىڭ تەك بىرەۋىندە عانا جەڭىلىس تاپتى. 13 باسەكەنى مەرزىمىنەن بۇرىن اياقتادى. دامير UFC-دە ءتورت جەكپە-جەك وتكىزىپ, بارلىعىن ۇپاي سانىمەن ءوز پايداسىنا شەشتى.
