ينفوگرافيكانى جاساعان امانگەلدى قياس, «ەQ»
ءبىزدىڭ حالقىمىز بۇل جولداۋدى اسىعا كۇتتى. جاڭا قازاقستان قۇرۋدىڭ باعىت-باعدارىنا قاتتى زەر سالىپ, ءتۇرلى ويلار ۇستىندە بولدى. ەندى ساياسي جانە ەكونوميكالىق-الەۋمەتتىك تۇرعىدا جاڭا رەفورمالىق وزگەرىستەر جاساۋ مەن قوعامدى جاڭعىرتۋدىڭ قانداي جولىن تاڭدايتىنىمىز قىزىقتىرعانى راس.
ءبارىمىز دە ەل قامىن تەرەڭىنەن جانە ادال جۇرەكپەن ويلاپ, اسا ءبىر كۇشتى ەرىك-جىگەرمەن ۇلت پەن مەملەكەت الدىنداعى بار جاۋاپكەرشىلىكتى كوتەرگەن ەل پرەزيدەنتىنىڭ مەملەكەت پەن قوعام دامۋىن مۇرات ەتكەن تىڭ بەتبۇرىستى شەشىمدەرى مەن العا قويعان جاڭا ماقسات-مىندەتتەرى, ءاربىر بيلىك جۇيەسىن ءتيىمدى باسقارۋ مەن جاڭا وبلىستاردى قۇرۋ جونىندەگى باستاماسى جانە ولاردى اباي, ۇلىتاۋ جانە جەتىسۋ دەگەن ۇلتتىق تاريحي قۇندىلىقتارمەن اتاۋ, كەلەشەكتە الماتى وبلىسىنىڭ ورتالىعى بولاتىن قازىرگى قاپشاعاي قالاسىن حالىق قولداسا, مەن ونى قولدايمىن دەپ, ۇلت پەرزەنتى, اسا كورنەكتى مەملەكەت قايراتكەرى دىنمۇحامەد قوناەۆتىڭ ەسىمىن بەرۋ جايىندا ايتقان سوزدەرى تولىق كوڭىلىمىزدەن شىقتى ءارى رازىلىق جۇرەكتەردى تەبىرەنتىپ, تولقىتىپ جىبەردى.
شىن مانىندە جاڭارعان جولداۋ بولدى.
جاڭا قازاقستاننىڭ ساياسي جانە قوعامدىق-الەۋمەتتىك دامۋىنا زور وزگەرىس اكەلەتىن رەفورمالار مەن ءتيىمدى وزگەرىستەردى ايتتى. ءار سوزىندە تياناقتى ءىس بار.
قازىرگى قازاقستان قوعامى مەملەكەتتىك تاعدىرىمىز بەن ەل تۇتاستىعى تارازىعا تۇسكەن «قاسىرەتتى قاڭتار» وقيعاسىنان كەيىن مۇلدەم باسقا كەيىپكە ەنىپ, تۇبەگەيلى وزگەرىسكە قادام باسقانىن اشىق ايتۋعا ءتيىسپىز.
جاڭا قازاقستاندى قۇرۋدىڭ قاجەتتىگى مەن قالىپتاسۋى بۇدان ءارى مىنا دوڭگەلەنگەن دۇرمەك پەن الاساپىران دۇنيەدە ءبىر ءسات تە كۇتىپ تۇرا المايدى.
مەملەكەت باسشىسى قاسىم-جومارت توقاەۆتىڭ قازىرگى جاعدايلارعا قاراپ ايتقاندا, ەل باسقارۋ تىزگىنىن بۇرىن-سوڭدى بولماعان ساياسي, الەۋمەتتىك-ەكونوميكالىق جانە رۋحاني اۋىرتپالىقتار مەن قايشىلىقتارى مول كەزەڭدە قولىنا الىپ وتىر.
