دوداداعا تۇسكەن سپەكتاكلدەر قاتارىندا تالاسبەك اسەمقۇلوۆتىڭ «قۇنانباي» (رەجيسسەرى – بولات ۇزاقوۆ), ورالحان بوكەيدىڭ «ۇيقىم كەلمەيدى» (رەجيسسەرى – ءبازىل سۇلتانعازى), روزا مۇقانوۆانىڭ «بوپاي حانىم» (رەجيسسەرى – جۇلدىزبەك جۇمانباي), مۇحتار اۋەزوۆتىڭ «ايمان-شولپان» (رەجيسسەرلەرى – ولجاس جاقىپبەك پەن شىرىن مۇستافينا), حاليفا التاي, حاسەن ورالتايدىڭ «التايدان اۋعان ەل» (رەجيسسەرى – فارحات مولداعالي), ي.شتراۋستىڭ «جۇبايلار جۇمباعى» (رەجيسسەرى – نۇرلان جۇمانيازوۆ), ميگەل دە سەرۆانتەستىڭ «دون كيحوت» (رەجيسسەرى – الىبەك ومىربەك ۇلى), ايۆون مەنچەلدىڭ «كۇزگى ءىڭىر» (رەجيسسەرى – ۇلان قارىپباەۆ) قويىلىمدارى بار. اتالعان پرەمەرالار تەاتردىڭ بۇگىنگى شىعارماشىلىق كەلبەتىن, دراماتۋرگيالىق تۋىندىلاردى ساحنالاعان رەجيسسەرلەردىڭ قيال قارىمىن ءھام سونىمەن قاتار اكتەرلىك شەبەرلىك پەن جارىق قويۋ, گريم, ستسەنوگرافيا, بي, مۋزىكا جانە تاعى دا باسقا تەاتر ونەرىنىڭ وزگە دە سالالارىنىڭ شىعارماشىلىق ىزدەنىستەرىن باعالاۋعا مۇمكىندىك جاسادى. سول ارقىلى تەاتر ترۋپپاسىنىڭ دەڭگەيى انىقتالىپ, تۋدىرعان ونەرى كاسىبي بىلىكتىلىك بيىگىندە باعالاندى. وسىعان وراي اپتالىققا تورەلىك جاساعان ساراپشىلاردان «قاللەكيلىكتەردىڭ» قارىمى تۋراسىندا پىكىر سۇراعان ەدىك.
نارتاي ەسكەندىروۆ,
PhD دوكتورى, قازاق ۇلتتىق
ونەر ۋنيۆەرسيتەتىنىڭ دوتسەنتى:
– «قاللەكي تىنىسى» اپتالىعى شىن مانىندە تەاتر الەمىنە ۇلكەن قۋانىش سىيلاعان ونەر جاڭالىعى بولدى دەسەك, ارتىق ايتپاعانىمىز. ءبىزدىڭ ولجا – ءبىر اپتا بويى تەاتر رەپەرتۋارىنداعى پرەمەرالىق سپەكتاكلدەردى تاماشالاپ, سودان رۋحاني ءلاززات العانىمىز. سونىمەن اپتالىقتىڭ ءبىرىنشى كورسەتىلگەن سپەكتاكلى – 2021 جىلدىڭ ۇلكەن جاڭالىعىنا اينالعان ت.اسەمقۇلوۆتىڭ «قۇنانباي» دراماسىنىڭ قازاق تەاترىندا العاش رەت ساحنالانۋى. بۇعان دەيىن قۇنانباي بەينەسىن ابايعا ارنالعان سپەكتاكلدەردە ءجيى كەزدەستىرگەنىمىز راس. الايدا ەلى ءۇشىن ايانباي يگى ىستەر جاساپ, شاريعات جولىن ۇستانعان قاجى قۇنانبايدى جەكە تۇلعا رەتىندە ساحناعا شىعارۋعا كەز كەلگەن رەجيسسەردىڭ قارىمى جەتە بەرمەيتىنىن ايتقىمىز كەلەدى. قويىلىم رەجيسسەرى – قازاقستاننىڭ ەڭبەك سىڭىرگەن قايراتكەرى ب.