الماتى قالالىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جەدەل-ىزدەستىرۋ شارالارى بارىسىندا ناۋرىزباي اۋدانىنىڭ 62 جاستاعى تۇرعىنىن قاماۋعا العان.
«تاعايىندالعان ساراپتاماعا سايكەس, ارنايى ءىس-شارالار كەزىندە 62 جاستاعى ا. ەسىمدى ازامات گاشيش ەسىرتكى زاتىن ساقتاعانى انىقتالدى. كۇدىكتىنىڭ تۇرعىلىقتى جەرىندە رۇقسات ەتىلگەن ءتىنتۋ بارىسىندا وسىمدىك تەكتەس جانە ەرەكشە ءيىسى بار بىرنەشە پوليەتيلەن ورامدارى تابىلىپ, تاركىلەندى. اتاپ ايتقاندا: دالىزدەن 15 بۋما, شكافتان 11, تاعى 9-ى كولىكتە جاسىرىلعان. سونداي-اق ونىڭ تۇرعىلىقتى جەرىنەن گاز تاپانشاسى تابىلدى», دەپ ناقتىلادى الماتى قالالىق پد ەسىرتكى قىلمىسىنا قارسى كۇرەس باسقارماسى باستىعىنىڭ ورىنباسارى ساعىندىق اياعانوۆ.
پوليتسيا قىزمەتكەرىنىڭ ايتۋىنشا, كۇدىكتى ەسىرتكى ساتقانىن تولىقتاي مويىنداعان.
اتالعان فاكتى قر قك-ءنىڭ 297-بابى 1-بولىگى بويىنشا تىركەلىپ, قىلمىستىق ءىس قوزعالدى.
ال كۇدىكتى ۋاقىتشا ۇستاۋ يزولياتورىنا قامالعان.