ەل ىشىندە جاسىراتىن نەسى بار, قوعامدى كوبىنەسە جىلتىراق دۇنيەگە بولەپ, ءبىر-بىرىمىزبەن جارىسقانداي ورىندى-ورىنسىز توي تويلاپ, جاراتۋشىنىڭ قازاققا جەراستى مەن ءۇستىن بىردەي بايلىقتى اياماي-اق بەرگەنىن مىڭ مارتە ايتىپ, تاۋبە ەتكەنىمىزبەن, بۇكىل حالىقتىڭ تەڭ جارتىسىنىڭ نەسىبەسى سول بايلىققا بەلشەسىنەن باتقان 162 ادامنان ارتىلماپتى.
قاڭتار وقيعاسى كوزىمىزدى وسىنداي وكىنىشتى شىندىققا جەتكىزدى. بەلگىلى وزبىر توپتار مەن بەتىمەن كەتكەن الپاۋىتتار قازىنانىڭ بايلىعىنا اياماي قول سالىپ, اشكوزدىك تانىتىپ, ويىنا كەلگەنىن جۇزەگە اسىرىپ كەلىپتى. بيلىك جىلدار بويى تابىستارىمىزدىڭ سىرتىندا قوردالانعان كەمشىلىكتەر مەن وراسان ولقىلىقتاردى ماقتانگەرلىك پەن كوبىرسىپ, كولگىرسۋدىڭ, كوزبوياۋشىلىقتىڭ كولەڭكەسىندە قالىپ قويدىردى. جۇمىسسىزدىق پەن كەدەيشىلىك وڭىرلەردە جاپپاي جايلاي باستاعانى بەر جاعى, تىم تەرەڭدەپ كەتتى. جەمقورلىقتىڭ تامىرىنا بالتا شابۋ ناتيجەسىز ناۋقانعا اينالعانداي اسەر قالدىرا باستادى. بۇل قوعامدا اشۋ-ىزا, قىجىل تۋعىزباي تۇرمايدى. سەنىمگە سەلكەۋ ءتۇسىردى, ادال ەڭبەكتىڭ قۇندىلىعىنا كەرى اسەر ەتتى. نەگىزسىز بايلىققا يە كىمدەر ەكەنىن جۇرت سەزگەن سايىن قوعامدىق پىكىر سان-ساققا سوقتى...
سول سەبەپتى ەكى ايدان استام ۋاقىتتان بەرى مەملەكەت باسشىلىعى ءومىر ءسۇرىپ وتىرعان وتانىمىزدىڭ بولاشاعى ءۇشىن قوعامدى اشىق تازارتۋعا كۇش سالىپ, الەۋمەتتىك ادىلدىك پەن شىنايىلىق, اقيقات پەن ادالدىق ۇستانىممەن زور تاريحي ىستەردى جۇيەلى اتقارا باستادى.
مەملەكەتتە زاڭ ۇستەمدىگىن كۇشەيتىپ, بارشاعا ورتاق قاتاڭ ءتارتىپ ورناتۋ قاجەتتىگى تۋىندادى. بۇل باعىتتا سەڭ قوزعالدى.
قازاقستاندىقتار تاپ بۇگىندەرى مەملەكەت باسشىسىنىڭ ماڭىنا توپتاسۋدى, جان-جاقتى قولداپ, قۋاتتاۋدىڭ ءمان-ماعىناسىن كەلەشەككە دەگەن شىنايى سەنىممەن, كىرشىكسىز ادال, بارىنشا الەۋمەتشىل ساياسي تۇلعاعا دەگەن قۇرمەتپەن ايقىندىق تانىتىپ وتىر. بۇل – تاريحي اقيقات.
بۇل جولداۋدان ءاربىر ازامات وزدەرىنىڭ مەملەكەتتىك تۇرعىدان كوكەيكەستى سۇراقتارىنا جاۋابىن تاپتى جانە تاريح ءۇشىن, حالىق ءۇشىن جاڭعىرتۋدىڭ ەڭ قاجەتتى ماسەلەلەرىنە كۋا بولدى. ون باعىت بويىنشا ىسكە اساتىن رەفورمالاردىڭ ءمانى وتە جوعارى ەكەنى انىق.