ۇزاقوۆ. ول بۇعان دەيىن ءىرى-ءىرى تۋىندىلارىمەن كورەرمەندەر ەسىندە قالعانى ءمالىم. وسى جولى دا كوپ ىزدەنىس پەن قاجىرلى ەڭبەكتىڭ ناتيجەسىندە «قۇنانباي» سپەكتاكلى وزىندىك پالساپالىق مازمۇنىمەن باۋرادى. قۇنانبايدىڭ كەلبەتىن اكتەر ەرلان مالاەۆ كوڭىل تولقىتار تەرەڭ ىزدەنىستەرگە بارماي, ءوز دەڭگەيىندە الىپ شىققان. ءرولدىڭ ەۆوليۋتسيالىق دامۋىنداعى ىشكى تولقىنىستارىن جان-جاقتى اشۋعا تالپىنىسى اسا بايقالمادى. وعان قۇنانباي مىنەزىندەگى يىرىمدەردى تەرەڭدىكپەن جەتكىزۋ ءۇشىن ءالى دە ىزدەنە تۇسكەنى ابزال. ماسەلەن, سپەكتاكلدەن ءبىر عانا قاراپايىم دەتال كەلتىرىپ وتسەك, قۇنانبايدىڭ تاريح بويىنشا سول جاق كوزىندەگى تىرتىقتى بىلەمىز, ال ە.مالاەۆتىڭ بەينەلەۋىندەگى قۇنانبايدىڭ وڭ جاق كوزىندەگى تىرتىققا كوزىمىز ءتۇستى. وسى سپەكتاكلدىڭ ەكىنشى قۇرامىندا ويىن كورسەتكەن اكتەر ن.ساۋدانبەكتىڭ قۇنانبايىندا سول جاق كوزىنىڭ تىرتىعىن كورگەن بولاتىنبىز. تاريح بويىنشا بولعان وقيعانى, دەتالدى ومىردەگىدەي, شىنايى جاسالعانى دۇرىس دەپ ويلايمىز, وسى جاعىن ەسكەرۋىمىز كەرەك.
ق.قۋانىشباەۆ تەاترىنداعى وتكەن جىلدىڭ تاعى ءبىر ۇلكەن جاڭالىعى – «قاللەكي» تەاتر لابوراتورياسىنىڭ اشىلۋى. بۇل لابوراتوريانىڭ جاستارعا بەرەتىن مۇمكىندىكتەرى وتە مول. لابوراتوريا جەتەكشىسى – قازاقستان جاستار وداعى «سەرپەر» سىيلىعىنىڭ لاۋرەاتى شاح-مۇرات ورداباەۆ. ەلىمىزدە لابوراتوريالىق تەاترلاردىڭ قۇلاشىن كەڭگە جايىپ, كوپتەپ اشىلىپ جاتقاندىعى قۋانتادى. «قاللەكي» تەاتر لابوراتورياسى و.بوكەيدىڭ «ۇيقىم كەلمەيدى» دراماسىمەن تۇساۋكەسەرىن جاسادى. سپەكتاكلدىڭ رەجيسسەرى – ءبازىل سۇلتانعازى. ءبازىل رەجيسسەرلىك ءبىلىمى بولماسا دا مۇنداي لابوراتوريالىق جۇمىستى الىپ, قويىلىمدى كوركەمدىك دەڭگەيى جوعارى تۋىندىعا اينالدىرعانى قۇپتارلىق. و.بوكەيدىڭ «ۇيقىم كەلمەيدى» دراماسىنىڭ اتى ايتىپ تۇرعانداي بىردەن وزىنە باۋراپ اكەتەدى. سپەكتاكلدە جاس اكتەرلەردىڭ بۇكىل جان دۇنيەسىمەن بەرىلىپ وينايتىن جانكەشتىلىگى كوزگە بىردەن تۇسەدى. قويىلىم وقيعاسىندا جاستىق البىرتتىقپەن بوزبالالىق جاساعان باس كەيىپكەردىڭ بالالىق قاتەلىكتەرى, ياعني ويلانباي جاسالعان ارەكەتتەرى ۇلكەن قاسىرەتكە اكەلگەنى شىنايى جەتكىزىلە وتىرىپ كورەرمەنگە ۇلكەن وي سالادى. «ۇيقىم كەلمەيدىنى» الۋ ارقىلى رەجيسسەر جاسوسپىرىمدەردىڭ ساناسىنا سىڭەتىندەي وي ايتىپ, جاستاردىڭ بۇگىنگى زاماناۋي تىلىندە سويلەگەن اكتەرلەر ءازىل-قالجىڭمەن, بيمەن كوپتەگەن تەرەڭ ماسەلەنى اشىپ كورسەتكەن. بولاشاقتا «قاللەكي» تەاتر لابوراتورياسىندا كوركەمدىك ساپاسى جوعارى وسىنداي شىعارمالاردىڭ كوبەيەتىنىنە سەنىمىمىز مول.
