كەڭەستە مەملەكەت باسشىسىنىڭ جولداۋىندا ايقىندالعان رەفورمالاردى جۇزەگە اسىرۋ كەزەڭىندە باق-تىڭ ءرولى, جاۋاپكەرشىلىگى, الەۋمەتتىك كۇيى, كاسىبي الەۋەتى جانە «جاڭا قازاقستان: مادەني-رۋحاني الەم جانە كىتاپ شىعارۋ» تاقىرىپتارى تالقىلاندى.
كەڭەس وتىرىسىن اشقان پارتيانىڭ اتقارۋشى حاتشىسى اسحات ورالوۆ سوڭعى ەكى ايدا قوعامدا, پارتيا قۇرىلىسىندا ۇلكەن وزگەرىستەر بولعانىن, جاڭا قازاقستان قۇرۋ جولىنداعى ترانسفورماتسيانىڭ پارتيادان باستالعانىن اتاپ ءوتتى. سونداي-اق ا.ورالوۆ حالىقپەن كەرى بايلانىستى جەتىلدىرۋ ماقساتىندا قۇرىلىمى قايتا جاساقتالعان پارتيا جانىنداعى قوعامدىق كەڭەستەردىڭ جۇمىسىنداعى وزگەرىستەرگە توقتالدى. ونىڭ ايتۋىنشا, پارتيا بيىل ۇلتتىق مادەنيەت پەن ونەردى قولداۋدا بىرنەشە ءىس-شارانى قولعا العان. سونىڭ ءبىرى – ايتىس.
ء«داستۇرلى «التىن دومبىرا» اقىندار ايتىسىنان بولەك بيىل «بابالار اماناتى» ايتىسىن دا ۇيىمداستىرۋدى ۇسىنىپ وتىرمىز. پارتيا ءاردايىم حالىقتىڭ ءسوزىن سويلەيتىن ءسوز زەرگەرلەرىن قولدايدى. بۇدان بولەك بيىل ەلىمىز ۇلت ۇستازى احمەت بايتۇرسىن ۇلىنىڭ – 150, مۇحتار اۋەزوۆتىڭ – 125 جانە عابيت مۇسىرەپوۆتىڭ 120 جىلدىعىن اتاپ وتەدى. وسى مەرەيتويلاردى ۇيىمداستىرۋعا پارتيا جان-جاقتى قولداۋ كورسەتەدى», دەدى ا.ورالوۆ.
جيىندا ءسوز العان مادەنيەت جانە سپورت ءمينيسترى داۋرەن اباەۆ جولداۋدا ايتىلعان مادەني مۇرالارىمىز بەن تاريحىمىزدى تانۋعا قاتىستى قويىلعان مىندەتتەرگە سايكەس مينيسترلىكتىڭ قولعا العان اۋقىمدى جۇمىستارىنا توقتالدى.
«كىتاپ شىعارۋ ءىسىن ودان ءارى دامىتۋ ءۇشىن جاس قالامگەرلەردى قولداۋ اسا ماڭىزدى. وسى رەتتە 2023 جىلدان باستاپ جاس قازاقستاندىق جازۋشىلار مەن اقىندارعا ارنايى پرەزيدەنتتىك ادەبي سىيلىق تاعايىندالادى. قازىر ءتيىستى مەملەكەتتىك ورگاندارمەن جارلىق جوباسى ازىرلەنۋدە. وعان قوسا بيىل مينيسترلىك «ۇزدىك بالالار شىعارماسى», «جىلدىڭ ۇزدىك كىتابى», «جاس قالامگەر» اتتى جوبالاردى جۇزەگە اسىرۋدى كوزدەپ وتىر», دەدى مينيستر.
كەڭەستىڭ جاڭا توراعاسى, ءماجىلىس دەپۋتاتى امانجول ءالتاي جاڭا قۇرامداعى Miras-تىڭ جۇمىسىنا ساتتىلىك تىلەي وتىرىپ, ازاماتتىق قوعام قالىپتاستىرۋ مەن مادەنيەت سالالارىن دامىتۋداعى قوردالانعان ماسەلەلەردى بىرىگىپ تالقىلاۋ, ناقتى ۇسىنىستار ايتۋ ورتاق ماقسات ەكەنىن جەتكىزدى.
«اقپاراتتىق شابۋىل ءورشىپ تۇرعان بۇگىنگى كۇردەلى كەزەڭدە ەلىمىزدىڭ اقپاراتتىق كەڭىستىگىن نىعايتۋ – نەگىزگى ستراتەگيالىق ماقساتىمىزدىڭ ءبىرى. بۇل تۇرعىدا قوعامىمىزدى ىدىراتۋ ءۇشىن سىرتتان بەرىلەتىن تاپسىرمالارمەن جۇمىس ىستەۋدەن, كولەڭكەلى قالاماقى ءۇشىن ساياسي كلانداردىڭ باسقا دا توپتاردىڭ ساياساتىنا اربالىپ قالۋدان ساق بولۋىمىز كەرەك», دەپ, «باسەكەگە قابىلەتتى باق قالىپتاستىرۋ ءۇشىن نە ىستەمەك كەرەك؟» دەگەن سۇراق توڭىرەگىندە ويلارىن ورتاعا سالدى.