پرەزيدەنتتىك مەملەكەتتەن پرەزيدەنتتىك-پارلامەنتتىك جۇيە ودان ءارى ىسكە اسادى. سۋپەرپرەزيدەنتتىك باسقارۋ فورماسىنان پارلامەنتى مىقتى پرەزيدەنتتىك رەسپۋبليكا تاسىلىنە تۇبەگەيلى ءوتۋ – جاڭا ساياسي رەفورمالاردىڭ نەگىزى بولىپ وتىر. پرەزيدەنت, سونداي-اق كونستيتۋتسيالىق كەڭەس, ەسەپ كوميتەتى, ورتالىق سايلاۋ كوميسسياسى مۇشەلەرى پارتيادان تىس بولادى. وبلىس اكىمدەرى مەن ونىڭ ورىنباسارلارى پارتيا فيليالدارىن باسقارمايدى.
پرەزيدەنتتىڭ ەڭ جاقىن تۋىستارى ساياسي مەملەكەتتىك قىزمەتشى بولىپ, كۆازيمەملەكەتتىك سەكتوردا باسشىلىق قىزمەتتەر اتقارا المايدى.
پرەزيدەنت پارلامەنت ءماجىلىسىن قۇرۋدىڭ جاڭا ۇلگىسىن ۇسىندى. ءماجىلىس دەپۋتاتتىق كورپۋسى كەلەسى سحەما بويىنشا قۇرىلادى: 70 پايىزى پروپورتسيونالدى نەگىزدە جانە 30 پايىزى ماجوريتارلىق نەگىزدە.
سونداي-اق وبلىس اكىمدەرىن بالامالى نەگىزدە تاعايىنداۋ ماسەلەسى دە دەموكراتيالىق دامۋدىڭ ءتيىمدى تەتىگى بولماق. بۇل ارادا وبلىستىق ءماسليحات دەپۋتاتتارىنىڭ بەدەلى مەن تاڭداۋ مۇمكىندىگىنە ءسوز جوق, جول اشادى.
تاعى دا اتاپ ايتساق, پرەزيدەنتتىڭ بۇل جاڭعىرۋ باعدارلاماسى قوعام سۇرانىسىنا نەگىزدەلگەنىن ءاربىر باستامالارى ارقىلى ايقىنداپ بەردى. بۇل جولداۋدا ءاربىر ايتىلعان ماسەلە مەملەكەتتىلىگىمىزدى نىعايتۋ جانە قوعامدى دەموكراتيالاندىرۋ ۇدەرىسىن جاقسارتۋ تۇرعىسىندا جانە رەفورمالىق وزگەرىستەر سيپاتىندا باسا كورسەتتى.
ەل پرەزيدەنتى ق.توقاەۆتىڭ «وزگەرىستى ارقايسىمىز وزىمىزدەن باستاۋىمىز كەرەك. بىزگە ەشكىم سىرتتان كەلىپ, ەشتەڭە جاساپ بەرمەيتىنى انىق, ءبارى ءوز قولىمىزدا», دەپ اتاپ ايتقان تاريحي ءسوزى بارىمىزگە دە جاۋاپكەرشىلىك جۇكتەيتىنىن ۇمىتپايىق!
«مەن قانداي جاعدايدا بولسا دا اقىرىنا دەيىن حالقىممەن بىرگە بولامىن» دەگەن پرەزيدەنت ءسوزىن ەرەكشە قۇرمەتتەيمىن.
مەيرامبەك تولەپبەرگەن,
پارلامەنت ءماجىلىسىنىڭ دەپۋتاتى,
Amanat پارتياسى فراكتسياسىنىڭ مۇشەسى