م.اۋەزوۆتىڭ «ايمان-شولپان» مۋزىكالىق كومەدياسىنىڭ پرەمەراسى 2010 جىلى 18-19 قاراشا كۇندەرى وتكەن بولاتىن. 2021 جىلى 6-7 قاراشا كۇندەرى جاڭارتىلعان نۇسقاسى ساحنالاندى. سپەكتاكلدىڭ ساحنالىق نۇسقاسىن جاساعان رەجيسسەر – قازاقستاننىڭ ەڭبەك سىڭىرگەن قايراتكەرى ءا.ورازبەكوۆ. جاڭا عيماراتتىڭ ۇلكەن ساحناسىنا قاراي يكەمدەلىپ جاڭارتىلعان نۇسقاسىندا (و.جاقىپبەك, ش.مۇستافينا) مۋزىكالىق پارتيتۋرالارعا كوپ كوڭىل ءبولىنىپ, كومەديانىڭ جانرى جان-جاقتى تەرەڭ اشىلماعانىن بايقادىق. اتاپ ايتقاندا, ايمان مەن شولپاننىڭ مۋزىكالىق ءان ايتۋ, بي بيلەۋ ساحنالارىنا كوڭىلىمىز تولعانىمەن, قويىلىمدا ءبىر-بىرىنەن
اۋماي قالعان قوس ارۋدى اجىراتا الماي دال بولدىق. باس كەيىپكەرلەردىڭ وزدەرىنە ءتان وبرازىن, ەرەكشەلىكتەرىن دارالاي تۇسەتىن قويۋ مىنەز, نازىكتىك, سابىرلىلىق, ەركەلىك جەتپەي قالعان. جارىق بەرۋ جونىندەگى سۋرەتشى ا.بەكبەمبەتوۆتىڭ اكتەرلەردىڭ ميزانستسەنالارىنداعى جارىقتىڭ ءساتتى قويىلۋىنا, جالپى سپەكتاكل اتموسفەراسىن شىنايى جەتكىزۋدە جەمىستى جۇمىس ىستەگەنى كورىنىپ تۇر. سونداي-اق قويۋشى سۋرەتشى ق.ماقسۇتوۆتىڭ جاساعان جۇمىستارى دا اۋىز تولتىرىپ ايتۋعا تۇرارلىق.
م.سەرۆانتەستىڭ «دون كيحوتىن» قازاق ساحناسىندا العاش ساراپتاعان رەجيسسەر ءا.ومىربەك ۇلىنىڭ ەسىمى «دون كيحوتقا» دەيىن ج.شانين اتىنداعى شىمكەنت قالالىق اكادەميالىق دراما تەاترى ساحناسىندا قويىلعان «قوراز» سپەكتاكلى ارقىلى تەاتر كورەرمەندەرىنە جاقسى تانىلعان بولاتىن. ونىڭ جاستىق ماكسيماليزمى مەن ەشقانداي تسەنزۋرادان قورىقپايتىن باتىلدىعى باسقا رەجيسسەرلەرگە ۇلگى بولدى. ول گيتيس-تە وقىپ ءجۇرىپ وسىنداي كەسەك جۇمىستار اتقاردى. رەجيسسەر بۇل قويىلىمدا دا قازاق ەلىنىڭ بۇگىنگى جاعدايىنا سالماقتى ساراپتاما جاساي وتىرىپ, قوعامدىق كۇردەلى ماسەلەلەردى شىنايى كورسەتە بىلگەن. سپەكتاكل باستالعاندا «كىم دون كيحوت بولادى؟» دەگەن وتكىر ماسەلە قويىلادى. ياعني دون كيحوت بولۋ وڭاي ەمەس جانە ودان دا قيىنى وزىڭدەگى دون كيحوتتى ءولتىرىپ الماۋدان باستاۋ الادى. «دون كيحوت» ارقىلى قوعامداعى وتكىر ماسەلەلەردى اشىق سىناعان رەجيسسەر ىزدەنىسى مەن ساحنالىق توسىن دا تىڭ شەشىمدەرى كوڭىلگە قۇرمەت ورنىقتىرادى. قازاق تەاترلارىنا وسىنداي باتىل قويىلىمدار كەرەك. بۇل «دون كيحوتتىڭ» قازاق ساحناسىنداعى عۇمىرىنىڭ ۇزاق بولاتىندىعىنا سەنىمىمىز كامىل.
