دەسانتشىلار پوليگوندارعا كوپشاقىرىمدىق مارش جاسايدى. ونىڭ ىشىندە, الماتى, تالدىقورعان گارنيزوندارى اسكەري بولىمدەرىنىڭ جەكە قۇرامى «ىلە» پوليگونىنا, قاپشاعاي گارنيزونىنىڭ دەسانتشىلارى «شوشقالى» پوليگونىنا جىبەرىلەدى. اسكەرلەردىڭ جاۋىنگەرلىك تەحنيكامەن قوزعالىسى تۇنگى ۋاقىتتاردا اسكەري اۆياتسيا تىكۇشاقتارىنىڭ بۇركەمەلەۋىمەن جانە جەدەل بۇركەمەلەۋ شارالارىن ساقتاۋمەن جۇزەگە اسىرىلاتىن بولادى.
مارش جاساۋ جاۋىنگەرلىك جانە ارنايى تەحنيكالاردىڭ تەحنيكالىق جاعدايىن, سونداي-اق مەحانيك-جۇرگىزۋشىلەردىڭ دايىندىق دەڭگەيىن وبەكتيۆتى باعالاۋعا مۇمكىندىك بەرەدى.
دەسانتتىق-شابۋىلداۋ اسكەرلەرى قۇرامالارى مەن بولىمدەرىنىڭ باسشىلىق قۇرامى قوزعالىس كەزىندە بولىمشەلەردى باسقارۋ, بارلاۋ, كومەندانتتىق قىزمەتتى ۇيىمداستىرۋ, توسقاۋىل شەبىن ەڭسەرۋ مەن مارشتى جان-جاقتى قامتاماسىز ەتۋ تاجىريبەسىن يگەرەتىن بولادى.
اسكەري قىزمەتشىلەر شارتتى اۋداندارعا كەلگەننەن كەيىن ءتۇرلى جاۋىنگەرلىك ءىس-قيمىلداردان تۇراتىن وقۋ-جاۋىنگەرلىك مىندەتتەردى ورىندايدى. تاپسىرمالاردىڭ مازمۇنى ولاردى ورىنداۋ الدىندا عانا بولىمشەلەرگە بەلگىلى بولادى. بۇل كومانديرلەردىڭ ءوز بەتىنشە شەشىم قابىلداۋعا دايىندىعىن باعالاۋعا مۇمكىندىك بەرەدى.
باقىلاۋ تەكسەرىسىنىڭ باستى ماقساتى – اسكەري قىزمەتشىلەردىڭ كۇردەلى جاۋىنگەرلىك جاعدايدا ءىس-قيمىل جاساۋعا ازىرلىگىن, دەسانتتىق-شابۋىلداۋ اسكەرلەرى بولىمشەلەرىنىڭ وقۋ-جاتتىعۋ دەڭگەيى مەن ۇيلەسىمدىگىن باعالاۋ بولىپ وتىر.
بيىلعى ءساۋىر ايىندا قارۋلى كۇشتەردە باقىلاۋ تەكسەرىسى جاڭا فورماتتا جۇرگىزىلەدى. قۇرامالار مەن بولىمدەر پوليگوندارعا شىعىپ, وقۋ-جاۋىنگەرلىك تاپسىرمالاردى ورىندايدى. تەكسەرىس ناتيجەسى بويىنشا بولىمشەلەردىڭ جاۋىنگەرلىك ازىرلىگى باعالانادى.