بۇل رەتتە «قازاق مەديا قاۋىمداستىعى» زاڭدى تۇلعالار بىرلەستىگى باسقارۋ كەڭەسىنىڭ توراعاسى ەربول ازانبەك قازاقتىلدى اقپارات قۇرالدارى ءجيى ۇشىراساتىن ءتۇيىندى ماسەلەلەرگە توقتالدى. ونىڭ ايتۋىنشا, بۇگىندە قازاق تىلىندەگى سايتتاردىڭ ءىرى جارناما تاپسىرىسىنا قولى جەتپەيدى. قارجى تاپشىلىعىنىڭ سالدارىنان بىلىكتى مامان جالداي المايدى, سايكەسىنشە بىلىكتى مامانسىز ساپالى كونتەنت ءوندىرۋ تاعى قيىندىق تۋعىزادى. «مەملەكەت جانە الەۋمەتتىك جاۋاپكەرشىلىك شەڭبەرىندە بيزنەس وسى ماسەلەگە نازار اۋدارسا, مەملەكەتتىك تاپسىرىستان بولەك, ءتۇرلى تاقىرىپتاعى گرانتتىق جوبالار جاسالىپ, جەكەلەگەن جۋرناليستەر, رەداكتسيالار كونكۋرس نەگىزىندە گرانتتاردى ۇتىپ الۋ ارقىلى كونتەنت جاساۋ مۇمكىندىگىنە يە بولار ەدى», دەدى ە.ازانبەك.
اقپارات جانە قوعامدىق دامۋ ءمينيسترى اسقار وماروۆ باق سالاسىن قۇقىقتىق رەتتەۋدى جەتىلدىرۋ, اقپارات سالاسى قىزمەتكەرلەرىنىڭ كاسىبيلىگىن نىعايتۋ, وتاندىق باق-تىڭ باسەكەگە قابىلەتتىلىگىن ودان ءارى دامىتۋ باعىتىندا قولعا الىنعان ىستەرگە كەڭىنەن توقتالدى. «وسى سالادا مەملەكەتتىك رەتتەۋدىڭ ءتيىمدى تەتىگىن قۇرۋ ماقساتىندا زاڭ جوباسىن ازىرلەۋ جۇمىسى باستالدى. ءبىز ۇسىنىستاردى جيناپ, ساراپشىلارمەن بىرلەسە وتىرىپ زاڭنامانى جەتىلدىرۋ تەتىكتەرى بويىنشا كونتسەپتسيا ازىرلەيمىز. ول ءۇشىن باق, ازاماتتىق قوعام, ۇەۇ وكىلدەرىن, قوعام قايراتكەرلەرى جانە باسقا دا مۇددەلى ۇيىمداردىڭ باسىن قوسىپ, ارنايى جۇمىس توبى قۇرىلۋدا», دەدى مينيستر.
ال «حابار» اگەنتتىگى اكتسيونەرلىك قوعامىنىڭ باسقارما توراعاسى بەرىك ءۋالي: «جولداۋدا ايقىندالعان رەفورمالاردى جۇزەگە اسىرۋ كەزەڭىندە باق سالاسىنىڭ جاۋاپكەرشىلىگى, الەۋمەتتىك, كاسىبي الەۋەتى وتە زور بولماق. جاڭا قازاقستاندى قۇرۋ جولىندا ەلىمىزدىڭ باستى ارناسى يدەولوگيالىق تۇرعىدا جۇمىس ىستەيدى. پرەزيدەنتتىڭ باستامالارىن ارنا الداعى ۋاقىتتا دا حالىققا كەڭىنەن ناسيحاتتاۋعا دايىن», دەدى.
سونداي-اق كەڭەستە Mecenat.kz جوباسىن ازىرلەۋشىلەر قازاق قالامگەرلەرىنىڭ شىعارمالارىنا بايگە جاريالايتىنىن جەتكىزدى. ولار جەڭىمپاز شىعارمانىڭ اۆتورىنا ءومىرىنىڭ سوڭىنا دەيىن اي سايىن 500 دوللار كولەمىندە سىياقى بەرۋگە نيەتتى. جوبانى ازىرلەۋشى توپتىڭ مۇشەسى, تەلەجۋرناليست ايگەرىم اعىلتاەۆا ۇلتتىق ادەبيەتتىڭ دامۋىنا ۇلەس قوسۋ, ادەبيەتتە جاڭا ەسىمدەردى تانىتۋ, ۇزدىك رومانداردى وقىرمانعا ۇسىنىپ, رومان جازۋدى ىلگەرىلەتۋ ماقساتىندا قولعا الىنعان جوباعا Freedom Holding Gorp ينۆەستيتسيالىق توبىنىڭ نەگىزىن قالاۋشى, بەلگىلى قارجىگەر تيمۋر تۋرلوۆ قارجىلاي قولداۋ كورسەتەتىنىن ايتتى.