بالجان بەكماعامبەتوۆا,
تەاترتانۋشى:
– اپتالىق بارىسىندا 8 سپەكتاكل تاماشالادىق. وتاندىق دراماتۋرگتەردىڭ – 5, شەتەلدىك قالامگەرلەردىڭ 4 شىعارماسى رەپەرتۋار قورجىنىن تولىقتىرىپتى. ايگىلى يسپان كلاسسيگى سەرۆانتەستىڭ «دون كيحوت» رومانى الىبەك ومىربەك ۇلى مەن ميراس ءابىلدىڭ ينستسەنيروۆكاسىمەن ساحناعا قازاقتىڭ «دون كيحوتى» بولىپ جول تارتتى. ءتورت ساعاتقا جۋىق ۋاقىتتا وتەتىن قويىلىمدا قازىرگى قوعامنىڭ ايقىن بەينەسىن كوردىك. اتالعان تۋىندىدا مادەنيەت, الەۋمەتتىك احۋال, قاۋىپسىزدىك, جۇمىسسىزدىق, وتباسى قۇندىلىقتارى, سىبايلاس جەمقورلىق تاعى سول سياقتى زاماننىڭ وتكىر ماسەلەسى كوتەرىلدى. الىبەك ومىربەك ۇلىنىڭ رەجيسسۋراسىمەن ساحنالانعان بۇل «دون كيحوت» اششى شىندىقتىڭ ءبىرىن قالدىرماي جايىپ سالىپ, قازىرگى ءداستۇرلى تەاتر سپەكتاكلدەرىنەن وقشاۋ, ەرەكشە فورمادا, تىڭ رەجيسسەرلىك ىزدەنىستەرمەن ءوز كورەرمەنىن ء«ا» دەگەننەن باۋراپ اكەتتى. قازاق تەاترىنا وسىنداي قويىلىمدار وتە قاجەت. ساحنادا دون كيحوت ءرولىن كەسكىندەگەن ەرجان نۇرىمبەتتىڭ اكتەرلىك شەبەرلىگى, ويىننىڭ سان قىرلىلىعى, تاپقىرلىعى سپەكتاكلدىڭ ءون بويىن ساۋلەلەندىرە ءتۇسىپ, ال ونىڭ دوسى سانچو پانسا رولىندەگى اكتەر نۇركەن وتەۋىل بۇل جولى كورەرمەنگە وزىق اكتەرلىك شەبەرلىكتىڭ وزگە قىرىنان تانىلدى. ارتىستەردىڭ ويىن ەرەكشەلىگىنە لايىقتى كيىم دايىنداۋدا سۋرەتشىسى شىنار ەلەمباەۆانىڭ ەڭبەگىن اتاپ وتكىمىز كەلەدى.
ح.التاي مەن ح.ورالتايدىڭ «التايدان اۋعان ەل» سپەكتاكلى رەجيسسەر فارحاد مولداعاليدىڭ قولتاڭباسىمەن ساحنالانعان جاڭا تۋىندىلاردىڭ ءبىرى. ينستسەنيروۆاكا اۆتورى – ميراس ءابىل. جيىرماسىنشى جىلداردىڭ قاسىرەتتى پاراعىن كوز الدىمىزعا ايقارا اشىپ, ەركىندىككە ۇمتىلعان, بوداندىققا باعىنباي وتكەن ۇلتىمىزدىڭ ءور مىنەزى مەن ەرىك-جىگەرىن كورسەتەتىن بۇل قويىلىمنىڭ تاعىلىمى تەرەڭ. ءبىر ايتا كەتەتىنى, سپەكتاكل بارىسىندا تاريحي حرونولوگيالىق دەرەكتەردى بايانداي بەرۋ قويىلىمنىڭ كوركەمدىك دەڭگەيىنىڭ تومەندەۋىنە اكەلىپ سوققان. سپەكتاكل بىرنەشە فينالمەن اياقتالادى. سپەكتاكلدىڭ نۇكتەسىن قويۋ جۇمىسىن ءالى دە پىسىقتاۋ قاجەت-اق.
