جاعىمسىز اقپاراتتى پاۆلودار قالاسىن تازا اۋىز سۋمەن جانە تەحنيكالىق سۋمەن قامتاماسىز ەتىپ وتىرعان مونوپوليست ۇيىم – «پاۆلودار-ۆودوكانال» جشس باسشىلىعى جاريالاپ, قارا بۇلتتى ءتوندىردى. ءتىپتى جەرگىلىكتى بيلىك قىسىم جاساپ, «رەيدەرلىك جولمەن بيزنەسىمىزدى تارتىپ العالى جاتىر» دەپ جار سالدى.
اڭگىمەنى ارىدەن باستايىق. 2018 جىلى «پاۆلودار-ۆودوكانال» كاسىپورنىنىڭ قۇرىلتايشىسى ەرتىس وزەنىنىڭ ساعاسىندا جينالعان قۇم تۇرعىندار تۇتىناتىن سۋعا تۇسپەس ءۇشىن قۇمنان كىرپىش جاساۋ بويىنشا ينۆەستيتسيالىق جوبانى قولعا العان بولاتىن. جوبا مەملەكەتتىڭ يندۋستريالىق-يننوۆاتسيالىق دامۋ باعدارلاماسىنا ەندى. وسىلايشا, شيكىزاتتى وڭتۇستىك بولىكتەگى سۋ جيناۋ اۋماعىنان الۋ جونىندە كەلىسىمشارت جاسالدى. پاۆلودار قالاسى اكىمدىگىنىڭ قاۋلىسىمەن شارۋاشىلىققا قاجەتتى جەر تەلىمى دە بولىنگەن.
پاۆلودارلىقتارعا كاسىپكەر گەورگي شپەيزەردىڭ ەسىمى جاقسى تانىس. قۇرىلىس ماتەريالدارىن ءوندىرىپ قانا قويماي, وبلىس ورتالىعىنداعى كوپقاباتتى تۇرعىن ۇيلەردى تۇرعىزۋمەن اتى ءماشھۇر. ونى تىلگە تيەك ەتىپ وتىرعانىمىز بەكەر ەمەس. گەورگي جانە ونىڭ جۇبايى يرەناعا «پاۆلودار-ۆودوكانال» جشس, Kaz Ziegel, «WEST-كۆازار» سياقتى ءىرى كومپانيالار تيەسىلى. كىرپىش, بەتون ونىمدەرىن شىعاراتىن «WEST-كۆازار» سەرىكتەستىگى قۇمدى قايدان الاتىنىن جوعارىدا جازدىق. كاسىپكەردىڭ ايتۋىنشا, 2018-2020 جىلدار ارالىعىندا ەرتىس ساعاسى قۇمنان جۇيەلى تازالانىپ كەلگەن. سۋدى قۇمنان تازارتاتىن گيدروتەحنيكالىق نىسانداردى سالۋ ءۇشىن 542 ملن تەڭگەدەن استام قاراجات جۇمسالعان.
دەسە دە, 2020 جىلى وبلىستىق تابيعاتتى قورعاۋ پروكۋراتۋراسى جەر تەلىمى زاڭسىز بەرىلگەنىن انىقتاپ, كەلەسى جىلى مامانداندىرىلعان اۋدانارالىق سوت جەر تەلىمىن جالعا بەرۋ تۋرالى كەلىسىمشارتتى زاڭسىز دەپ تانىدى. كاسىپكەردىڭ بەزەكتەپ وتىرعانى سودان. ول بىلتىر وزەن ساعاسى قۇمنان تازالانباعاندىقتان سۋ بەرۋ جۇيەسى داعدارىسقا ۇشىرايتىنىن العا تارتۋدا. قۇمدى تازارتۋ جۇمىس- تارىنا شەكتەۋ قويىلسا, پاۆلودارلىقتار اۋىز سۋدان قاعىلادى دەپ بايبالام سالۋدا. «مۇنىڭ بارلىعى سىلتاۋ سياقتى. بۇل – ءبىزدىڭ بيزنەسىمىزدى رەيدەرلىك جولمەن باسىپ الۋدىڭ امالى», دەيدى كاسىپورىن باسشىلىعى.
جەرگىلىكتى بيلىكتىڭ ءوز ءۋاجى بار. ولار سوتتىڭ شەشىمىنە قارسى كەلە المايتىنىن ايتادى. زاڭ بارىنە ورتاق. ال پاۆلودارلىقتاردى سۋمەن قامتۋعا الاڭداۋعا نەگىز جوق, دەپ سەندىردى پاۆلودار قالاسى اكىمدىگى.
پاۆلودار
