اتالعان جيىندا ەڭبەك ۇجىمى جولداۋدىڭ ەڭ ماڭىزدى تۇستارىنا توقتالدى. سونىڭ ىشىندە سۋپەرپرەزيدەنتتىك باسقارۋ ۇلگىسىنەن ارىلا وتىرىپ, پارلامەنتتىڭ ءرولىن كۇشەيتۋ جانە مەملەكەت باسشىسىنىڭ جاقىن تۋىستارىنا ساياسي لاۋازىمداردى اتقارۋعا, سونداي-اق كۆازيمەملەكەتتىك سەكتوردىڭ كومپانيالارىن باسقارۋعا زاڭ نەگىزىندە تىيىم سالۋ تۋرالى باستامالارعا بەلسەندى قولداۋ كورسەتتى.
بۇل رەتتە «ۇلتتىق عىلىمي مەديتسينالىق ورتالىعى» اق باسقارما توراعاسى اباي بايگەنجين پارلامەنت سايلاۋىن پروپورتسيونالدى جۇيەمەن وتكىزۋدەن باس تارتۋ قوعام ءۇشىن كوپتەن كۇتكەن قادام بولعانىن اتاپ ءوتتى. دارىگەرلەردىڭ پىكىرىنشە, پارتيالاردى تىركەۋ ءراسىمىنىڭ ايتارلىقتاي جەڭىلدەۋىمەن قاتار, اۋداندىق جانە قالالىق ءماسليحاتتار دەپۋتاتتارىنىڭ ماجوريتارلىق تاسىلمەن سايلانۋى ساياساتقا حالىقتىڭ سەنىمىنە يە بولعان جاڭا ادامداردىڭ كەلۋىنە ىقپال ەتەتىنى ءسوزسىز. ەكىنشى جاعىنان, بۇل دەپۋتاتتاردىڭ سايلاۋشىلار الدىنداعى جاۋاپكەرشىلىگىن ارتتىرادى. جاڭا پارتيالار دەپۋتاتتىق مانداتتار ءۇشىن ساياسي باسەكەلەستىكتى كۇشەيتەدى جانە كوشەلەر مەن الاڭدارداعى پىكىرتالاستاردىڭ پارلامەنت پەن ءماسليحاتتاردا كورىنىس تابۋىنا مۇمكىندىك بەرەدى.
– ءبىزدىڭ ورتالىق 20 جىلدان اسا ۋاقىت بويى ەلىمىزدىڭ تۇكپىر-تۇكپىرىنەن كەلگەن پاتسيەنتتەرگە جوعارى تەحنولوگيالىق مەديتسينالىق كومەك كورسەتىپ كەلەدى. ءبىز ايماقتارداعى دەنساۋلىق ساقتاۋ جۇيەسىنىڭ بىردەي دامىپ جاتپاعانىنان حاباردارمىز. وسى ورايدا مەديتسينا قىزمەتكەرلەرى قازاقستاننىڭ اكىمشىلىك-اۋماقتىق قۇرىلىمىن وزگەرتۋگە قاتىستى, پرەزيدەنت باستاماسىن تولىق قولدايدى. جاڭا ءۇش وبلىستىڭ پايدا بولۋى وڭىرلەردىڭ دامۋىنا ەلەۋلى سەرپىن بەرەدى, تۇرعىنداردىڭ وبلىس ورتالىعىنا بارىس-كەلىسىن جەڭىلدەتەدى, ىشكى كوشى-قوندى رەتتەۋدى وڭتايلاندىرادى. ۇسىنىلعان جاڭا وبلىستار اتاۋى – اباي, ۇلىتاۋ, جەتىسۋ وبلىستارى ءار قازاقستاندىق ءۇشىن ەرەكشە قاسيەتتى ماعىناعا يە. نەگىزگى گەوگرافيالىق اتاۋلاردى قايتارۋ, ۇلت قايراتكەرلەرىنىڭ ەسىمىن ۇلىقتاۋ رۋحانياتىمىزدى كۇشەيتۋگە ىقپال ەتەتىنى ءسوزسىز, – دەدى ا.بايگەنجين.