قاللەكي تەاترىنىڭ كامەرالىق زالىنان زاڭعار جازۋشى ورالحان بوكەيدىڭ «ۇيقىم كەلمەيدى» شىعارماسىن تاماشالاۋ باقىتى بۇيىردى. QALLEKI تەاتر لابوراتورياسىنىڭ ساحنالاۋىندا كورەرمەنگە جول تارتقان بۇل درامانىڭ جاس رەجيسسەرى ءبازىل سۇلتانعازىنىڭ ساحنالىق شەشىمدەرى مەن قويىلىمعا لايىقتى مۋزىكا تاڭداۋى كوڭىلگە كوپ ءۇمىت ۇيالاتتى. قويىلىمنىڭ رەڭىن اشا تۇسكەن جاس اكتەرلەردىڭ بەت الىسى دا جامان ەمەس. سپەكتاكل كورەرمەنگە اسەر ەتتى. كەي ساتتە كوزگە جاس ءۇيىردى, كۇلدىردى, ساعىندىردى. ساحنالىق تۋىندىنىڭ باستى ميسسياسى دا سول عوي. كوڭىلگە اسەر ەتۋ ياكي سانانى سەلت ەتكىزۋ. جاس ونەرپازداردىڭ لابوراتورياسىنا ساتتىلىك تىلەيمىن.
تالاسبەك اسەمقۇلوۆتىڭ «قۇنانباي» دراماسىن تاماشالادىق. قويىلىمنىڭ اتاۋى «قۇنانباي» بولعان سوڭ تەاترعا كەلگەن كوزىقاراقتى كورەرمەننىڭ ساحنادان اۋەلى ءوز قۇنانبايىن ىزدەيتىنى زاڭدىلىق. رەجيسسەر بولات ۇزاقوۆ باستى كەيىپكەردىڭ بەينەسىن اشۋدا قۇنانبايدىڭ ىشكى دۇنيەسىنە كوبىرەك ۇڭىلگەندىگى بايقالدى. ءيا, ءبىز بىلەتىن قۇنانباي ءوز زامانىنىڭ بيلەۋشىسى, وكتەمدىك وكىلى ەدى. ءتىپتى م.اۋەزوۆتىڭ «اباي جولى» رومان-ەپوپەياسىندا ونىڭ وزبىر, قاتىگەز مىنەزىن سيپاتتايدى. بىراق بۇل جولى ساحنادان ءبىز قۇنانبايدىڭ دا پەندە ەكەندىگىن, قۇدايدىڭ الدىندا دارمەنسىز قۇل ەكەندىگىن, قاتەلەسىپ, قيا باسقان تۇستارى ءۇشىن وكىنەتىندىگىن, ءوزىنىڭ اينالاسىندا تۋعاندارىنىڭ يتجىعىس بوپ جاعا جىرتىسپاۋى ءۇشىن جانتالاسقانىن, بىتىمگەرشىلىككە شاقىرعىش تۇلعا ەكەندىگىن بايقادىق. ساحنادا تاريحي شىندىقتان بۇرىن, كوركەم شىندىقتى ىزدەگەن دۇرىس. ءار سۋرەتكەر ءوز «قۇنانبايىن» ساحنالايدى. اكتەر ەرلان مالاەۆتىڭ قۇنانبايى كەي ساتتەرى قاھارسىز قۇنانباي بولىپ كورىندى.
امەريكالىق دراماتۋرگ ا.مەنچەلدىڭ «كۇزگى ءىڭىر» تراگيكومەدياسىنىڭ جارىققا شىعۋى تەاتردىڭ ۇلكەن بۋىن ارتىستەرىنىڭ ونەرىنە كەڭ تىنىس, تىڭ ىزدەنىس سىيلادى دەسەك, قاتەلەسپەيمىز. قويىلىمنىڭ نەگىزگى كەيىپكەرلەرىن بەينەلەگەن قازاقستاننىڭ ەڭبەك سىڭىرگەن قايراتكەرى كۇليا قوجاحمەتوۆا, ايمان ايماعامبەت, مايرا ومار باستاعان تالانتتى اكتەرلەر شوعىرى ساحنانىڭ ءسانىن كەلتىردى. جىلدىڭ ءتورت مەزگىلىندەي جىلىستاپ جاتقان ءومىردىڭ سوڭعى كەزەڭى جايلى سىر شەرتىپ, جۇرەكتىڭ نازىك سەزىمىن قوزعايتىن قويىلىم اتاۋىن «كۇزگى ءىڭىر» دەپ قازاقشالاعان اۋدارما اۆتورى ن.ساۋدانبەكتىڭ شەبەرلىگى اتاپ وتۋگە تۇرارلىق. ساحنا دەكوراتسياسى اسەم بەزەندىرىلىپ, قويىلىمنىڭ ايتار ويىن ءدوپ باسقان. دەيتۇرعانمەن, ەكى ساعاتقا جۋىق سوزىلعان سپەكتاكلدە بىرسارىندىلىق باسىم ەكەندىگى بايقالادى. اكتەرلەردە شىنايىلىق تاپشى. كەيىپكەرسىندىلىقپەن ەمەس, كەيىپكەرجاندىلىقپەن ويناسا, جۇرەكتەرگە جەتەر مە ەدى...
جازۋشى-دراماتۋرگ روزا مۇقانوۆانىڭ «بوپاي حانىم» تاريحي تراگەدياسىن قاللەكي تەاترىنىڭ رەپەرتۋارىن تۇرلەندىرگەن, جاڭا لەپ سىيلاعان ۇزدىك تۋىندىعا جاتقىزۋعا بولادى. بوپاي حانىمدى ساحنالاعان قازاقستاننىڭ ەڭبەك سىڭىرگەن قايراتكەرى لەيلو بەكنازار-حانينگا كۇردەلى كەيىپكەردىڭ بولمىسىن اشۋدا قاتەلەسپەگەن. ءبىز ساحنادان اقسۇيەك بولمىستى بوپايدى كورە الدىق. ابىلقايىر حان بەينەسىندەگى ەرجان نۇرىمبەتتىڭ ويىنىنداعى حان مىنەزىنە ءتان قايسارلىق, كۇرەسكەر تۇلعانىڭ بەت بەينەسى سپەكتاكل شىرايىن ەنگىزدى.
ۇلى جازۋشى م.اۋەزوۆتىڭ ايگىلى «ايمان-شولپان» كومەدياسى زاماناۋي ۇلگىدە قايتادان جاندانىپتى. كومەديا جانرىنىڭ جۇگى الدەقايدا اۋىر. «جاڭارتىلعان قويىلىم ەزۋگە كۇلكى ءۇيىردى مە؟» دەگەن زاڭدى سۇراق ويعا ورالادى. وسى سۇراق تۇرعىسىنان الىپ قاراعاندا نەگىزگى كەيىپكەرلەردى كەسكىندەگەن جاس بۋىن اكتەرلەرگە ءالى دە كوپ ىزدەنىس قاجەت. كۇلدىرە ءبىلۋ – ۇلكەن ونەر. سپەكتاكل جانرى مۋزىكالىق كومەديا بولعاننان سوڭ, جاندى داۋىستا ءان سالىپ, ىرعاقتى بيگە ىلەسىپ, كومەديانىڭ نەگىزگى ميسسياسى قالتارىستا قالىپ قويعانى بەلگىلى.
ي.شتراۋستىڭ «جۇبايلار جۇمباعى» – كومەدياسى رەپەرتۋاردان تۇسپەي كەلە جاتقان ۇزدىك كومەديالاردىڭ بىرەگەيى. وتباسىلىق ءومىردىڭ قيىندىعى مەن قىزىعىن قاتار سۋرەتتەيتىن نازىك كومەديا ءوزىنىڭ كوڭىلدى ديناميكاسىمەن, كورەرمەنگە وڭاي قابىلداناتىن اۋەزدى انىمەن تارتىمدى سپەكتاكل تۇزە ءبىلدى. جاڭارتىلعان نۇسقاسى كەڭ ساحنا تورىندە جارقىراي ءتۇستى. بۇل رەتتە قويۋشى سۋرەتشى قانات ماقسۇتوۆتىڭ, كيىم سۋرەتشىسى شىنار ەلەمباەۆانىڭ ەلەۋلى ەڭبەكتەرى ءساتتى تۋىندىنى جارىققا شىعارۋعا زور ۇلەس قوسقان. سپەكتاكل بارىسىندا جارق ەتىپ, ەرەكشە ەستە قالعان ەپيزودتىق بەينە – اكتەر داستان ءالىموۆتىڭ «زىندان كۇزەتشىسى» ەكەنى ءسوزسىز.
P.S. «قاللەكي تىنىسى» اپتالىعى – تەاتردىڭ سوڭعى ءبىر جىلدا جەتكەن جەتىستىكتەرى مەن كەمشىلىكتەرىن ساراپتاۋعا جول اشقان جاقسى جوبا بولعانى انىق. باستىسى, شىعارماشىلىق ۇجىم كاسىبي ماماندار پىكىرىن تىڭداپ, ەركىن پىكىرتالاس ارقىلى شىعارماشىلىق جاڭا بەلەسكە قادام باستى. ال اپتالىق قورىتىندىسى بويىنشا, «دون كيحوت» سپەكتاكلىندەگى ءسۇت انا بەينەسى ءۇشىن تەاتردىڭ جەتەكشى اكتريساسى اينۇر بەرمۇحامبەتوۆا «ۇزدىك اكتريسا», دون كيحوت ءرولى ءۇشىن ەرجان نۇرىمبەت «ۇزدىك اكتەر», سانچو پانسا ءرولى ءۇشىن نۇركەن وتەۋىل ءشامىل ءجۇنىسوۆ اتىنداعى «ەكىنشى پلانداعى ۇزدىك ءارتىس» اتالىمىندا توپ جارسا, اتالعان قويىلىمنىڭ رەجيسسەرى الىبەك ومىربەك ۇلى ءازىربايجان مامبەتوۆ اتىنداعى «ۇزدىك رەجيسسەر» جۇلدەسىن يەلەندى. سونىمەن قاتار اپتالىق اياسىندا اشىربەك سىعاي اتىنداعى «ساحنا ساڭلاعى» سىيلىعى «بوپاي حانىم» سپەكتاكلىندەگى بوپاي بەينەسى ءۇشىن لەيلو بەكنازار–حانينگاعا, قادىر جەتپىسباەۆ اتىنداعى «ساحنا ساڭلاعى» جۇلدەسى «كۇزگى ءىڭىر» تراگيكومەدياسىنداعى يدا ءرولى ءۇشىن كۇليا قوجاحمەتوۆاعا تابىس ەتىلدى. مۇرات ناسيپوۆ اتىنداعى «ەپيزودتاعى ەر ادام بەينەسى ءۇشىن» جانە شولپان مۇقىشەۆا اتىنداعى «ەپيزودتاعى ايەل ادام بەينەسى ءۇشىن» اتالىمدارىندا تەاتر ارتىستەرى داستان ءالىموۆ پەن ينابات ابەنوۆا ماراپاتتالدى. شولپان ەلگەزەكوۆا اتىنداعى «شىعارماشىلىق ىزدەنىسى ءۇشىن» سىيلىعى «ۇيقىم كەلمەيدى» سپەكتاكلىن قويعان رەجيسسەر ءبازىل سۇلتانعازىنىڭ, جاقىپ وماروۆ اتىنداعى «سپەكتاكلگە مۋزىكا جازعان جىل كومپوزيتورى» اتالىمىنداعى جۇلدە ولجاس جاقىپبەكتىڭ مەرەيىن ۇستەم ەتتى. «ۇزدىك گريمدەۋشى» – ءلايلا سقاقوۆا, «ۇزدىك جارىق قويۋ بويىنشا سۋرەتشى» – ازامات بەكبەمبەتوۆ دەپ تانىلسا, «ۇزدىك ينستسەنيروۆكا» اتالىمىندا تەاترتانۋشى ميراس ءابىل ماراپاتتالدى.
